Moab nacionpa contranpi willakuymanta
48
Israelpa yupaychasqan Llapallan Kamachiq Tayta Diosmi Moab nacionpa contranpi kaynata nirqa:
¡Ay,
Nebo llaqtaqa
pasaypaq tuñichisqam kanqa!
Quiriataim llaqtaqa
vencesqam kanqa.
Pasaypaq penqayman churasqam kanqa.
Amparakunanku wasipas taqmasqam kanqa.
2 Moab nacionpi alabanapaq kaqkunam tukurunku.
Hesbon llaqtapim chaypa contranpi rimanakurunku.
Moab nacion chinkachisqa kananpaqmi rimanakurunku.
Madmen llaqta,
qampas chunnichisqam kanki.
Guerrapi wañunaykipaq amenazasqam kanki.
3 Horonaim llaqtapi runakunam
qaparispa nichkanku.
“Llaqtaykuqa pasaypaq tuñichisqam
kachkan” nispam nichkanku.
4 Moab nacionqa tuñichisqañam kachkan.
Warmachankunapa qaparisqanmi uyarikuchkan.
5 Luhit cuestatam waqastin richkanku.
Horonaim llaqtaman uraykuqkunam
llakikuymanta waqachkanku.
6 Vidaykichikta salvanaykichikpaqyá ayqekuychik.
Chunniqpi wiñaq sachacha hinayá kaychik.
7 Moab castakunaqa rurasqaykichikpim hapipakurqankichik.
Moab castakunaqa kapuqnikichikpim hapipakurqankichik.
Qamkunaqa pasaypaq vencesqamá kankichik.
Quemos sutiyoq taytachaykichiktapas
presochasqatam apanqaku.
Sacerdotekunatawan kamachikuqkunatapas
presochasqatam pusanqaku.
8 Sapa llaqtamanmi tuñichiqkuna hamunqaku.
Manam mayqan llaqtapas puchunqaku.
Qechwankunatapas pasaypaqtam chunnichinqaku.
Alto patak pampakunatam purmachinqaku.
Ñoqa Tayta Diospa nisqaypi hinam purmachinqaku.
9 Moab nacionmanyá rapranta qoychik.
Pawakunanpaqyá rapranta qoychik.
Chaypi llaqtakunapas purmachisqam kanqa.
Mana runayoq kanankamam chunnirunqa.
10 Ñakasqayá kachun Tayta Diospa
kamachisqanta qellapakuywan ruraq runaqa.
Ñakasqayá kachun wañuchinanpaq
kamachisqa kachkaspan mana wañuchiq runaqa.
11 Moab nacionniyoq runakunaqa
qallariyninmantapunim hawkalla kawsakurqaku.
Paykunaqa manam haykapipas
presochasqaqa rirqakuchu.
Urpupi qonchunkama mana kuyuchisqa
vino hinam paykunaqa kanku.
Chayraykum gustonpas hinalla kachkan.
Chayraykum asnayninpas hinalla kachkan.
12 Chayraykum ñoqa Tayta Dios nini:
Hamuq punchawkunapim
kachamusaq urpukuna taqtaqkunata.
Mana imayoq kanankamam taqtarunqa pasaypaqta.
Chay urputaqa pakiparunqam pasaypaqta.
13 Moab nacionmi penqarikunqa.
Quemos sutiyoq taytachanmantam penqarikunqa.
Israel castakuna hinam penqarikunqa.
Betel llaqtapi taytachamantam penqakurqaku.
Confiakusqanku taytachamantam penqakurqaku.
14 Moab nacionqa amañayá nichunchu:
“Valeroso soldadokunam kaniku” nispaqa.
Moab nacionqa amañayá nichunchu:
“Guerrapi peleaq tropakunam kaniku” nispaqa.
15 Moab nacionmi tuñichisqa kanqa.
Llaqtankunam atacasqa kanqa.
Akllasqa mozonkunam wañuchisqa kanqa.
Reywan sutichasqa Tayta Diosmi chaynata nini.
Llapallan Kamachiq Tayta Diosmi chaynata nini.
16 Moab nacionpa sasachakuyninmi hichpamuchkanña.
Hatun desgraciapi rikurirunanmi utqamuchkanña.
17 Moab nacionpa vecinonkunapas
chay nacionmantayá waqaychik.
Ancha reqsisqa kasqan yachaqkunapas
chay nacionmantayá waqaychik.
“¡Pakisqa vara hinam
atiyniki rikurirun!”
nispayá niychik.
“¡Pakisqa tawna hinam
sumaq kayniki rikurirun!”
nispayá niychik.
18 Sumaq Dibon llaqtapi yachaqkuna,
ancha reqsisqa kaynikimantayá uraykamuy.
Chaki pampapiña tiyanaykipaqyá uraykamuy.
Moab nacionta chunnichiqmi hamurunqaña.
Amparakunayki torrekunatam tuñirachinqaña.
19 Aroer llaqtapi yachaqkuna,
ñanpa patanpi sayaykuspayá qawariychik.
Lluptikuq qarikunatayá tapuychik.
Ayqekuq warmikunatayá tapuychik.
“¿Imataq sucedekun?”
nispayá tapuychik.
20 Moab nacionqa penqaypim kachkan.
Moab nacionqa mancharisqam kachkan.
Paymanta llakikuspayá qaparkachaychik.
Paymanta llakikuspayá willakuychik.
Arnon Mayupa patanpi kaqkunamanyá nimuychik.
“Moab nacionqa tuñichisqañam” nispayá nimuychik.
21 —Alto patak pampakunapi llaqtakunapa contranpi sentenciasqanmi cumplikurqa,
chay llaqtakunam karqa:
Holon,
Jahaza,
Mefaat,
22 Dibon,
Nebo,
Bet-diblataim,
23 Quiriataim,
Bet-gamul,
Bet-meon,
24 Queriot hinaspa Bosra.
Cumplikurqataqmi Moab nacionpa hichpanpi kaq hinaspa karu lawpi kaq llaqtakunapa contranpipas.
25 Tayta Diosmi nin:
Toropa waqran kuchusqa hinam
Moab nacionpa kallpanqa tukurunña.
Runapa makin pakikuruq hinam
Moab nacionpa atiyninqa tukurunña.
26 Tayta Diospa contranpi
hatunchakusqanraykuyá
Moab nacionta machachiychik.
Vomitasqanpi qochpanankamayá
Moab nacionta machachiychik.
Paymantaqa llapallanku
burlakunankukamayá
Moab nacionta machachiychik.
27 Moab nacion ¿manachum qampas
Israel castamanta burlakurqanki?
¿Manachum hapirachikuq
suwakunamanta hina burlakurqanki?
Sapa kuti rimaspaykiqa
¿manachum paykunata despreciarqanki?
28 Moab nacionpi yachaqkunaqa
llaqtakunamantayá lloqsiychik.
Moab nacionpi yachaqkunaqa
qaqakunapiñayá yachaychik.
Qaqa patanpi qesachakuq
paloma hinañayá yachaychik.
29 Moab nacion orgullosa
kasqantaqa uyarirqanchikmi.
Pay tukuspa hatunchakuq
kasqantaqa uyarirqanchikmi.
Runa tukuspa yachaq tukuq
kasqantaqa uyarirqanchikmi.
30 Ñoqa Tayta Diosmi kaynata nini:
Yanqapaq rabiakusqantaqa reqsinim.
Mana valeq alabakusqantaqa reqsinim.
31 Chayraykum qaparkachasaq
Moab nacionmanta.
Chayraykum qaparisaq
lliw Moab nacionmanta.
“¡Ay,
ay!”
ninqakum Kir-hares yachaqkunamanta.
32 Sibma lawpi uvas huertalláy,
qanmantaqa waqasaq
Jazer llaqtaymantapas astawanraqmi.
Kallmaykikunapas chayarun qochapa patankamaraqmi.
Jazer llaqta qochapa patankamaraqmi chayarun.
Purmachiqkunam frutaykitawan uvasnikita tukurun.
33 Moab nacion huertakunapi
kusikuymanta qapariytam tukusaq.
Uvas saruna pozopipas vinotam chinkarachisaq.
Takiwan uvas saruqkunapas manañam kanqachu.
Kusikuymanta qapariypas manañam kanqachu.
34 Hesbon llaqtapi yachaqkunam qaparichkan.
Eleale llaqtakamam waqasqankuqa uyarikuchkan.
Jahaza llaqtakamam qapariyninkuqa uyarikurun.
Zoar llaqtamanta Horonaim llaqtakamam uyarikurun.
Eglat-selisiya lawkamam chay qaparisqankuqa chayarun.
Nimrim Wayqokunapi pukyukunaqa lliwmi chakirun.
35 Tayta Diosmi nin:
Ñoqam chinkarachisaq Moab castakunata.
Ñoqam chinkarachisaq moqokunapi capillakunata
chaynataq moqokunapi
animal kañaqkunatapas,
taytacha-mamachakunaman
incienso kañaqkunatapas.
36 Chayraykum qena hinaraq
sonqoy waqachkan Moab runakunamanta.
Chayraykum qena hinaraq
sonqoy waqachkan Kir-hares llaqtayoqkunamanta.
Waqachkanimá tukuy ima huñusqanku chinkarusqanmanta.
37 Lliw runapa chukchantam paqlarunku.
Lliw runapa barbantam ruturunku.
Llapallankum makinkuta ikipakurunku.
Llapallankum luto pachawan churakurunku.
38 Ñoqa Tayta Diosmi nini:
Moab runakunatam ñutuypaq-ñutupachkani.
Mana valeq allpa mankata hinam ñutupachkani.
Chayraykum Moab nacionpa
llapallan altosninkunapi waqayllaña uyarikuchkan.
Chayraykum Moab nacionpa
llapallan plazankunapi waqayllaña uyarikuchkan.
39 Moab nacionmantayá qaparkachaychik.
Taqmaparusqa kasqanmantayá qaparkachaychik.
Penqakuymantam pasaypaqña qepanchakurun.
Muyuriqnin nacionkunapa
ancha burlakunanñam rikurirun.
Muyuriqnin nacionkunapa
mancharikunanñam rikurirun.
40 Tayta Diosmi nin kaynata:
Moab nacionpa contranpim
enemigonkuna hamunqaku.
Raprankunatapas mastarispa
pawaykuchkaq anka hinaraqmi atacanqaku.
41 Llaqtakunapas enemigopa dueñochakusqanmi kanqa.
Amparakuna sitiokunapas vencesqam kanqa.
Chay punchawpiqa Moab nacionniyoq valerosokunapa
sonqonmi hukmanyarunqa.
Wachakuywan ñakariq warmi hinaraqmi
paykunaqa rikurirunqa.
42 Manaña nacion kananpaqmi
Moabqa pasaypaq chinkachisqa kanqa.
Ñoqa Tayta Diospa contraypi
hatunchakusqanraykum chinkachisqa kanqa.
43 Ñoqa Tayta Diosmi kaynata nini:
Moab runakunaqa monte animalkuna
hapiqkunapa mancharichisqan hinam kanqaku.
Pozomanpas otaq toqllamanpas wichiykuchkaq
animalkuna hinam kanqaku.
44 Ñoqa Tayta Diosmi kaynata nini:
Manchakuymanta lluptiqkunam
pozoman wichiykunqaku.
Pozomanta lluptiqkunam
toqllaman wichiykunqaku.
Moab runakunata castiganay tiempota
chayachimuptiymi chayna kanqaku.
45 Wakin runaqa mana kallpayoqñam lluptirunku.
Hesbon llaqtapi amparakunankupaqmi lluptirunku.
Ichaqa Hesbon llaqtamantam nina lloqsirun.
Sehonpa llaqtanmantam lenguachkaq nina lloqsirun.
Moab naciontam kuchun-kuchun ruparun.
Chaqwa ruraqkunapa enteron nacionnintam ruparun.
46 ¡Imaynaraq kanki,
Moab nacion,
Quemos sutiyoq taytacha adoraq nacion!
Qari churikikunatam presochasqata pusarqaku.
Warmi churikikunatam presochasqata pusarqaku.
47 Chaywanpas tukupay tiempokunapim
kaqllamanta allinyachisaq.
Moab casta runakunatam
kaqllamanta allinyachisaq.
Ñoqa Tayta Diosmi chaynata nini.
Kaykamam Moab nacionpaq sentencia.