Wanakunankupaq anyasqa kasqankumanta
4
Tayta Diosmi nin:
Israelpa mirayninkuna,
kutirikamuyta munaspaqa
ñoqamanmi kutirikamunaykichik.
Ñoqamanta ama rakikuspayá
millakuypaq taytacha-mamachaykichikta wischuychik.
2 Cheqapta rimaspam sutiyrayku jurankichik.
Allin arreglota ruraspam sutiyrayku jurankichik.
Allinkunata ruraspam sutiyrayku jurankichik.
Ñoqa kawsaq Tayta Diosraykum jurankichik.
Chaynapim nacionkuna ñoqarayku bendecisqa kanqaku.
Chaynapim nacionkuna ñoqarayku alabakunqaku.
3 Juda nacionpi runakunamanmi
Tayta Dios kaynata nin,
Jerusalen llaqtapi runakunamanmi
Tayta Dios kaynata nin:
Barbechaychikyá
mana tarpusqaykichik chakrakunatapas.
Amañayá tarpuychikchu
kichkakunapa kasqanpipas.
4 Juda nacionpi runakuna,
yupaychasqaykichik ñoqa Tayta Diospaqyá señalakuychik.
Jerusalen llaqtapi runakuna,
yupaychasqaykichik ñoqa Tayta Diospaqyá señalakuychik.
Chaynatayá sonqoykichiktapas señalakuychik.
Yanqañataq mana allinkuna rurasqaykichikmanta
nina hina piñakuyniy ratarirunman.
Yanqañataq mana allinkuna rurasqaykichikmanta
mana pipapas amachay atinan rikurirunman.
Juda nacion atacasqa kananmanta
5 Willakamuychik Juda nacionpi kaqkunaman.
Willakamuychik Jerusalen llaqtapi kaqkunaman.
Cornetata tocaspa enteron nacionpi nimuychik.
“Huñunakusunchik” nispayá qayakamuychik.
“Murallasqa llaqtakunamanyá ayqekusunchik.”
6 ¡Sion Moqopi llaqta lawman hoqariychik banderata!
¡Ama sayaspa maskaychik amparakunaykichik sitiota!
Norte lawmantam apamuchkani castigota.
Chaylawmantam apamuchkani hatun desgraciata.
7 Leon lloqsimuchkaq hinam lloqsiramunña.
Nacionkuna purmachiqmi
campamentomanta puririmuchkanña.
Nacionnikichikta chinkachinanpaqmi
maymi kasqanmanta lloqsiramunña.
Yachanaykichik llaqtakunam karunqa purmachisqaña.
Yachanaykichik llaqtakunam karunqa mana runayoqña.
8 Chaynaqa luto pachawanyá pachakuychik.
Chaynaqa qaparkachaspayá waqaychik.
Imaynam ruparichkaq nina mana taninchu,
chaynam Tayta Diospa piñakuyninpas
contranchikpi mana taninchu.
9 Tayta Diosmi nin:
Chay punchawpiqa reywan jefekunam
manaña valorniyoq rikurinqaku.
Sacerdotekunam mancharisqallaña kanqaku.
Ñoqamanta willakuqkunam hukmanyarunqaku.
10 Chaymi ñoqa nirqani:
¡Ay,
Señor Dioslláy!
Anchallatañam engañarunki kay runakunata.
Anchallatañam engañarunki
Jerusalenpi runakunata.
“Hawkallam kankichik” nirqankim paykunata
aswanqa kunkankupi cuchillo hinaraqmi
guerra hayparun paykunata.
11 Chay tiempopim kay runakunata nisaq,
Jerusalen llaqtapi runakunatam nisaq:
“Chunniqpi orqokunamantam rupaq wayra pukumuchkan.
Runaykunapa kasqanmanmi chay wayra pukumuchkan.
Ichaqa manam trigo wayrachinapaq hina wayrachu.
Ichaqa manam trigo limpianapaq hina wayrachu.
12 Chay wayramantapas
aswan nisyu wayrataraqmi pukuchimusaq.
Kunanmi paykunapa contranpi
sentenciaykunata rimarisaq.”
Juda nacionpa contranpi enemigo hamusqanmanta
13 Qawariychik,
enemigoykichikmi
puyu hinaraq hamuchkan.
Sinchi wayra hinaraqmi
guerrapaq carretankupas hamuchkan.
Ankatapas llalliriqraqmi
caballonkupas hamuchkan.
¡Imaynaraq kasunchik!
¡Wañuymi hayparamuwanchik!
14 Jerusalen llaqtapi runakuna,
sonqoykichikmanta limpiaychik
mana allinkunata.
¿Haykapikamataq yuyaymanankichik
chay mana allinkunata?
15 Dan llaqtamantam
noticiata willakamuchkan.
Efrain orqokunamantam
desgracia uyarikamuchkan:
16 Nacionkunamanyá willamuychik.
Jerusalenpi kaqkunamanyá nimuychik:
“Llaqtapa muyuriqninmanta atacaqkunam
karu nacionmantaraq hamuchkanku.
Juda nacion llaqtakunapa contranpi
qaparispam hamuchkanku.
17 Chakrakuna cuidaqkuna hinaraqmi
Jerusalenpa muyuriqninpi churakurunqaku.
Chaynam kanqaku mana kasuwasqankurayku.
Ñoqa Tayta Diosmi chaynata nini.
18 “Mana allin kawsasqaykimantam
kaykunaqa sucederusunki.
Mana allin rurasqaykimantam
kaykunaqa sucederusunki.
Mana allinkuna rurasqaykipa pagonmi kayqa.
Sonqoykita pasaypaq llakichiqmi kayqa.”
Llaqtamasinkunarayku Jeremiaspa waqasqanmanta
19 ¡Ay,
sonqollaymi tukukuruchkanña!
¡Ay,
sonqollaymi tukukuruchkanña!
Puramintita pampanyaspanmi tukukuruchkanña.
Cornetapa waqasqanta uyarispaymi
manaña upallalla kayta atinichu.
Peleaqkunapa qaparisqanta uyarispaymi
manaña upallalla kayta atinichu.
20 Chaylla-chaylla desgracia pasakusqanmantam
noticiakuna chayamuchkan.
Enteron nacion purmachisqa kasqanmantam
noticiakuna chayamuchkan.
Qonqaymantam karpaykunapas purmachisqaña.
Huk ratollapim toldoykunapas purmachisqaña.
21 ¿Haykapikamaraq guerrapaq banderata qawasaq?
¿Haykapikamaraq cornetapa waqasqanta uyarisaq?
22 Tayta Diosmi nin:
Mana yachayniyoq runakunam runaykunaqa.
Mana reqsiway munaq runakunam paykunaqa.
Sonso churikunam paykunaqa.
Mana ancha entiendeq runakunam paykunaqa.
Paykunaqa mana allinkuna ruranankupaqmi
yachaysapallaña kachkanku.
Allinkuna ruranankupaqmi ichaqa
mana imapas yachaq kachkanku.
Hamuq punchawkunapi castigokunamanta
23 Kay pachata qawariptiymi
manaña formayoq kachkasqa.
Kay pachata qawariptiymi
manaña imayoq kachkasqa.
Cielokunata qawariptiymi
manaña achkiyniyoq kachkasqa.
24 Orqokunata qawariptiymi katkatatachkasqaku.
Qawariptiymi llapallan moqokunapas kuyuchkasqaku.
25 Qawariptiymi
runakunaqa manaña kasqañachu.
Alton pawaq animalkunapas
lluptikuspankum manaña kasqañachu.
26 Qawariptiymi
tukuy imapa wiñanan allpapas
chunnichkasqaña.
Qawariptiymi
chaypi kaq llapallan llaqtakunapas
tuñirusqaña.
Chaykunaqa pasachkasqa Tayta Diospa qayllanpim.
Chaykunaqa pasachkasqa ancha piñakusqa Diospa qayllanpim.
27 Tayta Diosmi nin:
Enteron kay naciontam purmachisaq.
Ichaqa manam pasaypaqtachu chinkachisaq.
28 Chaykuna sucedekuptinmi
kay pacha lutokunqa.
Chaykuna sucedekuptinmi
cielokuna tutayarunqa.
Rimasqaymantaqa manam cambiasaqchu.
Ruranaypaq kasqaymantaqa
manam qepaman kutisaqchu.
29 Silladakunapa qapariyninwanmi
llaqta runakuna lluptikunku.
Flechaqkunapa qapariyninwanmi
llaqta runakuna lluptikunku.
Montekunamanñam yaykurunku.
Qaqakunamanñam seqarunku.
Llapallan llaqtakunatam saqerunku.
Manaña runayoqtam saqerunku.
30 Yaw llaqta,
tuñichisqañam kachkanki.
¿Imapaqñataq guindo pachawanpas pachakunki?
¿Imapaqñataq ñawikikunatapas yanawan pintakunki?
Chaykunawan allichakuynikiqa yanqapaqñam.
Kuyaqnikikunaqa qepanchakurusunkiñam.
Maskasuchkankiqa wañuchisunallaykipaqñam.
31 Wachakuq warmi nanaywan qapariqta hinam uyarini.
Chayllaraq wachakuq warmipa qapariyninta hinam uyarini.
Sion Moqopi llaqtam qaparichkan.
Samatyaspam makinkunata hoqarichkan:
“¡Ay,
imallapiraq rikukuni!”
nispa.
“¡Runa wañuchiqkunaraykum
hukmanyasqa kachkani!”
nispa.