Jerusalen llaqtaraykum mana qasillasaqchu,

chaynapi allinkuna rurasqayki kancharinankama,

chaynapi salvacionniki ratachkaq mechero hina kanankama.

2 Nacionkunam qawanqa salvasqa kasqaykita.

Llapallan runakunam qawanqa reqsisqa kasqaykita.

Mosoq sutiwan sutichasqam kanki.

Kikin Tayta Diospa sutichasqanmi kanki.

3 Suma-sumaq corona hinam

kanki Tayta Diospa makinpi.

Reypa uma wankin hinam

kanki yupaychasqanchik Diospa makinpi.

4 Manañam “Saqerusqa Llaqta” nisunkiñachu.

Allpaykitapas manam “Purmachisqa Allpa” ninqakuñachu.

Aswanqa “Diospa Kuyasqan” nispam sutichasunki.

Aswanqa “Casarasqa Warmi” nispam sutichasunki.

Chaynataqa sutichasunki

Tayta Diospa ancha kuyasqan kasqaykiraykum.

Chaynataqa ninqaku

allpaykipas casarasqa warmi hina kasqanraykum.

5 Mozom casaran doncella sipasta.

Chaynatam churikikunapas hatallisunki qamta.

Imaynam novio kusikun novianwan.

Chaynatam Diosnikipas kusikun qanwan.

6 Jerusalen llaqta,

murallaykipa hawanpim churarqani cuidasuqnikitaqa.

Tuta punchawmi mana upallanqakuchu paykunaqa.

Tayta Diosmanta yuyariqkuna,

amayá samaychikchu qamkunaqa.

7 Tayta Diostaqa amayá

qasillallataqa saqeychikchu.

Jerusalen llaqtata hatarichinankamayá

ama saqeychikchu.

Enteron kay pachapi Jerusalen llaqta

alabasqa kanankamayá ama saqeychikchu.

8 Tayta Dios juraspanmi kaynata nirqa,

llumpay atiyninrayku juraspanmi nirqa:

Kawsaynikikunataqa manañam qosaqchu.

Enemigoykikuna mikunanpaqqa manañam qosaqchu.

Forasterokunaqa manañam vinoykita tomanqachu.

Anchata llamkaspa vino rurasqaykitaqa manañam tomanqachu.

9 Aswanqa kikikichikmi cosechaspa mikunkichik.

Mikuspaykichiktaqmi ñoqa Tayta Diosta alabawankichik.

Uvasta cosechaspam vinota tomankichik.

Santuarioypa pationkunapim tomankichik.

10 Lloqsiychik,

lloqsiychik zaguanninta.

Runakunapaq allichaychik ñanta.

Ñanta sumaqta kichaychik.

Ruminkunata sumaqta wischuychik.

Qawanankupaq altopi sayachiychik banderata.

Llapallan nacionkuna qawananpaq sayachiychik banderata.

11 Tayta Diosmi kay pachapi kaynata uyarichin.

Enteron kay pachapi kaqkunamanmi kaynata uyarichin:

Sion Moqo llaqtapi kaqkunamanyá niychik.

Salvaqnin chayaramusqanmantayá willaychik.

Tayta Diosmi runankunata pusamuchkan.

Llamkasqanpa pagontam pusamuchkan.

12 Runankunatam:

“Tayta Diospaq Sapaqchasqakuna”

nispa sutichanqaku.

Runankunatam:

“Tayta Diospa librasqankuna” nispa sutichanqaku.

Jerusalen llaqtatam sutichanqaku “Anchallaña Munasqa Llaqta” nispa.

Jerusalen llaqtatam sutichanqaku “Manaña saqesqa llaqta” nispa.