Jerusalen llaqta vencesqa kasqanmanta
4
¡Imaynanpimá qoriqa qachachakurun!
¡Imaynanpimá allin qoriqa chapukurun!
¡Imaynanpimá templopa alhaja
ruminkunaqa wischurayachkan!
¡Llapallan callekunapa esquinankunapiraqmi
wischurayachkan!
2 Sion Moqo llaqtapi ancha estimasqa runakunaqa
¿imaynanpimá allpa manka hinañaqa rikurirunku?
Qori-puromantapas ancha estimasqa runakunaqa
¿imaynanpimá olleropa rurasqan manka hinañaqa rikurirunku?
3 Atoqkunapas uñachankunataqa ñuñunmi.
Atoqkunapas wawachankunataqa mikuchinmi.
Chunniqpi avestruz animalkunamanraqmi
rikchakun llaqtamasiykunaqa.
Chay animalkuna hina mana llakipayakuqmi
ñoqapa llaqtamasiykunaqa.
4 Ñuñuq wawachakunapa qallunmi
laqanakurunku yakumanta.
Warmachakuna mañakuptinpas
manam pipas qoykunchu tantata.
5 Miski mikuykunalla mikukuq runakunaqa
callekunapim wañunayachkanku.
Allin pachakunallawan pachakuqkunaqa
qopa patapiñam chutarayachkanku.
6 Llaqtamasiykunapa mana allin rurasqankunaqa
Sodomapa huchanmantapas aswanraqmi karqa.
Qonqaymanta chinkachisqam karqaku paykunaqa.
Mana atacachkasqam chinkarurqa paykunaqa.
7 Llaqtanchikpi akllasqa runakunapas karqa
ritimantapas aswan yuraqraqmi.
Llaqtanchikpi akllasqa runakunapas karqa
lechemantapas aswan yuraqraqmi.
Paykunaqa karqa coral alhaja rumimantapas
aswan rosado cuerpoyoqraqmi.
Paykunaqa karqa zafiro alhaja rumimantapas
kuyayllapaq rikchayniyoqraqmi.
8 Kunanqa tutayaymantapas aswan yanaraqmi rikurirunku.
Callekunapipas manaña reqsinam rikurirunku.
Kaspi hina tullunwan qarallanñam rikurirunku.
9 Yarqaywan wañuqkunamantaqa
guerrapi wañuqkunaraqmi aswan allinqa.
Mikunankupaq kawsayninku manaña kaptinmi
allillamanta wañurqaku paykunaqa.
10 Wawachankuta ancha kuyaq mamakunam
kikillanku wawachankuta yanururqaku.
Wawallankum mikuyninku rikurirurqa
llaqtamasiykunata wañurachiptinku.
11 Tayta Diosqa piñakusqanman hinam chaynata rurarqa.
Toqyaruchkaq hina piñakuyninwanmi chaynata rurarqa.
Sion Moqopi llaqtatam payqa kañaykurqa.
Cimientonkamaraqmi llaqtaqa ruparurqa.
12 Nacionkunapi reykunapas manam creerqakuchu
contraykupi kaqkuna Jerusalen llaqtapa
zaguanninkuna yaykunantaqa.
Tukuy kay pachapi yachaqkunapas manam creerqakuchu
Jerusalen llaqtapa zaguanninkunata enemigoyku yaykunantaqa.
13 Chaykunaqa pasakurqa
Diosmanta willakuqkunapa huchanraykum.
Chaykunaqa pasakurqa
sacerdotekunapa mana allinkuna rurasqankuraykum
chaynataq llaqta ukupi
allin ruraq runakunata wañuchisqankuraykum.
14 Ñawsakuna hinaraqmi callekunapi purichkanku paykunaqa.
Pachankupas yawarllañam kachkan paykunapaqa.
Chayraykum manaña pipas munarqachu llachpaykuytaqa.
15 Paykunatam runakuna nirqaku:
“¡Asurikuychik,
millakuypaqñam
qamkunaqa kankichik!”
nispa.
“¡Asurikuychik,
asurikuychik,
ama
llachpawaykuchu!”
nispa.
Lluptispanku yanqa puriptinkum
nacionkuna nirqaku:
“Kaypiqa manañam haykapipas
yachanqakuñachu” nispa.
16 Tayta Diosmi qayllanmanta cheqerachirqa.
Manañam favorecerqañachu paykunataqa.
Sacerdotekunapas manaña respetasqam karqaku.
Yuyaqkunapas manaña llakipayasqam karqaku.
17 Qawasqaykuraykum pisipasqaña kachkaniku.
Yanapaqniykutam yanqa suyachkaniku.
Llaqta cuidana torremantam qawachkaniku.
Mana salvay atiq naciontam suyachkaniku.
18 Puriptiykupas wateqawankum ñoqaykutaqa.
Manañam puriymankuchu calleykupiqa.
Tukurunanku punchawmi hichpamuchkanña.
Wañurunayku punchawmi chayamuchkanña.
19 Utqayman kallpaqkunam qatikachawarqaku.
Ankamantapas aswan utqaymanraqmi qatikachawarqaku.
Orqokunapim paykunaqa qatikachawarqaku.
Chunniqpim paykunaqa wateqawarqaku.
20 Tayta Diospa sapaqchasqan reytam
uchkuman hina wichiykachinku.
Kawsachiwaqniyku reytam
uchkuman hina wichiykachinku.
Chay reyniykumantam nirqaniku:
“Llantukuchkaq hinam payman amparakusunchik” nispa.
Chay reyniykumantam nirqaniku:
“Nacionkunapa allin reqsisqanmi kawsakusunchik” nispa.
21 Edom nacionpi kaqkuna,
asikuyllawanñayá kusikuychik.
Uz lawpi yachaqkuna,
asikuyllawanñayá kusikuychik.
Tomanaykipaq copam qanmanpas chayamunqa.
Sinkaruspa qalalla kanaykim chayamunqa.
22 Yaw sumaq Sion llaqta,
tukurunñam
castigasqa kaynikiqa.
Tayta Diosqa manañam pusachisunkichu presotaqa.
Edom nacionpi kaqkuna,
castigasunkichikmi
mana allin rurasqaykichikmantaqa.
Edom nacionpi kaqkuna,
qawachinqataqmi
qamkunapa huchallikusqaykichiktaqa.