Filistea runakunapa contranpi willakuymanta
47
Gaza llaqtata manaraq Faraon venceruchkaptinmi Filistea runakunapa contranpi paymanta willakuq Jeremiasman Tayta Dios kaynata nirqa:
2 Norte lawmantam
lloqlla hinaraq runakuna hamuchkan.
Llimparichkaq hatun mayu hinam
tropakuna hamuchkan.
Llapallan runakunam qayakunqaku.
Nacionkunapi yachaqkunam qaparinqaku.
3 Caballokunapa kallpasqanta uyarispankum,
carretakunapa qaparisqanta uyarispankum,
ruedankunapa bulla rurasqanta uyarispankum
taytakunapas churinkuta manaña yanapankuchu.
Manañam paykunaqa ima ruraytapas atinkuchu.
4 Filistea runakunata chinkachinankupaq
tiempom chayaramun.
Tiro llaqta yanapaq puchuqkunata
chinkachinanku tiempom chayaramun.
Sidon llaqtata yanapaq puchuqkunata
chinkachinanku tiempom chayaramun.
Filistea runakunatam
Tayta Dios chinkachinqa.
Creta islapi puchuqkunatam
Tayta Dios chinkachinqa.
5 Gaza llaqtayoqkunam llakikuymanta
uma chukchankuta rutukurunku.
Ascalon llaqtayoqkunam llakikuymanta
mana rimaqña rikurirunku.
Lamar qochapa patanpi puchuqkunaqa
¿haykapikamataq kuchupakunkichikqa?
6 “¡Ay Tayta Diospa kachamusqan espada!
¿haykapikamataq mana samankichu?”
nispam ninkichik.
“Yaw espada,
vainaykiman kutiykuy”
nispam ninkichik.
“Taniruspayá hawkaña kakuy”
nispam ninkichik.
7 ¿Imaynataqsi espadaqa samanman
Tayta Dios kamachichkaptinqa?
¿Imaynataqsi espadaqa samanman
“Ascalon llaqtata atacay”
nispa kamachichkaptinqa,
“Lamar qochapa patanpi llaqtakunata atacay”
nispa kamachichkaptinqa?