LAMENTACIONES SUTIYOQ LIBRO
Jerusalen llaqtarayku llakikusqanmanta
1
¡Imaynanpimá sapallanñaqa rikurirun
runakunawan hunta kaq llaqtaqa!
¡Imaynanpimá viuda hinaqa rikurirun
nacionkunapa ancha reqsisqan llaqtaqa!
¡Imaynanpimá debaldella llamkaqñaqa rikurirun
llaqtakuna gobiernaq llaqtaqa!
2 Tutankunam waqaypaq-waqapakuchkan.
Sutillam weqenkunapas uyanpi kachkan.
Kuyaqninkunapas manam consuelaykunkuchu.
Llapallankumantam mana consuelaykunkuchu.
Lliw amistadninkunapas traicionarunñam.
Paykunaqa rikurirun enemigonñam.
3 Juda nacionpi kaqkunam ñakariruspanña
chaynataq sasa llamkaykunapi karuspaña
nacionkunaman preso pusasqa rirqaku.
Huklaw nacionkunapiñam yachachkanku.
Mana samay tariqñam kachkanku.
Qatikachaqnin enemigonkunam hayparurqaku.
Ñakarisqankupim paykunataqa hayparurqaku.
4 Sion Moqoman riq ñankunam llakirayachkan
fiestankunaman manaña pipas risqankurayku.
Llapallan zaguanninkunam tuñichisqa kachkan.
Sacerdotenkunam “¡Ay,
ay!”
nispa waqachkanku.
Doncellankunapas llakikuymantam qaparichkanku.
5 Contranpi kaqkunam kamachiqninña rikurirun.
Enemigonkunam hawka kawsakuqña rikurirun.
Llumpay mana kasukuq kasqankuraykum
Tayta Dios llakichirqa paykunata.
Contrankupi kaqkunapa ñawpaqnintam
presota pusarqaku warmankuta.
6 Sion Moqopi sumaq llaqtapa
kuyayllapaq kayninqa tukurunñam.
Jefenkunapas kachkan
pastota mana tariq luwichukuna hinañam.
Qatikachaqninkupa ñawpaqnintapas
purirqaku mana kallpayoqñam.
7 Jerusalen llaqtayoqkunam humillachisqa kaspanku
ñawpaq watakunapi kapuqninkuta yuyarinku.
Runakunapa llaqtankunapi purispankum
ñawpaq watakunapi kapuqninkuta yuyarinku.
Contranpi kaqkuna venceruptinmi
mana pipas yanapaqninku karqachu.
Ñakarisqankuta qawaspankum
enemigonkuna asipayarqaku.
8 Jerusalen llaqtam huchallikurun llumpayllataña.
Chayraykum rikurirun llumpay despreciasqaña.
Llapallan alabaqninkunam kamipayachkanku.
Penqaymanta rikuruspam kamipayachkanku.
Chayraykum waqachkan penqakuymanta.
Chayraykum qepanchakurun penqakuymanta.
9 Qachanpas sutillam kachkan pachanpiqa.
Manam piensarqachu imam sucedenantaqa.
Vencerachikunmi admirakuypaqta.
Manam pipas qoykunchu consuelota.
Dios Taytalláy,
qawariwayá llakisqa kallasqayta.
Dios Taytalláy,
qawariyá enemigoypa hatunchakusqanta.
10 Jerusalen llaqtapa qori-qollqentam
contranpi kaqkuna lliw qechurun.
Huklaw nacionniyoq runakunam
chaypi santuarionman yaykurun.
Chay yaykuqkunatam
Jerusalen llaqta rikurun.
Dios Taytalláy,
chayna runakunaqa
manam yaykunanchu karqa
huñunakuynikimanpas.
Manamá kamachikurqankichu
chayman yaykunallankutapas.
11 Jerusalenpi yachaqkunam
“¡Ay,
ay!”
nistin mikuyta maskanku.
Kawsanankupaqmi kuyayllapaq kapuqninkuta
mikuypaq qochkanku.
Dios Taytalláy,
qawariwayá ñoqallayta.
Qawariyá kamisqa kallasqayta.
12 Kaynin puriqkunaqa
qawarispayá tanteariychik.
Llakikuyniy hinaqa
mana kasqantayá qawariychik.
Ancha piñakusqan punchawpi
Tayta Dios llakichiwasqantayá qawariychik.
13 Tayta Diosmi altomanta ninata kachamurqa.
Tulluykunata kañarunanpaqmi kachamurqa.
Purisqaypim toqllata hina churarurqa.
Chaywanmi kikinmanña kutirichiwarqa.
Purmarachiwaspanmi llakisqata saqeruwarqa.
Sapa punchawmi llakisqata saqeruwarqa.
14 Tukuy mana kasukuyniykunawanmi
yugowan hina kikinpuni wataruwan.
Chay yugota matankayman wataruptinkum
kallpayta tukuruwan.
Chay contraypi kaqkunaman Señor qoykuwaptinmi munaychakuruwan.
15 Señormi valeroso soldadoykunata
ñoqamanta karuncharurqa.
Akllasqay mozokunata tukurunanpaqmi
contraypi tropakunata huñuramurqa.
Uvas sarunapi hinam Señorqa
Juda nacionpi doncellakunata saruparurqa.
16 Yaw ñawilláy,
kaykuna pasawasqanwanmi waqachkani.
Yaw ñawilláy,
yakuta hinañam waqachkani.
Manam piyniypas kanchu consuelawaqniy.
Manam piyniypas kanchu kallpanchawaqniy.
Wawaykunam hukmanyasqaña kachkanku
enemigonku vencerusqanrayku.
17 Sion llaqtaqa makinkunatam haywarin.
Ichaqa manam kanchu pipas consuelaqnin.
Jacob castakunapa contranpim
Tayta Dios kamachikurqa.
Muyuriqninpi runakunatam
contrankupi kamachirqa.
Qayllankupim Jerusalenqa
despreciasqa rikurirqa.
18 Allin ruraqmi Tayta Diosqa.
Manam kasukurqanichu palabrankunataqa.
¡Llapallan runakuna,
uyariwaychik!
¡Ñakarisqaytayá qawariwaychik!
Doncellaykunatam presochaspa pusarunku.
Mozoykunatam presochaspa pusarunku.
19 Kuyaqniykunatam qayakurqani ñoqaqa.
Ichaqa traicionaruwankum paykunaqa.
Sacerdoteykunam kawsanankupaq mikuyta maskastin
wañurun chawpiypi.
Ancianoykunam kawsanankupaq mikuyta maskastin
wañurun chawpiypi.
20 Dios Taytalláy,
llakikuypi kasqaytayá qawariykuy.
Ukullaypa timpusqantayá qawarikuy.
Ñoqapa sonqollaymi ukullaypi tukukuruchkanña.
Mana kasukusqayraykum tukukuruchkanña.
Espadayoqkunam wawallaykunata callekunapi wañurachin.
Wasi ukupi kaqkunatapas lliwmi wañurachin.
21 “¡Ay,
ay!”
nisqaytam runakuna uyarirunku
ichaqa manam pipas consuelaqniy kanchu.
Ñakarisqaytam llapallan enemigoykuna yacharunku.
Chayna rurasqaykimantam paykunaqa kusikuchkanku.
Willasqayki tiempotayá chayachimuyña.
Ñoqa hina kanankupaqyá chayachimuyña.
22 Yuyariyá tukuy mana allin rurasqankuta.
Castigawarqankim mana kasukusqaymanta.
Paykunatapas castigayá chaynata.
Anchallañam “¡Ay,
ay!”
nispa waqasqayqa.
Anchallañam sonqoypa hukmanyasqanqa.