Israel ayllukunaman allpa partesqankumanta
48
1-7 —Norte lawpi tarikuq linderoqa qallarinqa Mediterraneo Lamar Qochapim hinaspam pasanqa Hetlon sutiyoq llaqtapa waqtanta hinaspa Hamat Qasanta Hazar-enan llaqtaman chayanankama,
Damasco llaqtapiwan Hamat lawpi allpakunaqa kanqa norte lawpimá.
Israel sapa ayllukunapa allpankunaqa intipa qespimunan lawmanta qallaykuspam chutarikunqa intipa seqaykunan law Mediterraneo Lamar Qochapa patankama.
Chay ayllukunamanmi norte lawmanta qallaykuspa surlawman qatinasninpi partenqaku Dan ayllupaq,
Aser ayllupaq,
Neftaliy ayllupaq,
Manases ayllupaq,
Efrain ayllupaq,
Ruben ayllupaq hinaspa Juda ayllupaq.
Tayta Diospaq sapaqchananku allpamanta
8 —Surlawpi tarikuq Juda ayllukunapa allpankunapa qatiqninmanñataqmi partenqaku ñoqapaq sapaqchasqanku allpakunata.
Chaypas intipa qespimunan lawpi qallarispam kinrayninman chutarikunqa intipa seqaykunan lawpi Mediterraneo Lamar Qochapa patankama,
chay kinrayninman chutarikuq allpakunapa largonqariki kanqa chay ayllukunapa allpan sayayniyoqmi,
anchonñataqmi kanqa chunka kimsayoq kilometro tumpa masnin.
Chay allpakunapa chawpinpiñataqmi kanqa ñoqapa santuarioy.
9 —Ñoqa Tayta Diosman qowanaykichik chay allpakunapa largonqa kanqa chunka kimsayoq kilometro tumpa masninmi,
anchonñataqmi kanqa chunka kilometro parten.
10 Chay partepuwasqanku allpamantapas partenqakutaqmi sacerdotekunapaq sapaqchasqa allpata.
Chay allpakunapa largonqa kanqa chunka kimsayoq kilometro tumpa masninmi,
anchonñataqmi kanqa pichqa kilometro cuarton,
sacerdotekunapa allpanpa chawpinpiñataqmi kanqa ñoqapa santuarioy.
11 Chay allpaqa kanqa Sadocpa mirayninmanta kaq ñoqallapaqña sapaqchakuq sacerdotekunapaqmi,
paykunallamiki santuarioypiqa serviwarqaku Israel castakuna ñoqamanta karunchakuruptinkupas,
paykunaqariki karunchakururqaku Leviy castakunata qatispankum.
12 Chaynaqa chay ñoqallapaqña sapaqchapuwasqanku allpapimá otaq Leviy castakunapa allpanpa waqtanpimá kanqa sacerdotekunaman qosqanku allpakunaqa.
13 Sacerdotekunapa norte law waqtanpipas kanqam Leviy castakunapa allpanqa,
chay allpapa largonqa kanqa chunka kimsayoq kilometro tumpa masninmi,
anchonñataqmi kanqa pichqa kilometro cuarton.
14 Chay allpaqa ñoqa Tayta Diosllapaqña sapaqchasqamá kanqa hinaspapas chay allpaqa kanqa chay nacionpi allpakunamantapas aswan allinninmi.
Chay allpakunaqa manam imaniraqllapas rantikusqachu kanqa,
amataqmi chay allpaqa pipapas cambiasqanchu kanqa nitaqmi pimanpas qosqachu kanqa.
15 —Chay qowasqanku puchuqnin allpakunam ichaqa kanqa mana ñoqapaq sapaqchasqachu,
chay puchuq allpapa largonqa kanqa chunka kimsayoq kilometro tumpa masninmi,
anchonñataqmi kanqa iskay kilometro parten maschayoq.
Chaypimá hatarichinqaku runakunapa yachanan huk llaqtata,
chay llaqtapa waqtankunapiñataqmi kanqa animalkunapa echaderon,
chay allpapa chawpinpimá kanqa chay llaqtaqa.
16 Chay llaqtapa tawantin waqtankunaqa kanqa yaqa iskay kilometro parten igualkama sayayniyoqmi.
17 Chay llaqtapa muyuriqninpi echaderonkunaqa tawantin waqtanpim kanqa igual sayayniyoqkamalla,
sapakamapa anchonmi kanqa pachak kimsa chunkan hukniyoq metro.
18 Intipa qespimunan lawman qawaq llaqtapa waqtanpim qallarinqa tarpunanku chakrakunaqa,
chay chakraqa chutarikunqa ñoqallapaqña sapaqchapuwasqanku allpapa waqtantam.
Intipa seqaykunan lawman qawaq llaqtapa waqtanpipas qallarinqam hina chayna tarpuna chakrakuna.
Chay chakrapi ruruqkunaqa kanqa llaqtapi llamkaq runakuna mikunanpaqmi.
Chay kaylaw-waklawpi tarikuq chakrakunapa sapakama largonqa kanqa pichqa kilometro cuartonmi.
19 Llaqtapi yachaq llamkaqkunaqa kanmanmi Israelpa mayqen ayllunkunamantapas,
paykunamá llamkanqa chay chakrakunapiqa.
20 Chaynaqa santuariopaq sapaqchasqanku allpam llaqtapaq partesqanku allpapiwan kayna kanqa:
tawantin waqtankunam kanqa igual sayayniyoqkamalla,
chay hukninpa waqtanpa sayayninmi kanqa chunka kimsayoq kilometro tumpa masnin.
Kamachikuqpaq allpakunamanta
21-22 —Santuariopaq sapaqchasqanku allpakunapiwan llaqtapaq partesqanku allpakunapa kaylaw-waklawninpi puchuq allpakunam kanqa kamachikuqpaq.
Chay allpapa norte lawninpiqariki qallarinqa Juda castakunapa allpankunam,
surlawninpiñataqmi qallarinqa Benjamin castakunapa allpankuna.
Chaynaqa intipa qespimunan lawpi tarikuq allpapa anchonqa kanqa chunkakimsayoq kilometro tumpa masninmi,
largonñataqmi kinrayninman chutarikunqa intipa qespimunan law linderoman.
Intipa seqaykunan lawpi tarikuq allpapas chayna igual anchoyoqllataqmi kanqa hinaspam chaypas chutarikunqa Mediterraneo Lamar Qochapa patankamataq,
chay lliw allpakunapa chawpinpimá kanqa ñoqallapaqña sapaqchasqanku temploqa,
chaypitaqmi kanqa Leviy castakunaman tocaq allpapas hinaspa llaqtapaq allpapas.
Israel wakin ayllukunapa allpanmanta
23-27 —Israel wakin ayllukunapa allpanqa intipa qespimunan lawmanta qallaykuspam chutarikunqa intipa seqaykunan lawpi Mediterraneo Lamar Qochapa patankama,
chay ayllukunamanmi norte lawmanta qallaykuspa surlawman qatinasninpi partenqaku Benjamin ayllupaq,
Simeon ayllupaq,
Isacar ayllupaq,
Zabulon ayllupaq hinaspa Gad ayllupaq.
28 —Surlawpi tarikuq linderoñataqmi qallarinqa Tamar llaqtapi hinaspam chutarikunqa yakupa kanan Meriba-cades lawkama,
chaymantañataqmi chutarikunqa Egipto Wayqo nisqanku wayqonta Mediterraneo Lamar Qochaman chayanankama.
29 —Chaynaqa chay allpatamá herenciapaq chaskinqaku Israelpa castankunaqa,
chaynamá kanqa paykunaman partesqaykichik allpakunaqa.
Jerusalen llaqtapa punkunkunamanta
30-34 —Chaypi kaq llaqtaqa kanqa murallawan muyusqam.
Chay llaqtapa tawantin waqtankunaqa igual sayayniyoqkamallam kanqa,
huknin waqtanmi kanqa yaqa iskay kilometro parten.
Chay murallapa tawantin waqtankunapim kanqa kimsa zaguan punkukuna,
sapa punkukunam sutichasqa kanqa Israel ayllukunapa sutinwan,
norte lawman qawaq murallapim kanqa Ruben Punku,
Juda Punku hinaspa Leviy Punku.
Intipa qespimunan lawpiñataqmi kanqa Josey Punku,
Benjamin Punku hinaspa Dan Punku.
Surlawpiñataqmi kanqa Simeon Punku,
Isacar Punku hinaspa Zabulon Punku.
Intipa seqaykunan lawpiñataqmi kanqa Gad Punku,
Aser Punku hinaspa Neftaliy Punku.
35 Chay murallapa lliw muyuriqninqa kanqa isqon kilometro partenmi.
Chay punchawmantapunim chay llaqtapa sutinqa kanqa:
“Tayta Diosmi Chaypiqa Kachkan.”
niq sutiyoq.