Diosmanta willakuqpa imam rurananmanta
3
Israelpa mirayninkuna,
uyariychik.
Egiptomanta horqomusqan runankunatam nisunkichik:
2 Kay pachapi nacionkunamantam
qamkunallata akllakurqaykichik.
Chayraykum mana allinkuna
rurasqaykichikmanta castigasqaykichik.
3 Iskay runakunaqa manam purinmanchu
manaraq tanteanakuchkaspaqa.
4 Montepi leonqa manam ñawrawyanmanchu
mana imatapas hapichkaspaqa.
Malta leonqa manam qaparinmanchu
mana imatapas tarichkaspaqa.
5 Urpituqa pakchaman yaykuruspallam hapirachikun.
Pakchaqa urpituta hapiruspallanmi wichiykun.
6 Cornetillata guerrapaq llaqtapi tocaptinkuqa
runakunam mancharikun.
Llaqtapi runakunaman ima castigopas hamuptinqa
Diosmantam hamun.
7 Paymanta willakuq serviqninkunaman
mana willachkaspaqa
manam imatapas ruranmanchu Señor Diosqa.
8 Leon ñawrawyaptinqa
runakunam mancharikunku.
Dios kamachiptinqa
paymantam willakunku.
Samaria llaqta tuñichisqa kananmanta
9 Asdod llaqtapa palacionkunapiyá willakuychik.
Egipto nacionpa palacionkunapiyá willakuychik:
“Samariapa orqonkunamanyá huñunakamuychik.
Qawaychik chaypi chaqwakunata.
Qawaychik wakchakuna ñakariqta.”
10 Tayta Diosmi kaynata nin:
Paykunaqa mana allinkunapim kawsanku.
Mana llakipayaspa salteasqankutam
palacionkupi waqaychanku.
11 Señor Diosmi kaynata nin:
Enemigoykikunam chawpicharusunkichik.
Harkasuqnikichik perqatam tuñirachinqa.
Palacioykichikpi tukuy imatam suwarunqa.
12 Tayta Diosmi kaynata nin:
Imaynam ovejata leon mikuptin
michiq salvarunman iskay piernallantaña
otaq rinrinpa puntallantaña,
chaynam Samaria llaqtapi yachaq
Israel runakunapas asllaña salvakunqaku.
Chay runakunaqa Damasco llaqtapim
suma-sumaq camakunapi waqtapachkanku.
13 Llapallan Kamachiq Tayta Diosmi nin:
Uyarispa willakuychik
Jacob castakunapa contranpi.
14 Castiganay punchawpim
Israel castakunata huchanmanta castigasaq.
Betel llaqtapi altarkunatam tuñirachisaq.
Wichiykunanpaqmi esquinankunata qorurusaq.
15 Apukunapa wasintam tuñirachisaq.
Suma-sumaq wasikunatam taqmarusaq.
Chaynatam Tayta Dios nin.