Tayta Dios llakipayarikunanpaq mañakusqankumanta
5
Dios Taytallayku,
sucedewasqankumantayá yuyariy.
Dios Taytallayku,
insultawasqankutayá qawariy.
2 Herenciaykupas forastero runakunapañam.
Wasiykupas mana reqsisqayku runakunapañam.
3 Mana taytayoq hinañam rikuriruniku.
Mamaykupas viudakuna hinañam rikurirunku.
4 Tomanayku yakutapas rantinikuñam.
Yantatapas rantiniku preciowanñam.
5 Qatikachawaqniykum hichpallaykupiña kachkanku.
Pisiparuptiykupas manaña samariqtam ruraruwanku.
6 Saksanaykukama mikunaykupaqmi Egipto nacion
runakunaman makillaykuta haywariniku.
Saksanaykukama mikunaykupaqmi Asiria nacion
runakunaman makillaykuta haywariniku.
7 Ñoqaykupa abueloykum huchallikuruspa chinkarunku.
Castigasqa kanankumantam ñoqaykuña ñakarichkaniku.
8 Sirvientekunapa munaychakusqanñam kachkaniku.
Manañam kanchu paykunamanta libraqniyku.
9 Yaqaña wañuymanpas chayaspam
mikunaykutapas apamuniku.
Chunniqpi peleaqkunamanta lluptistinmi
mikunaykutapas apamuniku.
10 Cuerpollaykupas nina hinaraqmi ruparichkan.
Yarqaymanta calenturawanmi chaynata ruparichkan.
11 Sion llaqtapi yachaq warmikunatam abusarqaku.
Juda nacion llaqtakunapi doncellakunatam abusarqaku.
12 Kamachikuqkunatam warkururqaku makinkumanta.
Paykunaqa manam respetarqakuchu yuyaqkunata.
13 Mozokunatam kutanankupaq churarunku.
Warmakunam yanta qepiwan tankikachanku.
14 Llaqtapa zaguanninpi ancianokunam manaña kanchu.
Mozokunapas tocanankutam manaña tocankuñachu.
15 Sonqoykupi kusikuyniykum chinkarun.
Tusuyniykupas llakikuymanñam tikrakurun.
16 Wichirunmi umaykupi coronaykupas.
¡Imaynaraq kasaqku huchallikusqaykumantapas!
17 Chayraykum sonqoykupas onqoq hinaña karun.
Chayraykum ñawiykupas pasaypaq tutayarun.
18 Sion Moqopi llaqtaqa purmarunñam.
Chaypiqa purichkan atoqkunallañam.
19 Dios Taytalláy,
qanmi ichaqa wiñaypaq gobiernanki.
Dios Taytalláy,
qamqa wiña-wiñaypaqmi gobiernanki.
20 ¿Imanasqataq pasaypaqtaqa qonqaruwankiku?
¿Imanasqataq unay tiempoqa saqeruwankiku?
21 Dios Taytalláy,
qanman kutirikunaykupaqyá kutirichiwayku.
Dios Taytalláy,
ñawpaq tiempopi kasqaykuman hinayá mosoqyachiwayku.
22 Qamqariki qepanchakuru wankikim pasaypaqta.
Contraykupim qamqa piñakurunki ancha-anchata.