2
Hinaptinmi wawqekichikta ninkichik:
“Diospa runanñam kankichik” nispa.
Chaynataqmi panikichiktapas ninkichik:
“Llakipayasqañam kankichik” nispa.
Israelpa castankuna mana kasukuq kasqanmanta
2 Mamaykichiktayá culpaychik.
Qamkunayá payta culpaychik.
Payqariki manam warmiyñachu.
Ñoqaqa kani manam qosanñachu.
Amañayá huchapakuypiqa purichunchu.
Amañayá hukwan-hukwanqa puñukuchunchu.
3 Mana chayqa pasaypaq qalallatam saqeruyman.
Nacesqan punchawpi hinam qalallata saqeruyman.
Mana imayoq chunniqta hinam rurarusaq.
Chakisqa allpata hinam rurarusaq.
Yakunayayllamantam wañurachisaq.
4 Manam llakipayarisaqchu wawankunatapas.
Wachapakusqallanmiki paykunapas.
5 Paykunapa mamanqariki hukwan-hukwanmi tupakururqa.
Paykunata wachakuqmi penqaypi karurqa.
Paykunapa mamanqa kaynatam nirqa:
“Pasakusaqyá amigoykunawan.
Paykunaqariki mikunaytawan yakutam qowan.
Paykunaqariki qowanmi millwatawan linotapas.
Paykunaqariki qowanmi aceitetawan tomanaytapas.”
6 Chayraykum purinantapas
kichkakunawan qencharusaq.
Chayraykum paypa purinanpa
muyuriqnintapas perqarusaq.
Purinantaqa manaña tarinanpaqmi chinkarachisaq.
7 Amigonkunata qatispanpas manam haypanqañachu.
Amigonkunata maskaspanpas manam tarinqañachu.
Chaymi payqa yuyaymanaspa ninqa:
“Punta kaq qosaymanyá kutikusaq ñoqaqa.
allintam kawsakurqani ñawpaqtaqa.
Manam kunan hinachu karqani paywanqa.”
8 Chaywanpas payqa manam reqsikurqachu
trigota,
vinota hinaspa aceite qosqaytaqa.
Manam reqsikurqachu Baal sutiyoq taytachaman
ofrecesqan qori-qollqe mirachipusqaytaqa.
9 Chaynaqa cosecha tiempo chayamuptinmi
trigo qosqaytapas kutichikusaq.
Chaynaqa poqosqaña kaptinmi
vino qosqaytaqa kutichikusaq.
Pachakunanpaq millwa qosqaytapas
hoqarikusaqmi.
Pachakunanpaq lino qosqaytapas
hoqarikusaqmi.
10 Amigonkuna qawachkaptinmi
rikurirachisaq qalallata.
Makiymantaqa manam pipas
atinqachu librayta.
11 Qollurachisaqmi tukuy kusikuynintapas.
Qollurachisaqmi hatun fiestankunatapas
chaynataq mosoq killa fiestankunatapas
chaynataq samananpaq kaq punchawkunatapas.
Qollurachisaqtaqmi wakin fiestankunatapas.
12 Uvas plantankunatapas purmarachisaqmi.
Higos sachankunatapas purmarachisaqmi.
Chaykunamantam payqa rimakuq kaynata nispa.
“Kayqariki amigoykunapa pagawasqanmi” nispa.
Chaykunataqa montellatañam rikurirachisaq.
Chaykunataqa purun animalkunawanmi mikurachisaq.
13 Paytaqa Baal sutiyoq taytachakuna
adorasqanmantam castigasaq.
Chay taytachakunaman incienso
kañasqanmantam castigasaq.
Payqa anillonkunawan adornakuykuspam
amigonkunata qatikurqa.
Payqa alhajankunawan adornakuykuspam
amigonkunata qatikurqa.
Chaykunata ruraspanmi
ñoqataqariki qonqaruwarqa.
Ñoqa Tayta Diosmi chaynata nini.
Runakunapaq Diospa kuyakuyninmanta
14 Ñoqam paytaqa “Arí” nichisaq.
Paytaqa chunniqmanmi pusasaq.
Chaypim sonqonta rimapayasaq.
15 Chaymantañam uvas huertantapas kutichipusaq.
aAcor qechwatam tikrarusaq
kusikuywan suyana punkumanña.
Chaypim contestawanqa
sipas kayninpi hinaña
hinaspa Egipto nacionmanta
horqomusqaypi hinaña.
16 Chay punchawpiqa
“qosaymi kanki” nispañam niwankichik.
Chay punchawpiqa manam
“Patronnilláy” nispañachu niwankichik.
17 Qonqarachiptiymi Baal sutiyoq taytachakunataqa
manaña haykapipas qayakunqachu Israel runakunaqa.
18 Chay tiempopim Israel runakunata favorecespay
purun animalkunawan rurasaq huk contratota.
Chay contratotaqa rurasaqtaqmi
alton pawaq animalkunawanpas.
Chaynataqmi rurasaqtaq
qasqonpa puriq animalkunawanpas.
Chinkachisaqtaqmi kay nacionmanta
runakunapa flechana arconkunatapas,
espadakunatapas chaynataq tukuy guerratapas.
Runaykunaqa hawkallañam kawsakunqakupas.
19 Israel runakuna,
wiñaypaqñam casarasqayki.
Leyman hina warmiypaqñam chaskisqayki.
Llakipayaspaymi,
kuyapayaspaymi casarasqayki.
20 Tayta Dios kasqayta yachanaykipaqmi casarasqayki.
Mana rakinakunanchikpaqñam casarasqayki.
21 “Chay punchawmi contestasaq” nispam nini.
“Ñoqa Tayta Diosmi contestasaq” nispam nini.
Ñoqam contestasaq cielokunata.
Cielokunam contestanqa kay pachata.
22 Kay pachañataqmi contestanqa trigota.
Contestanqataqmi vinotawan aceitetapas.
Llapallankum contestanqaku bJezreeltapas.
23 Allpa pachapim runaykunata
kikillaypaqña tarpusaq.
“Manam llakipayasaqñachu”
nisqaykunatam kunanqa llakipayasaq.
“Manam runaykunañachu kankichik”
nisqaykunatam kunanqa:
“Runaykunañam kankichik” nisaq.
Paykunañataqmi niwanqa:
“Qamllam Diosniyqa kanki” nispa.