64
Amalaya tela llikichkaq hina cielokunata kicharimuwaq.
Amalaya lloqsimuchkaq hina kay pachaman uraykamuwaq.
Amalaya orqokunapas qayllaykipi katkatatananpaq uraykamuwaq,
2 chaynapi kichkakunapi ratariruspa
yaku timpuchiq nina hina kanaykipaq,
chaynapitaq enemigoykikunapas sutikita reqsinanpaq
hinaspa nacionkuna qayllaykipi katkatatananpaq.
3 Manchakuypaq kaqkunata ruraspaykim,
mana suyasqayku kaqkunata ruraspaykim
kay pachaman uraykamurqanki.
Chaynataqmi orqokunatapas katkatatachirqanki.
4 Ñawpaqmantapunim mana pipas uyarirqachu.
Ñawpaqmantapunim mana pipas kasukurqachu.
Ñawpaqmantapunim mana pipas rikurqachu
qam hina huk dios kasqantaqa
otaq qampi confiakuqkunapaq rurasqaykitaqa.
5 Qamqa yanapanaykipaqmi tupachikunki
kusisqa allin ruraqkunawan.
Qamqa yanapanaykipaqmi tupachikunki
munasqaykita hina kawsayta yuyariqkunawan.
Qamqa piñasqam kachkanki huchallikusqaykurayku.
Chaywanpas rurasqaykiraykum wiñaypaq salvasqa kaniku.
6 Ñoqaykuqa llapallaykum
millakuypaq runa hina kachkaniku.
Llapallan allinkuna rurasqaykupas
latapa hinam kachkan.
Warmipa yawarpakuyninwan
qachachasqa latapa hinam kachkan.
Qawiruspa wichisqa rapikuna hinam kachkaniku.
Mana allinkuna rurasqaykupa apasqanmi kachkaniku.
7 Qayakusuqnikiqa manam pipas kanchu.
Hapipakamusuqnikiqa manam pipas kanchu.
Qanmá pakakururqanki ñoqaykumanta.
Vencerachiwarqankikum mana allin rurasqaykumanta.
8 Chaywanpas Dioslláy,
taytaykum kunanqa kanki.
Ñoqaykuqa mitu hinam kallaniku.
Qanmi ichaqa manka ruraq hina kanki.
Llapallaykum qampa rurasqayki kallaniku.
9 Dios Taytayku,
amayá llumpaytaqa piñakuychu.
Mana allin rurasqaykutaqa amayá wiñaypaqqa yuyariychu.
Qawariwaykuyá ñoqaykutaqa.
Yuyariyá runaykikuna kasqaykutaqa.
10 Sapaqchasqa llaqtaykikunam chunnichkan.
Sion Moqopi llaqtam chunnichkan.
Jerusalen llaqtam tuñichisqa kachkan.
11 Qampaq sapaqchasqa temploykum
kañasqa kachkan.
Abueloykupa alabasunayki suma-sumaq temploykum
kañasqa kachkan.
Llapallan kuyasqayku kaqkunam
purmachisqa kachkan.
12 Chayna kachkaptinqa
¿manachum imallatapas ruranki
Dios Taytalláy?
Chayna kachkaptinqa
¿upallallachum kakunki
Dios Taytalláy?
¿Llumpa-llumpaytachu ñakarichiwankiku
Dios Taytalláy?