Jerusalen llaqtata Tayta Dios castigasqanmanta
2
¡Imaynanpimá Señorqa
Sion Moqopi sumaq llaqtataqa tutayarachin!
¡Imaynanpimá piñakuspanqa
Sion Moqopi sumaq llaqtataqa tutayarachin!
Cielomanta wischumuchkaq hinam wischumurqa
Israel casta runakunapa sumaqllaña llaqtanta.
Piñakusqan tiempopiqa manam yuyarirqachu
chakinpa samanan llaqtamanta.
2 Señorqa mana llakipayaspanmi millpuypaq-millpurun.
Jacob castakunapa llapallan wasitam millpurun.
Sumaq Juda nacionpi amparakunanku wasikunatam
ancha piñakuyninpi tuñirachin.
Gobiernasqan naciontam pampakamaraq humillarachin.
3 Señorqa anchata piñakuspanmi chinkarachin.
Israel castakunapa tukuy atiynintam chinkarachin.
Enemigopa qayllanpim yanapakuyninta karuncharachin.
Manañam munanchu yanapawaykuta.
Jacob castakunapa llaqtankunapim
lenguachkaq ninata ratarirachin.
Muyuriqninpi tukuy tarisqanta
ruparunanpaqmi ratarirachin.
4 Señorqa nacionpa enemigon hinam
flechana armanta alistarun.
Señorqa contranpi kaq hinam
alleq makinta alistarun.
Chinkarachinmi tukuy kuyayllapaq kaqkunata.
Ninata hinaraqmi kachaykurqa piñakuyninta.
Sumaq Sion llaqtamanmi kachaykurqa piñakuyninta.
5 Señorqa enemigo hina rikuriruspanmi
Israel castakunata millpuypaq-millpururqa.
Millpuchkaq hinamá
palacionkutapas millpuypaq-millpururqa.
Paykunapa amparakunan wasikunatam purmarachirqa.
Sumaq Juda nacionpi yachaqkunatam
anchallataña llakichispan waqachirqa.
6 Huertapi chukllata hinaraqmi
templontapas tuñirachin.
Payman asuykunanchik templotam
purmarachin.
Tayta Diosmi qonqarachin
Sion Moqopi fiestakunata.
Tayta Diosmi qonqarachin
samana punchawkunata.
Anchallataña piñakuspanmi
qepanchakurun reyta.
Anchallataña piñakuspanmi
qepanchakurun sacerdoteta.
7 Señorqa altarnintam qepanchakurun.
Señorqa santuariontam cheqnipakurun.
Llaqtapi palacionkunapa murallankunatam
qoykun enemigokunaman.
Tayta Diospa templonpim
fiesta punchawkunapi hinaraq qaparinku
runamasinkunaman.
8 Sion Moqopi sumaq llaqtapa murallan
tuñirachiytam Tayta Dios tantearun.
Tuñichinanpaq rimasqantam mana samaspa rurarun.
Llaqtapa hawa lawninpi murallatam qaparirachin.
Llaqtapa uku lawninpi murallatam qaparirachin.
Iskay lawnintam payqa tuñirachin.
9 Llaqtapa zaguanninkunam allpa ukupi chinkarun.
Punkupa cerrojonkunatam pasaypaqta pakiparun.
Chay llaqtapa reyninpas
huklaw nacionkunapiñam kachkan.
Chay llaqtapi kamachikuqkunapas
huklaw nacionkunapiñam kachkan.
Tayta Diospa yachachikuyninkunapas manam kanñachu.
Tayta Diosmanta willakuqkunapas
revelaciontam mana chaskinkuñachu.
10 Sion Moqopi sumaq llaqtapa ancianonkunam
pampapi tiyaspanku upallarunku.
Umankuman allpata maqchikuykuspankum
luto pachawan churakurunku.
Jerusalen llaqtamanta doncellakunam
pampakamaraq kumuykunku.
11 Ñawiykunapas waqaytam amirunña.
Ñoqapa ukuymi hukmanyarunña.
Llaqtamasiykuna hatun llakikuypi kasqanraykum
hukmanyasqallaña kachkani.
Warmachakunawan ñuñuq wawachakuna
plazakunapi wañunayasqankuraykum
hukmanyasqallaña kachkani.
12 Paykunam mañakuchkan
“Mamay ¿maytaq tantallapas?”
nispa.
“Mamáy ¿maytaq vinollapas?”
nispa.
Llaqtapa plazankunapim wañunayaspa tipiruchkankuña.
Mamankupa marqayninpim wañunayaspa pasaruchkankuña.
13 Yaw sumaqllaña Jerusalen llaqta
¿pitataq favornikipiqa rimachiyman?
Yaw sumaq Jerusalen llaqta
¿imamantaq qamtaqa tupachikiman?
Doncellaman rikchakuq Jerusalen llaqta,
qamta consuelanaypaqqa
¿ima ejemplotataq nikiman?
Lamar qocha hina ancha hatunmi
ancha tuñichisqa kaynikiqa.
¿Yaqachum kanman hampiqnikiqa?
14 Yanqa revelacionkunatam willasurqanki
chay llaqtapi Diosmanta willakuq tukuqkunaqa.
Mana allin rurasqaykikunata qawachisuptikiqa
manam presochasqaqa riwaqchu karqa.
Yanqa revelacionkunata willasuspaykim
creechisurqanki qamtaqa.
15 Ñanninta llapallan puriqkunam
qawarisuspayki taqllakunku.
Qam sumaq Jerusalen llaqtamantam
burlakusparaq silbakunku.
Umankutapas aywirisparaqmi
qanmanta kaynata ninku:
¿Kay llaqtatachum sutichanku
“Llapallan llaqtakunamantapas sumaq llaqtam
kay llaqtaqa” nispa?
¿Kay llaqtatachum sutichanku
“Kay pachapi llapallan nacionkunapa
kusikunan llaqta” nispa?
16 Llapallan enemigoykikunam
contraykipi rimapakunku.
Silbasuspaykiraqmi kirunkuta
kirichichispa ninku:
“Paytaqa millpuypaqyá-millpurusunchik.
Kay punchawtam anchallataña suyarqanchik.
Kayqaya kunanqa tariruspa rikuykunchik.”
17 Tayta Diosqa tanteasqantam rurarun.
Nisqanpi hinam payqa cumplirun.
Mana llakipayarispanmi tuñirachin.
Unaymantaraq kamachisqanpi hinam tuñirachin.
Payqa enemigoykikunatapas
qanmantam asirachin.
Contraykipi kaqkunatam venceypaqraq-vencerachin.
18 Sion Moqopi sumaq llaqtam
tukuy sonqonwan Señorman qayakun.
Sion Moqopi llaqtapa murallankuna,
tuta punchawyá waqasqaykipas mayu hinaña kallpachun.
Ñawikikunapas mana samaykuspayá waqachun.
19 Tutakuna hatarispaykiyá
horan-horanlla qayakuy.
Yaku kacharichkaq hinayá
sonqoykimanta Señorman willakuy.
Payman makikita hoqarispayá
warmachaykikuna kawsananpaq mañakuy.
Esquinakunapi yarqaymanta wañunayaq
warmachaykikunapaqyá mañakuy.
20 Qawariyá Dios Taytalláy.
¿Kaynatañaqa pitapas rurarqankichu?
¿Wachakusqankuta mikuqtaqa qawakunkichu?
¿Marqarisqankuta mikuqtaqa qawakunkichu?
¿Sacerdotekunataqa wañuchinqakuchu
santuarioykipi?
¿Qanmanta willakuqkunataqa wañuchinqakuchu
santuarioykipi?
21 Warmakunapiwan machuchakunam
callekunapa allpanpi wischurayachkanku.
Mozokunapiwan doncellaykunam
guerrapi wañusqa wichirunku.
Piñakusqayki punchawpim
paykunata wañurachinki.
Mana llakipayaspaykim
paykunata ñakarichinki.
22 Fiestapaq hinam
tukuy hinastinmanta huñuramurqanki.
Mancharichiqniykutam
tukuy hinastinmanta huñuramurqanki.
Dios Taytalláy,
piñakusqayki punchawpiqa
manam pipas lluptirqachu.
Dios Taytalláy,
piñakusqayki punchawpiqa
manam pipas puchurqachu.
Marqarisqaykunatam enemigoy wañurachin.
Uywasqaykunatam enemigoy wañurachin.