Jerusalen llaqtata enemigo atacasqanmanta
6
Benjaminpa mirayninkuna,
Jerusalen llaqtamantayá lluptiychik.
Benjaminpa mirayninkuna,
Tecoa llaqtapiyá cornetata tocaychik.
Bet-haquerem llaqtachapiyá
señalta hatarichiychik.
Norte lawmantam castigo hamuchkan.
Llumpa-llumpay desgraciam hamuchkan.
2 Pisi kallpayoq doncellaman rikchakuq
Sion Moqopi llaqtatam purmarachisaq.
Sumaqllaña doncellaman rikchakuq
Sion Moqopi llaqtatam purmarachisaq.
3 Michiqkunam hamunqaku
Jerusalen llaqtapa contranpi.
Ovejankutam churanqaku
kay llaqtapa contranpi.
Karpankutam sayachinqaku llaqtapa contranpi.
Sapakamam ovejankuta michinqaku.
4 Paykunapa enemigonkum ninqaku:
“Alistakuychik paykunapa contranpi peleananchikpaq.
Hatariychik chawpi punchawta atacamunanchikpaq,
aswanqa intipas seqaykuchkanñam.
Aswanqa tutayaypas hawanchikpiñam.
5 Chaynaqa hatarispayá
tutanña atacamusunchik.
Chaynaqa hatarispayá
palacionkutapas tuñichimusunchik.”
6 Llapallan Kamachiq Tayta Diosmi nin:
Sachakunata kuchumuychik.
Jerusalen murallapa qepanman
allpata montomuychik.
Kay llaqtaqa
castigasqañam kachkan.
Kay llaqtapiqa
daño rurayllañam kachkan.
7 Imaynam chiri yakuta pozo waqaychan,
chaynam Jerusalenpas mana allinllata waqaychan.
Daño rurayllañam chaypiqa uyarikuchkan.
Ñakarichiyllañam chaypiqa uyarikuchkan.
Chaypiqa qawachkani onqoqkunallatañam.
Chaypiqa qawachkani heridasqa kaqkunallatañam.
8 Yaw Jerusalen llaqta,
qamqa corregikuyñayá.
Yanqañataq piñakuspay saqeruykiman.
Yaw Jerusalen llaqta,
qamqa corregikuyñayá.
Yanqañataq chunniqman tikraruykiman,
yanqañataq manaña runayoqta rikurirachikiman.
Castigasqa kanankumanta
9 Llapallan kamachiq Tayta Diosmi nin:
Qalay-qalay uvasta maskapachkaq hinam
maskapanqaku Israel casta puchuqkunata.
Uvasta cosechaq runa maskapachkaq hinayá
maskapay Israel casta runakunata.
10 Chaymi ñoqa nirqani:
¿Pi uyariwananpaqtaq rimasaq?
—nispa.
¿Pi uyariwananpaqtaq willakusaq?
—nispa.
Dios Taytalláy,
paykunaqa mana uyarikuqñam kachkanku.
Paykunaqa mana atiendeqñam kachkanku.
Dios Taytalláy,
palabraykimantapas penqakuqkunam kachkan.
Manañam gustonkupaqñachu kachkan.
11 Dios Taytalláy,
qampa rabiakuynikiwanmi rabiasqa kachkani.
Manaña aguantay atiqmi kachkani.
Chaymi Tayta Dios niwarqa:
Callepi warmakunamanyá maqchichkaq hina
rabiakuyniymanta willakamuy.
Huñunasqa mozokunamanyá maqchichkaq hina
rabiakuyniymanta willakamuy.
Qosakunatam warmintinta presochanqaku.
12 Ancha yuyaq machuchakunatam presochanqaku.
Wasinkupas,
chakrantinmi hukpaqña kanqa.
Paykunapa warminkupas hukpaqñam kanqa.
Kay nacionpi yachaqkunata castigaptiymi
chaynaqa kanqa.
13 Apuyayllamanñam qokurunku warmakunapas.
Apuyayllamanñam qokurunku yuyayniyoqkunapas.
Engañakuqllañam rikurirunku
sacerdotekunapas.
14 Runaykunapa heridantam
mana kaqpaq hina hapinku.
Manaña hawkayay kachkaptinpas:
“Hawkallam kakusunchik” nispam ninku.
15 Millakusqaykunata rurasqankumantaqa
penqakunanku kachkaptinpas manam penqakunkuchu.
Penqakuytaqa manam yachankuchu.
Chayraykum ñoqa Tayta Dios nini:
Paykunata castigasqay tiempopim wañunqaku.
Wañuchisqakunawan kuskam wañusqa wichinqaku.
Israel castapa mana kasukusqankumanta
16 Tayta Diosmi nin runankunata:
Ñankunapi sayaykuspayá qawariychik.
Ñawpaq ñankunamantayá tapurikuychik.
Allin ñanmantayá tapurikuychik,
hinaspayá chayninta puriychik.
Chaynata ruraspaqa samaytam tarinkichik.
Aswanqa paykunam ninku:
“Manam puriymankuchu” nispanku.
17 Tayta Diosqa nintaqmi:
Churarqanim llaqta cuidaqkunata —nispa.
Kasukuychik cornetapa waqasqanta —nispa.
Ichaqa paykunam nirqaku:
“Manam kasukuymankuchu” nispanku.
18 Chaymi ñoqa Tayta Dios nini:
Nacionkuna,
uyariychik runaykunataqa imam pasananta.
Testigokuna,
uyariychik runaykunataqa imam pasananta.
19 Yaw allpa pacha,
uyariy qampas.
Testigo hina uyariy qampas.
Ñoqaqa runaykunamanmi
kachamusaq castigota.
Mana allinkuna piensasqankumantam
apachimusaq castigota.
Palabraykunataqa manam atienderqakuchu.
Yachachisqaykunataqa manam kasukurqakuchu.
20 ¿Imanasaqtaq Saba nacionmanta apamusqaykichik inciensotaqa?
¿Imanasaqtaq karu nacionmantaraq apamusqaykichik especeriataqa?
Lliwta kañapuwasqaykichik animalkunataqa
manañam munanichu.
Wakin ofrendakunatapas
manañam munanichu.
21 Chayraykum ñoqa Tayta Dios nini:
Mitkanankupaq trancata churaruptiymi
kay runakuna urmarunqaku.
Tayta-mamakunam churi-wawankuwan kuska urmarunqaku.
Vecinokunam amistadninkunapiwan kuska wañunqaku.
Norte lawmanta hamuspa atacaqkunamanta
22 Tayta Diosmi kaynata nin:
Norte lawmantam tropakuna hamuchkan.
Karu-karu allpamantam
ancha atiyniyoq nacion alistakamuchkan.
23 Flechanankutam lanzakunatawan apamunqaku.
Pasaypaq mana llakipayakuq cruel runakunam kanqaku.
Lamar qocha hinaraqmi qaparinqaku.
Caballokunapi sillasqam chaylla sayanqaku.
Sion Moqopi llaqtapa contranpi peleanankupaqmi
chaylla sayanqaku.
24 Jerusalen llaqtapi runakunam ninku:
Noticiatam uyariniku.
Manaña kallpayoqmi kachkaniku.
Wachakuq warmi hinaraqmi kachkaniku.
Llakiwan hapichikuqllañam kachkaniku.
25 Chakrakunamanqa amañayá lloqsiychikchu.
Ñannintaqa amañayá puriychikchu.
Enemigoqa ancha armasqam kachkan.
Mancharikuymi tukuy hinastinpi kachkan.
26 Llaqtamasillaykuna,
luto pachawanyá churakuychik.
Llaqtamasillaykuna,
uchpapiyá qochpaychik.
Piwi wawanmanta waqaq warmi hinayá qaparkachaychik.
Saqueaqkunam qonqaymanta chayaramuwasunchik.
27 Qamtaqa torre hina kanaykipaqmi churarqayki.
Runaykunata pruebanaykipaqmi churarqayki.
Paykunata reqsinaykipaqmi ñoqaqa churarqayki.
Imaynam kawsasqankuta qawanaykipaqmi churarqayki.
28 Paykunaqa llapallankum mana kasukuq runakuna.
Paykunaqa llapallankum cuento qepi runakuna.
Bronce hina pisi valeqllam paykunaqa.
Fierro hina pisi valeqllam paykunaqa.
Llapallankum daño ruraqlla paykunaqa.
29 Metalkuna chullunanpaqmi pukutyachina.
Titita chulluchinapaqmi chaynata rurana.
Chaynata ruraptiypas
mana allin ruraqkunaqa manam chinkanchu.
Runaykuna ukumantam
paykunaqa mana chinkanchu.
30 Wischupakusqa qollqewanñam sutichasqa kachkanku.
Ñoqa Tayta Dios wischupakusqayraykum
chaynaqa kachkanku.