Templo lawmanta lloqsiq mayumanta
47
Chaymantam chay pusawaqniy runaqa kutichiwarqa temploman yaykuna punkuman,
qawariptiymi yaku pawamuchkasqa templopa punkunpa uku kaq pampanmanta,
chay yakuqa kallpachkasqa templopa qawasqan intipa qespimunan lawmanmi.
Chay yakuqa uray lawmanmi templopa alleq lawninta richkasqa altarpa surlawninman.
2 Chaymantam lloqsichiwarqa norte lawman qawaq zaguan punkunta hinaspam muyuchimuwarqa hawa ñanninta intipa qespimunan lawpi punkuman chayanaykukama,
chay yakuqa asneqllam zaguan punkupa surlawninta pawachkasqa.
3 Chaymantam chay runaqa huk cordelta aptarikuspan lloqsirqa intipa qespimunan lawman hinaspam tupurqa yaqa media cuadrata.
Chaypi kaq yakuta chimpachiwaptinmi chay yakuqa haypawarqa chaki plantaykamalla.
4 Payqa tupurqataqmi yaqa media cuadratawan hinaspam huktawan chay yakuta chimpachiwarqa,
ichaqa chay yakuqa hayparuwarqa moqoykamañam.
Payqa tupurqataqmi yaqa media cuadratawan hinaspam huktawan chay mayuta chimpachiwarqa hinaptinmi chay yakuqa haypawarqa weqawniykamaña.
5 Huktawan yaqa media cuadrata tupuykuptinmi chay yakuqa rikurirurqa mana pasay atina mayuña,
chay yakuqa tikrakururqa nadeaspallaña pasana uku-uku mayumanmi.
6 Chaymi niwarqa:
—Runapa churin ¿yaqachum qawachkanki?
—nispa.
Chaymantam payqa kutirichimuwarqa mayupa patanta.
7 Chayna kutimustinmi mayupa kaylaw-waklawninpi rikurqani achkallaña sachakunata.
8 Hinaptinmi niwarqa:
—Kay mayuqa richkan intipa qespimunan lawmanmi hinaspam uraykuchkan Jordan Mayupa kallpanan qechwaman,
chaymantañataqmi yaykunqa Kachi Qochaman,
chay qochaman chayaruptinñataqmi chay qochapa yakunqa tikrakurunqa miski yakumanña.
9 Maypipas chay mayupa chayasqanpiqa kawsanqam tukuy rikchaq yaku animalkuna chaynataq timpuy-timpuy challwakunapas,
maymanñapas chay mayupa chayasqanpiqa qatqe yakutam miski yakumanña tikrarunqa hinaptinmi chaypiqa kawsanqa llapallan animalkuna.
10 Challwaqkunapas kanqa En-gadi Pukyu lawmanta qallaykuspam En-eglaim Pukyu lawkama,
chaypitaqmi mallankutapas mastanqaku chakichinankupaq,
chaypiqa Mediterraneo Lamar Qochapi hinam tarikunqa tukuy rikchaq challwakuna.
11 Chay Kachi Qochapa waqtanpi qochachakunapim ichaqa mana kanqachu miski yakuqa,
manataqmi kanqachu cienegankunapipas,
chaykunapiqa kachi horqonankupaqmi hinalla kanqa kachi yakukuna.
12 Chay mayupa kaylawnin-waklawninpiqa wiñanqam tukuy rikchaq fruta sachakuna,
chay sachakunapa llaqenqa manam haykapipas qawinqachu nitaqmi rurunkunapas tukunqachu,
sapa killan-killanllam rurunqa,
chaynaqa kanqa templomanta lloqsiq yakuwan parqosqa kasqanraykum.
Chay rurunkunaqa kanqa mikunapaqmi,
llaqenkunañataqmi kanqa hampipaq.
Allpankupa linderonkunamanta
13 —Ñoqa Señor Diosmi nini kaynata:
Chunka iskaynintin Israel ayllukunapa chaskinanku herenciankuqa kaynam kanqa:
Joseypa castankunamanmi tocanqa wakinkunapa allpanmantapas doble.
14 Ñoqaqa jurarqani kay nacionpi allpakunata abueloykichikkunaman qonaypaqmi,
chaynaqa qamkunayá igualninka rakinakuychik,
kay nacionpi allpakunaqariki kanqa herenciaykichikmi.
15 —Norte lawpi tarikuq linderoqa qallarinqa Mediterraneo Lamar Qochapim hinaspam pasanqa Hetlon sutiyoq llaqtapa waqtanta hinaspa Hamat Qasanta
16 Zedad sutiyoq llaqta lawman.
Chaynintaqa pasanqa Berota hinaspa Sebraim sutiyoq llaqta lawmanmi.
Chay llaqtaqariki tarikun Hauran sutiyoq linderopiñam.
17 Chaynaqa chay Mediterraneo Lamar Qochapi qallariq norte law linderoqa rinqa Hazar-enan llaqtakamam.
Damasco llaqtapiwan Hamat lawpi allpakunaqa kanqa norte lawpimá.
18 —Intipa qespimunan lawpi tarikuq linderoqa qallarinqa Hauran lawmanta Damasco llaqtaman riqpim hinaspam chutarikunqa Tamar llaqtakama.
Chay llaqtaqariki kachkan Kachi Qochapa hichpallanpim.
Chaynaqa chay linderoqa chutarikunqa Jordan Mayupa waqtantam hinaptinmi chay Jordan Mayuqa Galaad lawta rakinqa Israel nacionmanta.
Chaynamá kanqa intipa qespimunan lawpi tarikuq linderoqa.
19 —Surlawpi tarikuq linderoñataqmi qallarinqa Tamar llaqtapi hinaspam chutarikunqa yakupa kanan Meriba-cades lawkama,
chaymantañataqmi chutarikunqa Egipto Wayqo nisqanku wayqonta Mediterraneo Lamar Qochaman chayanankama.
20 —Intipa seqaykunan lawpi tarikuq linderoñataqmi kanqa Mediterraneo Lamar Qochapa norte lawman patankuna chutarikuq.
Chay linderoqa qallarinqa Egipto Wayqo nisqanku wayqonpimá hinaspam tukunqa Hamat Qasaman yaykunapa chimpanpi.
21 —Hinaptinqa chay allpatamá Israel ayllukunaqa rakinakunkichik.
22 Chaynaqa kay allpakunamá kanqa tocasuqnikichik herenciaykichikqa chaynataq qamkunawan yachaq forasterokunapa herencianpas.
Paykunapa churin qamkuna ukupi naceptinqa paykunam kanqaku Israelpa miraynin hinaña,
chaynapim paykunapas chaskinqaku qamkuna hinaña tocaqnin herenciankuta.
23 Forastero runakunaqa tocaqnin herenciankutam chaskinqaku maymi ayllukunapa yachasqan allpapi.
Ñoqa Señor Diosmi nini chaynata.