2 Tayta Diosmi Oseaswan rimayta qallarispan nirqa:

—Israel nacionpi runakunaqa hukwan-hukwan kakuq warmi hinam ñoqamanta karunchakurunku.

Chaynaqa qampas rispaykiyá casarakamuy hukwan-hukwan kakuq warmiwan.

Paypi churikikuna kaqpas maman hinam kanqa —nispa.

3 Oseasmá casarakurqa Diblaim sutiyoq runapa churin Gomerwan.

Paymá wiksayakuruspan wachakurqa qari wawata.

4 Hinaptinmi Oseasta Tayta Dios nirqa:

—Jezreel nispayá sutichay chay wawataqa.

Manapas unaymantam castigasaq Rey Jehupa castanta.

Chaynataqa rurasaq Jezreel llaqtapi runakunata Rey Jehu wañuchisqanmantam.

Chaynapim puchukachisaq Israel nacionta.

5 Chay punchawmi flechana arcota pakipachkaq hina Israel tropakunata tukuparusaq,

chaynataqa rurasaq Jezreel sutiyoq qechwapim —nispa.

6 Gomermi huktawan wiksayakuruspan wachakururqa warmi wawata.

Chaymi Oseasta Tayta Dios nirqa:

—Paytaqa sutichay Lo-ruhama nispa- yá.

Manam llakipayasaqñachu Israel nacionpi runakunataqa.

Manam pampachasaqñachu paykunataqa.

7 Ichaqa Juda nacionpi runakunataqa llakipayarisaqmi.

Paykunapa yupaychasqanku Tayta Diosmi ñoqaqa kani,

chaynaqa paykunataqa ñoqapunim salvasaq.

Salvasaqqa manam flechawanchu nitaq espadawanchu nitaq guerrawanchu nitaq caballokunawanchu nitaq caballokunapi silladakunawanchu —nispa.

8 Gomermi Lo-ruhama sutiyoq wawanta anukarurqa hinaspanmi huktawan wiksayakuruspan qari wawata wachakururqa.

9 Hinaptinmi Oseasta Tayta Dios nirqa:

—Chay wawataqa sutichay Lo-ami nispaykiyá.

Qamkunaqariki manam kankichik runaykunañachu,

ñoqapas manataqmi kani Diosnikichikñachu.