Librasqa kanankumanta
3
Ñoqaqa ñakariykunapi
ñakariq runam kani.
Tayta Diospa piñakuyninpi castigowan
ñakariq runam kani.
2 Tutayay sitiomanmi hikutaspa pusawarqa.
Mana kanchaypa kasqanmanmi pusawarqa.
3 Sapa kutillam makinwan castigawan.
Horan-horanllam makinwan castigawan.
4 Aycha-qaraytam payqa mawkayarachin.
Tulluykunatam payqa ñutuparachin.
5 Muyuriqniypi perqata hatarichichkaq
hinam llakikuywan muyurirachiwan.
Muyuriqniypi perqata hatarichichkaq hinam
ñakariywan muyurirachiwan.
6 Tutayaykunapi hinam kawsachiwarqa.
Unayña wañuqkunata hinam kawsachiwarqa.
7 Tukuy muyuriqniymantam corralaruwan
manaña lloqsiy atinaypaq hina.
Ñakarichiwarqam broncemanta llasaq
cadenakunawan hina.
8 Yanapaykuwananpaq qayakuptiypas
manam caso-preciotapas churarqachu.
Yanapaykuwananpaq ruegakuptiypas
manam caso-preciotapas churarqachu.
9 Risqay ñantam
labrasqa rumikunawan hina wichqaruwan.
Purisqay ñankunamantam
huklawman muyurachiwan.
10 Wateqaqniy ukumari hinam payqa kawarqa.
Pakakuq leon hinam payqa kawarqa.
11 Ñanniymanta pantarachiwaspanmi
tisaparuwananpaq hapiruwan.
Mana piyniyoqtañam saqeruwan.
12 Flechananwan flecharuwananpaqmi churaykuwan
13 Flechankunaqa rurunniykamaraqmi yaykuruwan.
14 Llapa llaqtamasiykunapa asipayananñam rikuriruni.
Tukuy tiempopi takipayananñam rikuriruni.
15 Llakiwan huntasqatam Tayta Diosqa ruraruwan.
Ajenjota hinam ancha qatqeta tomarachiwan.
16 Ñutu rumiwanmi kiruykunata pakiruwan.
Allpa pampapim payqa qochparachiwan.
17 Sonqoypi hawkayaytaqa manam tariniñachu.
Kusisqa kaymantaqa manam yuyariyllapas-yuyariniñachu.
18 Kallpaypas tukurusqantañam piensarqani.
Tayta Dios manaña yanapawasqantam piensarqani.
19 Ñakarisqaytawan yanqa purisqaytam yuyarini.
Ajenjotawan veneno mallisqaytam yuyarini.
20 Chaykunataqa sumaqtam yuyarini
hinaspam manaña kallpayoq kani.
21 Chaywanpas anchatam confiakuni.
Chayraykum kaynata piensani:
22 Tayta Diospa kuyapayakuyninraykum
mana puchukarunchikchu.
Paypa llakipayakuyninqa
manam haykapipas tukunchu.
23 Mosoqmi sapa tempranon llakipayakuyninqa.
Dios Taytalláy,
ancha confiakunam kanki qamqa.
24 Ñoqam nini:
“Tayta Diosmi kapuqniyqa” nispa.
“Chayraykum payllapi confiakuni” nispa.
25 Tayta Diosqa ancha allinmi confiakuqninkunapaq.
Tayta Diosqa ancha allinmi maskaqninkunapaq.
26 Tayta Dios yanapawananchikpaqqa
upallalla suyaymi aswan allinqa.
27 Warma kaymantapuni
yugoman watasqa hina kaymi aswan allinqa.
28 Chaykunata Tayta Dios runaman churkuptinqa
sapallan tiyaspanyá upallalla kachun.
29 Allpakamaraqyá payqa humillakuchun.
Ichapas yanapaykunman Diosqa.
30 Maqaqninmanyá uyanta qochun.
Llapanpa insultasqanyá kachun.
31 Señorqa manam wiñaypaqchu runataqa qepanchakurunqa.
32 Pitapas llakichispanqa paymantam llakipayarikun.
Ancha kuyapayakuq kasqanraykum llakipayarikun.
33 Runataqa manam yanqapaqchu ñakarichin.
Runataqa manam yanqapaqchu llakichin.
34 Kay pachapi carcelasqa runakunata
sarutyachkaq hina ñakarichiqtaqa,
35 Alto-altopi kaq Diospa qayllanpi
runamasinpa derechon negaqtaqa,
36 runapa asunton mana allin arreglaqtaqa
¿manachum qawachkan Señorqa?
37 ¿Pitaq imatapas rimanman
Señorpuni mana kamachikuptinqa?
38 Runapa mana allinninpaq kaqpas
Alto-altopi kaq Diospa rimasqanman hinam.
Runapa allinninpaq kaqpas
Alto-altopi kaq Diospa rimasqanman hinam.
39 Huchallikuspa kawsaq runaqa
¿imanasqataq quejakun kay pachapiqa?
40 Imaynam kawsasqanchiktayá allinta qawarikusun.
Kaqllamantayá Tayta Diosman kutirikusun.
41 Hanaq pachapi kaq Diospiyá piensarisun.
Payta mañakuspayá kaynata nisun:
42 Huchallikusqaykutam mana pampachawarqankikuchu.
Mana kasukusqaykutam mana pampachawarqankikuchu.
43 Anchata piñakuspaykim qatikachawarqankiku.
Mana llakipayarikuspaykim wañuchiwarqankiku.
44 Puyukunawanmi harkarachikunki
mañakusqaykuta manaña uyarinaykipaq.
45 Llapallan runakunapa qayllanpim
churawankiku millakuypaqña kanaykupaq.
46 Contraykupim rimarqa llapallan enemigoyku.
47 Mancharichisqa hinaspa toqllapa hapisqanmi kaniku.
Tuñichisqa purmachisqapa kasqanpim tarikuniku.
48 Kuyasqay llaqtamasiykunam
chinkachisqaña kachkan.
Chayraykum weqeykunapas
mayu hinaraq kallparichkan.
49 Mana taniytam weqellaykuna sutuchkan.
Mana samaytam weqellaykuna sutuchkan
50 hanaq pachapi kaq Tayta Dios qawamunankama,
hanaq pachapi kaq Tayta Dios rikumunankama.
51 Llaqtapi kaq llapallan sipaskunamantam
sonqoy waqachkan.
Ñawiykunapas nanay-nanay kanankamam
sonqoy waqachkan.
52 Alton pawaq animalta hinam
mana imamanta enemigoykuna hapiruwan.
53 Kawsachkaqllatam pozopi chinkarachin.
Chaypi kachkaptiymi rumiwan taparuwan.
54 Umaykamam yakupas pamparuwarqaraq
chaymi nirqani:
“Wañukusaqñam” nisparaq.
55 Dios Taytalláy,
qamtam qayakamullarqayki.
Pozopa ukumantaraqmi qayakamullarqayki.
56 Qayakamusqaytam uyariykullawarqanki.
“Ay,
ay” nimusqaytam chaskiykuwarqanki.
Mañakamusqaytam uyariykullarqanki.
57 Qayakamusqay punchawpim asuykamuwarqanki.
“Ama manchakuychu” nispam niykullawarqanki.
58 Señorlláy,
asuntoypim defiendeykuwarqanki.
Señorlláy,
vidallaytam libraykuwarqanki.
59 Qawarqankim ñakarisqayta Dios Taytalláy.
Qamyá allichaykapuway Dios Taytalláy.
60 Vengakuwanankupaq tukuy piensasqankutaqa yachankim.
Contraypi tukuy tanteasqankutaqa qamqa yachankim.
61 Dios Taytalláy,
uyarirqankim insultawasqankuta.
Uyarirqankim contraypi tukuy mana allin piensasqankuta.
62 Uyarirqankitaqmi contraypi hoqarikuqkunapa
rimasqankutapas.
Uyarirqankitaqmi tukuy tiempo contraypi
piensasqankutapas.
63 Qawariyá tukuy rurasqankupi burlakuwasqankuta.
Qawariyá ñoqamanta burlakuspa takisqankuta.
64 Dios Taytalláy,
paykunamanyá pagapuy.
Rurasqankuman hinayá qamqa pagapuy.
65 Paykunapa sonqonkutaqa rumiyarachiyá.
Paykunataqa ñakaykuy pasaypaqtayá.
66 Dios Taytalláy,
piñakuspaykiyá
qatikachay paykunataqa.
Kay pachapi qayllaykimantayá
chinkarachiy paykunataqa.