Diospa qayakuyninmanta
5
Israel castakuna,
uyariychik.
Aya taki takipusqaytayá uyariychik.
2 Israel nacionqa sumaq doncella hinam.
Wichiykusqanraykum manaña haykapipas hatarinqañachu.
Wichiykuptinmi manaña hatarichiqnin kanchu.
3 Israel castakuna,
Señor Diosninchikmi nin:
Waranqa soldadokunata huk llaqta
guerraman kachaptinqa
kawsaqkunam kutimunqa pachakllaña.
Pachak soldadokunata huk llaqta
guerraman kachaptinqa
kawsaqkunam kutimunqa chunkallaña.
4 Israel castakunatam Tayta Dios nin:
Ñoqaman hamuspaqa kawsankichikmi.
5 Betel llaqtapi taytachamanqa amayá riychikchu.
Gilgal llaqtapi taytachamanqa amayá yaykuychikchu.
Beerseba llaqtapi taytachamanqa amayá pasaychikchu.
Betel llaqtaqariki purmachisqam kanqa.
6 Kawsanaykichikpaqyá
hamuychik Tayta Diosman.
Mana chayqa paymi kachaykamunqa
ninata Israel nacionman.
Betel llaqtapim
mana pipapas wañuchiy atinan kanman.
7 ¡Ay,
imaynaraq kankichik!
Qamkunam allin arreglayta
mana allinman tikrarunkichik.
Allin kasukuytam yanqacharunkichik.
8 Suchuwan sutichasqa lucerokunata
unanchaq Tayta Diosmi,
Yutuwan sutichasqa lucerokunata
unanchaq Tayta Diosmi
manchakuypaq tutayayta achikyarachin.
Punchawtam ancha-anchata tutayarachin.
Lamar qochata puyuyarachispanmi
allpaman parachin.
9 Amparakuna wasikunatam tuñirachin.
Allin murallakunatam purmarachin.
10 ¡Ay,
imaynaraq kankichik!
Wakchakuna defiendeytam cheqninkichik.
Cheqap testigokunatam wischupakunkichik.
11 Chakra runakunata cargochaspam
trigonpi cobrakunkichik.
Labrasqa rumikunawanmi
wasita rurarunkichik.
Ichaqa chaypiqa manam yachankichikchu.
Uvas plantakunatam tarpunkichik
ichaqa chaypa rurunmanta kaq vinotaqa
manam mallinkichikchu.
12 Mana kasukusqaykichikkunatam yachani.
Tukuy rikchaq huchaykichikkunatam qawani.
Allin runakunapa contranpim sayarinkichik.
Juzgadopi wakchakuna pierdenankupaqmi
qollqeta chaskinkichik.
13 Chayraykum allin yachayniyoq runaqa upallakun.
Chay tiempoqa mana allin kasqanraykum upallakun.
14 Allin kaqtayá qamkunaqa ruraychik.
Kawsanaykichikpaqa amayá mana allintachu ruraychik.
Chaynata ruraptikichikqa:
“Llapallan Kamachiq
Tayta Diosmi
ñoqaykuwan kachkan” nispa
nisqaykichikpas cheqapmi kanqa.
15 ¡Allin rurayta kuyaychik,
mana allin rurayta cheqniychik!
Juzgadopiqa allintayá arreglaychik.
Ichapas Llapallan Kamachiq Tayta Diosqa kuyapayarikunman.
Israel castakunapa puchuqninmanta kuyapayarikunman.
16 Llapallan Kamachiq Señor Diosmi nin:
Tukuy plazakunapim waqanqaku.
Tukuy callekunapim “Ay,
ay” ninqaku.
Chakra runakunatam wañuqmanta
waqanankupaq qayamunqaku.
Aya taki takiqkunatam pusamunqaku.
17 Castiganaypaq hamuptiymi
llapallan uvas huertakunapi waqallanqaku.
Chaynatam Tayta Dios nin.
18 ¡Ay,
imaynaraq kankichik
Tayta Diospa punchawnin chayamunanta munaqkuna!
Manam yachankichikchu
imaynam chay punchaw kanantaqa.
Chay punchawkunaqa tutayanqam,
manam achkiychu kanqa.
19 Leonmanta ayqeq runam
ukumariwan tuparun.
Wasinman yaykuqtapas
perqaman tawnapakuykuptinmi culebra kachurun.
Chaynapunim qamkunatapas pasasunkichik.
20 Tayta Diospa punchawninqa tutayanqam,
manam achkiychu kanqa.
Yana manka hina tutam kanqa.
Manam imaniraqllatapas achkinqachu.
21 Cheqnispam despreciowan qawani
adorawanaykichikpaq fiestaykichikta.
Manam munanichu sutiypi
hatun huñunakuykuna rurasqaykichikta.
22 Manam munanichu animalkunata
wañuchispa kañapuwasqaykichikta.
Manam munanichu kawsaykunamanta
ofrendakuna qowasqaykichikta.
Ñoqawan allinlla kasqaykichikmanta
wira animalkuna wañuchipuwasqaykichiktaqa
manam rikuytapas atinichu.
23 Qamkunaqa amañayá takiychikchu.
Arpaykichikpas amañayá waqachunchu.
Manañam uyariyta munaniñachu.
24 Allin arreglokuna rurasqaykichikqa
sumaq kallpachkaq mayu hinayá kachun.
Allin rurasqaykichikpas
mana chakiq mayu hinayá kachun.
25 Israel castakuna,
chunniqpi tawa chunka wata kaspaykichikqa
animalkunatam mana kañapuwarqankichikchu.
Kawsaymanta ofrendatam mana ofrecewarqankichikchu.
26 Kunanqariki Sicut sutiyoq taytachaykichikta
hinaspa Quiyun sutiyoq taytachaykichikta
aparikuspach purinkichik.
Chay taytachakunataqa
qamkunam rurakurqankichik.
27 Chayraykum presota pusachisqaykichik
Aram nacionpa waklawninmanraq.
Chaynatam Tayta Dios nin.
Payqa Llapallan Kamachiqwan sutichasqam.