Mana kasukuqkunata Dios castigananmanta
65
Tayta Diosmi kaynata nin:
Mana imapas mañakuqniykunam asuykamuwarqa.
Mana maskaqniykunam ñoqata tariwarqa.
Ñoqata mana imapas mañakuq nacionmanmi nirqani:
“Kaypim kachkani” nispaymi nirqani.
2 Sapa punchawmi makiykunata haywarayarqani.
Mana kasukuq runakunamanmi haywarayarqani.
Mana allin kawsaq runakunamanmi haywarayarqani.
3 Kay runakunam chaylla-chaylla piñachiqniy runakuna.
Paykunam huertakunapi animalkuna ofreceq runakuna.
Paykunam ladrillo altarkunapi kañaspa ofreceq runakuna.
4 Paykunam tiyanku sepulturakunapi.
Paykunam achikyanku pakasqa machaykunapi.
Paykunam mikunku kuchi aychata.
Yanukunkum millakuypaq caldokunata.
5 Paykunam ninku:
“Chayllapi sayay.
Ama asuykamuwaychu” nispa.
“Qanmantapas pasaypaq sapaqchasqam kani.
Ama hapiwaychu” nispa.
Chay runakunaqa senqay seqsichiq qosni hinam.
Chay runakunaqa tukuylla punchaw rataq nina hinam.
6 Qayllaypi qellqasqam kachkan tukuy kaykunaqa.
Manam qasillallaqa kaymanchu,
pagasaqmi paykunamanqa.
Pagasaqtaqmi merecesqankuta paykunamanqa.
7 Ñoqa Tayta Diosmi nini:
Pagasqaykichikmá mana allin rurasqaykichikmanta.
Pagasqaykichikmá abueloykichikpa mana allin rurasqanmanta.
Paykunam inciensota kañarqaku orqokunapi.
Paykunam insultawarqaku moqokunapi.
Ñawpaq rurasqankumantam pagasaq
paykunamanqa merecesqankutam pagasaq.
Bendecinanpaq Tayta Dios prometesqanmanta
8 Tayta Diosmi kaynata nin:
Runam uvaspa rurunkuna ukupi zumosapa uvasta tarispa
nin:
“Amaraq chay uvas plantata kuchuychu.
Chaypiqa allinraqmi kachkan” nispa.
Chaynatam ñoqapas serviqniykunawan rurasaq.
Manam paykunamantaqa pasaypaqchu chinkachisaq.
9 Mirachisaqmi Jacobpa mirayninkunata.
Juda casta runakunam dueñochakunqa orqoykunata.
Akllakusqaykunam chay allpata dueñochakunqa.
Serviqniykunam chaypi yachanqa.
10 Saron Qechwapim oveja hatuskuna kanqa.
Acor Qechwapim ganadokuna samanqa.
Maskaqniy runakunapaqmi chayna kanqa.
11 Ñoqamanta karunchakuqkunatam,
sapaqchasqay orqomanta qonqaqkunatam,
allin suerte apamuq Gad sutiyoq taytachaman
mikuy qoqkunatam,
allin destino apamuq Meni sutiyoq mamachaman
vino serviqkunatam
12 ñoqapas citaykichik guerrapi wañunaykichikpaq.
Qamkunam kumuykunkichik wañuchisqa kanaykichikpaq.
Qayaptiymi mana contestawarqankichikchu.
Rimapayaptiymi mana kasuwarqankichikchu.
Qawachkaptiymi mana allinta rurarqankichik.
Mana gustasqaytam qamkuna akllarqankichik.
13 Chayraykum ñoqa Señor Dios kaynata nini:
“Serviqniykunaqa mikusqam kanqaku.
Qamkunañataqmi yarqaymanta kankichik.
Serviqniykunaqa yakutam tomanqaku.
Qamkunañataqmi yakumanta kankichik.
Serviqniykunaqa kusisqam kanqaku.
Qamkunañataqmi penqaypi rikurinkichik.
14 Serviqniykunaqa kusisqam takinqaku.
Sonqonkupi kusisqa kasqankuraykum takinqaku.
Qamkunam ichaqa llaki sonqoyoq qaparkachankichik.
Qamkunam ichaqa ancha llakisqa waqankichik.
15 Akllakusqaykunamanmi qonkichik sutikichikta.
Chay sutikichikta rimaspam ñakanqaku runakunata.
Ñoqa Señor Diosmi wañuchisqaykichik qamkunata.
Serviqniykunamanmi churasaq huk sutita.
16 Pipas kay nacionta mañakuspaqa
confianapaq Diosmantam mañakunqa.
Pipas kay nacionpi juramentaspaqa
confianapaq Diosraykum juramentanqa.
Ñawpaq ñakariykunaqa qonqasqañam kanqa.
Chaykunaqa qayllaymantam chinkasqaña kanqa.
17 Ñoqam unanchasaq mosoq cielokunata.
Ñoqam unanchasaq mosoq allpata.
Punta kaqkunaqa kanqa qonqasqañam
chaynataq mana pipapas yuyarisqanñam.
18 Anchata kusikuychik ñoqapa unanchasqaywan.
Wiñaypaq kusikuychik ñoqapa unanchasqaywan.
Jerusalen llaqtatam unanchasaq chay llaqtapi kusikuy kananpaq.
Chaypi runakunatam unanchasaq wakinkuna kusikunankupaq.
19 Kikiypunim anchata kusikusaq Jerusalen llaqtarayku.
Kikiypunitaqmi kusikusaq runaykunarayku.
Chay llaqtapiqa manañam waqaqkunata uyarinqakuñachu.
Chay llaqtapiqa manañam llakimanta qaparinqakuñachu.
20 Manañam chaypiqa wañunqakuñachu
nacesqalla wawakunaqa.
Chaypiqa manam kanqañachu
watanku mana cumpliq paya-machukunaqa.
Pachak watanpi wañuqkunaqa
mozollaraqmi kanqa.
Manaraq pachak watanpi wañuq huchasapa runaqa
Diospa ñakasqanmi kanqa.
21 Wasikunatam hatarichinqaku
hinaspam chaypi yachanqaku.
Uvas huertakunatam plantanqaku
hinaspam rurunta mikunqaku.
22 Wasikunatam hatarichinqaku
ichaqa manam sapaq runakuna yachananpaqñachu.
Uvas huertakunatam plantanqaku
ichaqa manam sapaq runakuna rurun mikunanpaqñachu.
Sachakuna hinam runaykunaqa
una-unay watakunata kawsanqa.
Akllakusqaykunaqa
llamkasqankunapa ruruntam horqonqa.
23 Llamkanqakupas manañam yanqapaqchu.
Churinkupas manañam nacenqaku desgraciapaqchu.
Paykunaqa Tayta Diospa bendecisqan miraykunam.
Mirayninkunapas Tayta Diospa bendecisqan runakunam.
24 Manaraqpas mañakamuwachkaptinkum
paykunata ñoqa contestasaq.
Manaraqpas rimayta tukuchkaptinkum
paykunata ñoqa uyarisaq.
25 Ñoqa Tayta Diosmi nini:
Atoqwan malta ovejam kuskanku mikunqa.
Bueyes hinam leonpas pajataña mikunqa.
Culebrapas allpatañam mikunqa.
Sapaqchasqay orqopiqa manañam daño ruraqqa kanqachu.
Chaypiqa manañam purmachiq runapas kanqachu.