Jerusalen llaqtapa huchallikusqanmanta
5
Tayta Diosmi nin:
Jerusalenpa callenkunapiyá puriramuychik.
Allinta qawamuspayá maskaramuychik.
Tapukamuychikyá plazankunapipas.
Icharaqpas tarimuwaqchik pillatapas.
Allin arreglaq runa kaptinqa
Jerusalen llaqtatam pampachasaq.
Cheqap kaqta maskaq runa kaptinqa
Jerusalen llaqtatam pampachasaq.
2 Ñoqa kawsaq Diosrayku juraspankuqa
engañanankupaqmi juramentanku paykunaqa.
3 Dios Taytalláy,
qamqa cheqap ruraq runatam maskanki.
Runaykikunatam castigarqanki.
Ichaqa manam paykunataqa nanarqachu.
Puramintitam azoterqanki.
Ichaqa manam corregikuyta munarqakuchu.
Rumimantapas aswanraqmi sonqonkuta rumiyarachinku.
Allin kawsakuyman kutirikamuytaqa manam munarqakuchu.
4 Chaymi piensarqani
comun runalla kasqankupaq.
Chaymi piensarqani
loco runaña kasqankupaq.
Tayta Diospa munasqanman hina
kawsaytaqa manam yachankuchu.
Diosninkupa leyninkunataqa
manam yachankuchu.
5 Reqsisqa runakunamanmi risaq.
Paykunawan parlaqmi risaq.
Paykunaqa Tayta Diospa
munasqanman hina kawsaytam yachanku.
Paykunaqa Diosninkupa leyninkunatam yachanku.
Yugota toro pakipachkaq hinam
Diospa contranpi lliw hoqarikururqaku.
Coyundanta toro tipachkaq hinam
Diospa contranpi lliw hoqarikururqaku.
6 Chayraykum montemanta lloqsimuq leon
paykunata wañurachinqa.
Chunniq qechwamanta hamuq lobo animalmi
paykunataqa tukurunqa.
Uturungum llaqtankutapas wateqanqa.
Chay llaqtakunamanta lloqsimuqkunatam tisaparunqa.
Llumpay mana kasukuqmi rikurirurqaku.
Achka-achka kutitam Diosmanta rakikururqaku.
7 Tayta Diosmi nin:
¿Imaraykutaq pampachaykiman
churikikuna qepanchakuwachkaptinqa
chaynataq churikikunapas
taytacha-mamachakunarayku jurachkaptinqa?
Saksanankukama mikuchichkaptiypas
paykunam saqeruwanku.
Chuchumika warmipa wasinmanmi
tropanpi pasakunku.
8 Yegua montaq potro hinaraqmi
sapakama weqeqeqenku.
Runamasinpa warminta qatispam
sapakama weqeqeqenku.
9 Tayta Diosmi kaynata nin:
Chaykuna rurasqankumantaqa
¿manachum castigasaq?
Chayna ruraq naciontaqa
¿manachum vengakusaq?
10 Uvas huertaman yaykuspayá
enemigonku kuchuparuchun.
Ichaqa amayá pasaypaqtachu kuchuparuchun.
Llullu kallmankunatayá rachupachunku.
Paykunaqa manañam uvas huertayñachu kachkanku.
11 Tayta Diosmi nin:
Israel nacionpi runakunam
traicionaruwan —nispa.
Juda nacionpi runakunam
traicionaruwan —nispa.
Castigasqa kanankumanta
12 Paykunaqa Tayta Diosta negaspam nirqaku:
Payqa manam imanawasunchu.
Manam ima castigopas hamuwasunchu.
Guerrapas manam hamuwasunchu.
Yarqaypas manam hamuwasunchu.
13 Diosmanta willakuqkunapas
wayra hinallam kachkanku.
Manam Diospa palabrantachu
paykunaqa rimachkanku.
Rimasqankuman hinayá paykunaqa kachunku.
14 Llapallan Kamachiq Tayta Diosmi nin:
Chayna rimasqankuraykum
palabraykuna rimasqayki nina hina kanqa.
Paykunañataq yanta hina kaptinkum
rimasqayki ruparunqa.
15 Tayta Diosmi nin:
Israel castakuna,
contraykichikpim karumantaraq runakunata pusamusaq.
Valeroso runakunatam ñoqaqa pusamusaq.
Paykunaqa ñawpaq runakunapa castankunam.
Paykunaqa rimayninkupas
mana yachasqayki runakunam.
Paykunaqa rimapayasuptikipas
mana entiendesqayki runakunam.
16 Flechankunam wañuchiqpuni armakuna.
Llapallankum valeroso soldadokuna.
17 Cosechaykikunatam tukurunqaku.
Mikunaykikunatam mikurunqaku.
Churikikunatam wañurachinqaku.
Ovejaykikunatawan vacaykikunatam mikunqaku.
Uvas plantaykikunatawan
higos sachaykikunatam kuchuparunqaku.
Guerrawanmi murallakunata tuñichinqaku.
Confiakusqayki murallasqa llaqtaykikunatam
tuñichinqaku.
18 Tayta Diosmi nin:
—Chaywanpas chay punchawkunapiqa manaraqmi pasaypaqtachu tukurusqaykichik.
19 Sichu pipas tapusunkiman:
“¿Imanasqataq yupaychasqanchik Tayta Diosqa tukuy kaykunataqa rurawarqanchik?”
nispa,
hinaptinqa qanmi ninki kaynata:
“Tayta Diosta qepanchakuspaykichikmi nacionnikichikpipas taytacha-mamachakunata adorarqankichik chaymi mana reqsisqaykichik runakunataña servinkichik huklaw nacionkunapi.”
Juda nacionta anyasqanmanta
20 Jacob castamanyá willamuychik.
Juda nacionpiyá uyarichimuychik.
21 Yaw mana yachayniyoq runakuna,
yaw mana entiendeq runakuna,
qamkunaqa qawakuchkaspapas manam rikukunkichikchu.
Qamkunaqa uyarichkaspapas manam kasukunkichikchu.
22 Ñoqa Tayta Diosmi nini:
¿Manachum ñoqata respetawankichik?
Qayllaypiqa ¿manachum katkatatankichik?
Lamar qochapa patantam churarqani linderonpaq,
chaynapi wiñaypaq decretoman hina
mana pasananpaq.
Olankuna hoqarikuspapas
manam pasayta atinmanchu.
Mancharikuypaqta qaparispapas
manam pasayta atinmanchu.
23 Qamkunaqa rumi sonqo
mana kasukuqmi kankichik.
Ñoqamanta rakikuruspaykichikmi
pasakurqankichik.
24 Qamkunaqa manam yuyaymanarqankichikchu:
“Yupaychasqanchik Tayta Diostayá
respetasunchik” nispallapas.
“Tarpuypipas poqoypipas parachimuqtayá
respetasunchik” nispallapas.
“Cosecha tiempo qowaqninchiktayá
respetasunchik” nispallapas.
25 Mana allinkuna rurasqaykichikmi
chaykunamanta karuncharusunkichik.
Huchaykichikkunam chay allin kaqkunamanta
chinkarachisunkichik.
26 Runaykunawanmi kachkan
mana allin ruraq runakuna.
Runaykunawanmi kachkan hapirunanpaq wateqaqkuna.
Paykunawanmi kachkan
toqllata churaspa runamasin hapiruqkuna.
27 Imaynam jaulakunata urpitukunawan huntachinku,
chaynam wasinkutapas qechusqankuwan huntachinku.
Chayraykum apuyaruspanku
ancha atiyniyoq rikurirunku.
28 Wirayaruspankum
lluchkay-lluchkay uyayoq kachkanku.
Manaña yupay atinam kachkan
mana allinkuna rurasqanku.
Mana piyniyoqkunatapas
manam paykunaqa valechinkuchu.
Wakchakunapa asuntontapas
manam paykunaqa defiendenkuchu.
29 Ñoqa Tayta Diosmi kaynata nini:
Chaykuna rurasqankumantaqa
¿manachum castigasaq?
Chayna ruraq naciontaqa
¿manachum vengakusaq?
30 Mancharikuypaq kaqkunam
kay nacionpi kachkan.
Hukmanyanapaq kaqkunam
kay nacionpi kachkan.
31 Ñoqamanta willakuqkunam
llullallata rimanku.
Sacerdotekunam
munasqankuman hinalla gobiernanku.
Runaykuna,
qamkunapas
chaytataqmi munankichik.
Tukupay tiempo chayamuptinqa
¿imatataq rurankichik?