—Hukwan tupakuruchkaptinpas rispaykiyá kuyamuy kuyasqayki warmita.

Chaynatam Tayta Diospas kuyan Israelpa mirayninkunataqa.

Mana reqsisqanku dioskunata qatichkaptinkupas ñoqaqa paykunataqa kuyanim.

Chaykunata adoranankupaq ñapupasqa uvas pasaskunata munachkaptinkupas paykunataqa kuyanim —nispa.

2 Hinaptinmi chay warmitaqa ñoqapaq rantirqani yaqa soqta onza qollqewan,

pagarqanitaqmi kimsa pachak kimsa chunkan kilo cebadatapas.

3 Chay warmitam ñoqa nirqani:

Qamqa ñoqawanmi yachanki achka watakuna.

Amayá huchapakuychu.

Amayá hukwan-hukwanqa tupakuruychu,

ñoqapas qamllawantaqmi kasaq —nispa.

4 Achka watakunam Israelpa mirayninkuna kanqa mana reyniyoq hinaspa mana kamachiqniyoq,

Diosta adoranankupaqpas manam animalkunata wañuchinqakuchu,

manataqmi kanqachu adoranankupaq pilarkunapas nitaq efodwan pachakuq sacerdotepas nitaq taytacha-mamachakunapas.

5 Chaymanta Israelpa mirayninkuna kutiramuspankum maskanqaku yupaychasqanku Tayta Diosta.

Maskanqakutaqmi reyninku Davidtapas.

Tukupay punchawkunapiqa Tayta Diostañam respetanqaku,

respetanqakutaqmi allin kaqkuna qosqantapas.