Tayta Diospa vengakunan tiempomanta
63
¿Pitaq wak hamuchkan Edom nacion lawmanta?
¿Pitaq wak hamuchkan Bosra llaqta lawmanta?
Puka tiñisqa pachayoqmi hamuchkan.
¿Pitaq wak sumaqllaña pachayoq hamuchkan?
Kallpasapallañam puristin hamuchkan.
Ñoqam hamuchkani allin ruraq kasqayman hina.
Ñoqam hamuchkani atiyniywan salvanaypaq hina.
2 ¿Imaynanpitaq pukaqa kachkan pachaykiqa?
¿Imaynanpitaq uvas saruqpa pachan hinaqa?
3 Ñoqaqa sapallaymi uvas sarunapi sarumurqani.
Mana pipapas yanapasqanmi sarumurqani.
Ancha rabiasqam ñoqaqa sarumurqani.
Ancha piñasqam ñoqaqa sarutyamurqani.
Uvaspa zumonmi pachayman pawaykamuwan.
Uvaspa zumonmi pachayta lliw qachacharamuwan.
4 Tanteachkarqanim vengakunaypaq.
Tiempom chayaramunña runaykunata reclamanaypaq.
5 Qawarirqanim,
ichaqa manam pipas yanapaqniy karqachu.
Admirasqam karqani,
ichaqa manam pipas kallpanchaqniy karqachu.
Atiyllaymi salvacionta rurarqa.
Piñakuyniymi kallpanchaqniy karqa.
6 Piñakuyniywanmi saruparqani runakunata.
Rabiaspaymi sinkachirqani paykunata.
Pampamanmi usuchirqani yawarninkuta.
Israel castapaq Tayta Diospa kuyapayakuyninmanta
7 Ñoqam Tayta Diospa kuyapayakuyninmanta yuyachini.
Alabasqa kananpaq rurasqankunamantam yuyachini.
Favorninchikpi llapallan rurasqanmantam yuyachini.
Israel castakunapaqmi achka allinkunata rurarqa.
Ancha llakipayakuyninman hinam favorecewarqa.
Ancha kuyapayakuyninman hinam favorecewarqa.
8 Diosmi nirqa:
Paykunaqa runaykunam,
nispa.
Paykunaqa mana llullakuq churiykunam,
nispa.
Tayta Diosmi paykunapa salvaqnin karqa.
9 Runankunapa tukuy ñakarisqankunapim paypas ñakarirqa.
Diospa qayllanpi kaq angelmi salvarqa paykunata.
Diosmi kuyakuyninpi llakipayaspan reclamarqa paykunata.
Hoqarispanmi paykunata marqarikuykurqa.
Ñawpaq tiempokunapim chaynallata rurarqa.
10 Aswanqa paykunaqa manam kasukurqakuchu payta.
Llakichirqakutaqmi Chuya Espiritunta.
Chayraykum paykunata enemigakururqa.
Paykunapa contranpiñam pelearqa.
11 Paykunam yuyarirqaku ñawpaq tiempokunamanta.
Yuyarirqakum Moisesmantawan runankunamanta.
Hinaspam paykunaqa tapunakurqaku:
¿Maypitaq kachkan
lamar qochamanta salvaq Diosqa?
¿Maypitaq kachkan
michiqninkunatawan ovejankunata salvaq Diosqa?
¿Maypitaq kachkan Moisesman
Chuya Espiritun qoq Diosqa?
12 ¿Maypitaq kachkan
Moisesta yanapananpaq admirakuypaq atiyninta kachamuqqa?
¿Maypitaq kachkan runankunapa
qayllanpi lamar qocha kichariqqa?
Payqa wiñaypaq reqsisqa kananpaqmi rurarqa.
13 ¿Maypitaq kachkan
lamar qocha ukunta paykuna pusamuqqa?
Chunniqpi puriq caballokunata hinam
mana lluchkachispa purichirqa.
14 Tayta Diospa Espiritunmi paykunata samachirqa.
Orqomanta pampaman uraykamuq ganadota hinam samachirqa.
Dios Taytalláy,
chaynatam qampas runaykikunata pusarqanki.
Chaynapim ancha reqsisqata kikillayki rurakurqanki.
Tayta Diospa yanapakuyninta mañakusqankumanta
15 Dios Taytáy,
qawarimuy hanaq pachamanta.
Dios Taytáy,
qawarimuy chuya sitiopi kasqaykimanta.
Dios Taytáy,
qawarimuy kanchariq sitioykimanta.
¿Maypitaq kachkan ancha kuyakuynikiqa?
¿Maypitaq kachkan ancha atiynikiqa?
Asllayarunñam allin sonqo kayniki.
Asllarayunñam ñoqaykupaq llakipayakuyniki.
16 Abueloyku Abraham manaña reqsiwaptinkupas
qanmi Taytayku kanki.
Abueloyku Israel manaña reqsiwaptinkupas
qanmi Taytayku kanki.
Ñawpaqmantapunim Libraqniyku sutiyoq kanki.
17 Dios Taytalláy
¿imanasqataq saqeruwankiku pantaruspa,
munasqaykiman hina manaña kawsanaykupaq?
Dios Taytalláy ¿imanasqataq sonqoykuta rumiyarachinki
qamtapas manaña respetanaykupaq?
Kutimuwaykuyá kay serviqnikikunarayku.
Kutimuwaykuyá kay qampa kaq Israel ayllukunarayku.
18 Sapaqchasqayki runaykikunaqa
manam unaypaqchu allpaykuta dueñochakurqaniku.
Ñoqaykupa enemigoykum santuarioykita sarutyarurqaku.
19 Qampa manaña gobiernasqayki hinam kachkaniku.
Manaña haykapipas sutikiwan sutichasqa hinam kachkaniku.