Egipto nacionpa contranpi Jeremiaspa rimasqanmanta
46
Tayta Diosmi paymanta willakuq Jeremiasman willarqa nacionkunapa contranpi.
2 Jeremiastamá rimapayarqa Egipto nacionpa contranpi otaq chay nacionniyoq Rey Faraon Necaopa tropankunapa contranpi.
Paymi kachkarqa Eufrates Mayupa patanpi kaq Carquemis llaqtapa hichpanpi.
Chay sitiopim Babilonia nacionpa reynin Nabucodonosor payta vencerurqa Josiaspa churin Joacim tawa watamanña Judá nacionpi gobiernachkaptin.
Egipto tropakunapa contranpimá nirqa:
3 Hatun harkachikuna armata alistaychik
peleaq rinaykichikpaq.
Taksa harkachikuna armata alistaychik
peleaq rinaykichikpaq.
4 Soldadokunaqa caballokunata montoraspayá
chaykunaman sillakuychik.
Cascowan umaykichikta harkachikuspayá
filaman churakuychik.
Qasqo harkachikunaykichikta churakuspayá
lanzaykichiktapas llipipipichiychik.
5 Ñoqa Tayta Diosmi nini:
Chaywanpas ¿imatataq ñoqaqa qawachkani?
Manchakuymanta kutirimuqkunatam qawachkani.
Soldadokunam vencerachikuspa cheqerunku.
Qepankutapas manaña qawarikuspam ayqekunku.
Mancharisqallañam llapallanku kachkanku.
6 Utqayllamanña kallpaqkunapas
manam lluptiyta atinkuchu.
Valeroso soldadokunapas
manam ayqeyta atinkuchu.
Norte law Eufrates Mayupa
hichpanpim mitkarunku.
Norte law Eufrates Mayupa
hichpanpim wichirunku.
7 ¿Pitaq wakqa Nilo Mayu hina
llimparistin hamuchkan?
¿Pitaq wakqa lloqlla mayu hina
kuyuyllaña-kuyumuchkan?
8 Egipto nacionmi Nilo Mayu hina
llimparistin hamuchkan.
Egipto nacionmi lloqlla mayu hina
kuyuyllaña-kuyumuchkan.
Egipto nacionmi nichkan:
“Mayu hina llimparispaymi
kay pachata taparusaq” nispa.
“Llaqtakunatam runantinta
pasaypaq tuñirachisaq” nispa.
9 Silladakunayá kallpachunku.
Carretayoqkunayá utqachunku.
Valerosokunayá lloqsichunku.
Harkachikuna hapiq
Cus nacionniyoq soldadokuna,
qamkunapas lloqsiychikyá.
Flecha manejaq
Lud nacionniyoq soldadokuna,
qamkunapas lloqsiychikyá.
10 Llapallan Kamachiq ñoqa Señor Diospa
punchawniymi chay punchawqa.
Enemigoykunamanta vengakunay
punchawmi chay punchawqa.
Espadam saksanankama mikuchkaq hina
runakunata wañuchinqa.
Espadam sinkanankama tomachkaq hina
runakunapa yawarninta usuchinqa.
Llapallan Kamachiq ñoqa Señor Diosmi
paykunataqa wañuchisaq.
Eufrates Mayupa patan norte lawpim
paykunataqa wañuchisaq.
11 Sipasman rikchakuq Egipto runakuna,
Galaad lawtayá riychik.
Chaypiyá hampita maskamuychik.
Yanqapaqñam apamuwaq
achka hampikunataqa.
Manañam sanoyachisunkiñachu
chay hampikunaqa.
12 Penqaypi kasqaykitaqa
llapallan nacionkunam yacharunkuña.
Qapariynikim enteron
kay pachamanpas huntarunña.
Valeroso runakunam saqmanakurunku
hinaspam iskayninku wichirunku.
Egipto runakunata Rey Nabucodonosor vencesqanmanta
13 Babilonia nacionpa reynin Nabucodonosor Egipto nacionta atacananpaq pasaruptillanmi paymanta willakuq Jeremiasta Tayta Dios rimapayaspan nirqa:
14 Egipto nacionpiyá willakuychik.
Migdol llaqtapiyá uyarichikuychik.
Uyarichikuychiktaqyá Menfis llaqtapipas.
Uyarichikuychiktaqyá Tafnes llaqtapipas.
“Puestoykichikpi kaspa
listolla kaychik” nispayá willakuychik.
“Muyuriqnikichikpim runakunata
espadawan wañuchichkanku” nispayá willakuychik.
15 Apis sutiyoq toro taytachaykiqa
¿imanasqataq lluptikurun?
Ñoqa Tayta Diosmi tuñirachirqani paytaqa.
Chay toro kaqlla taytachaykiqa
¿imanasqataq mana hinallapichu sayarun?
Ñoqa Tayta Diosmi
tuñirachirqani paytaqa.
16 Soldadoykikunam saqmanakurunku.
Wichiykuspankum ninakunku:
“Hatarispayá pasakusunchik.
Llaqtanchikmanyá kutirikusunchik.
Nacesqanchik nacionmanyá kutirikusunchik.
Wañuchiq guerramantayá lluptikusunchik.”
17 Chaypiyá kaynata sutichaychik:
“Egipto nacion Rey Faraonqa
alabancerollam” nispa.
“Payqa vencenanpaq kachkaspa
tiempo pasarachiqmi” nispa.
18 Llapallan Kamachiq Tayta Dios sutiyoqmi nini,
sutiyrayku juraq reymi nini:
Moqokunapa chawpinpi
Tabor Moqo hinaraqmi
enemigoykiqa qawapasllaña hamunqa.
Lamar qochapa hichpanpi
Carmelo orqokuna hinaraqmi
enemigoykiqa qawapasllaña hamunqa.
19 Egipto nacionniyoq runakuna,
qepikichiktayá alistakuychik.
Preso rinaykichikpaqyá alistakuychik.
Menfis llaqtam
chunnichisqa kanqa.
Mana runayoq kananpaqmi
kañasqa kanqa.
20 Kuyayllapaq vaquilla hinam
Egipto nacionqa.
Ichaqa norte lawmanta
hamuq tankayllum kachurunqa.
21 Pagasqa soldadokunapas
wirayachisqa torokuna hinam kachkanku.
Enemigonkuta qepanchakuruspam lluptikunqaku.
Manaña aguantayta atispankum lluptikunqaku.
Desgraciapi kananku punchawmi chayaramun.
Castigasqa kananku tiempom chayaramun.
22 Lluptichkaq culebra hinaraqmi
silbakustin lluptinqaku.
Enemigo tropakunaqa
sacha kuchuqkuna hinaraqmi hichpamunqaku.
23 Ñoqa Tayta Diosmi nini:
Manaña yaykuy atina montepi
sachakunatam kuchunqaku.
Manaña yupay atinam kachkanku.
Aqarway uru hinañam kachkanku.
24 Sipasman rikchakuq Egipto nacionniyoq runakunam
penqaypi rikurinqaku.
Norte law runakunamanmi
entregasqa kanqaku.
25 Israelpa yupaychasqan Llapallan Kamachiq Tayta Diosmi nin:
—Tebas llaqtapi Amon sutiyoq taytachankutam castigasaq.
Castigasaqtaqmi reyninku Faraontapas,
Egipto nacionniyoq runakunatapas,
taytacha-mamachankutapas,
wakin reyninkutapas chaynataq Faraonpi hapipakuqkunatapas.
26 Ñoqa Tayta Diosmi nini:
Ñoqam qoykusaq wañuchiy munaqnin enemigonkunaman otaq Babilonia nacionpa reynin Nabucodonosormanwan serviqninkunaman.
Chaywanpas Egipto nacionpiqa ñawpaq tiempokunapi hinam runakuna kaqllamanta yachanqaku.
Runankunata Tayta Dios salvananmanta
27 Serviqniy Jacobpa castankuna,
qamkunaqa amayá manchakuychikchu.
Israelpa mirayninkuna,
qamkunaqa amayá hukmanyaychikchu.
Karu nacionkunamantam libramusqaykichik.
Miraynikichiktawan kuskatam libramusqaykichik.
Preso risqaykichik nacionmantam libramusqaykichik.
Hinaptinmi kaqllamanta
hawkalla yachakunkichik.
Manaña pipapas manchachisqanmi
hawkallaña kankichik.
28 Ñoqa Tayta Diosmi nini:
Serviqniy Jacobpa castankuna,
qamkunawan kasqayraykuyá
ama manchakuychikchu.
Cheqerachiptiy chayasqaykichik nacionkunatam
pasaypaqta chinkarachisaq.
Qamkunataqa manam chinkachisqaykichikchu.
Faltakusqaykichikman hinam castigasqaykichik.
Castiganaymantaqa manam lluptiwaqchikchu.