Israel nacionta Tayta Diospa favorecenan tiempomanta
61
Señor Diospa Espiritunmi ñoqapi kachkan.
Tayta Diosmi aceitewan talliwaspan sapaqchawarqa.
Wakchakunaman allin noticiata willakunaypaqmi sapaqchawarqa.
Llakisqakunata consuelanaypaqmi kachamuwarqa.
Presochasqa kaqkunaman willaspay libranaypaqmi kachamuwarqa.
Carcelpi kaqkunata kacharinaypaqmi kachamuwarqa,
2 chaynapi Tayta Diospa agradonpaq watamanta willakunaypaq,
chaynapi yupaychasqanchik Diospa vengakunan punchawmanta willakunaypaq,
chaynapi llapallan llakisqakunata consuelanaypaq,
3 chaynataq Sion Moqopi llakisqakunata kusichinaypaq,
chaynataq umankupi kaq uchpapa rantinpi
suma-sumaq coronataña qonaypaq,
chaynataq llakisqa kasqankupa rantinpi
kusikunanku aceitewanña tallinaypaq,
chaynataq hukmanyasqa kaqkunatapas
alabanapaq pachawan pachachinaypaq.
Paykunataqa:
“Allinkuna Ruruq Encina Sachakuna”
nispam sutichanqaku.
Paykunataqa:
“Tayta Diospa Sumaq Kayninta
Qawachinankupaq Plantasqakuna” nispam sutichanqaku.
4 Mosoqmantam hatarichinqaku
ancha ñawpaqmantaraq tuñichisqa sitiokunata.
Mosoqmantam hatarichinqaku
ñawpaq tiempopi purmachisqakunata.
Mosoqyachinqakum tuñichisqa llaqtakunata.
Mosoqyachinqakum ñawpaq miraykunapa purmachisqankunata.
5 Forasterokunam michinqa ovejaykichikkunata.
Mana reqsisqaykichik runakunam
llamkanqaku chakraykichikkunata.
Mana reqsisqaykichik runakunam
llamkanqaku uvas huertaykichikkunata.
6 “Tayta Diospa Sacerdotenkuna” nispam sutichasqa kankichik.
Yupaychasqanchik Diospa Serviqninkunawan sutichasqam kankichik.
Wakin nacionkunapa kapuqninkunatam mikunkichik.
Paykunapa reqsisqa kayninwanmi alabakunkichik.
7 Penqachisqa kasqaykichikpa rantinpim
runaykunaqa doble herenciata chaskinkichik.
Penqayman churasqa kasqaykichikpa rantinpim
runaykunaqa herenciaykichikpiña kusikuymanta qaparinkichik.
Chayraykum nacionnikichikpi doble herenciata chaskinkichik.
Hinaptinmi qamkunaqa wiñaypaq kusikunkichik.
8 Ñoqa Tayta Diosqa allin arreglotam kuyani.
Suwakuqkunatawan mana allin ruraqkunatam cheqnini.
Confiakunaykichik kaspaymi rurasqaykichikmanta pagasqaykichik.
Wiñaypaq contratotam qamkunawan rurasunchik.
9 Qampas miraynikikunapiwanmi reqsisqa kankichik nacionkunapi.
Willkaykichikpas reqsisqam kanqaku runakuna ukupi.
Llapallan qawaqninkunam reqsinqaku.
“Tayta Diospa bendecisqan miraykuna” nispam ninqaku.
10 Anchatam kusikuni Tayta Diosrayku.
Kusikunim yupaychasqay Diosrayku.
Alli-allin pachawan churachichkaq hinam
salvacionwan churachiwarqa.
Suma-sumaq pachawan churachichkaq hinam
allin ruraywan churachiwarqa.
Uma wankunta sacerdote churakuchkaq hinam
noviopas coronanta churakun.
Chaynatam Tayta Dios adornawarqa.
Alhajankunawan novia churakuchkaq hinam
ñoqatapas Tayta Dios adornawarqa.
11 Imaynam plantachakuna allpamanta wiñan,
imaynam muhupas huertapi wiñan,
chaynatam Tayta Dios allin ruraykunata wiñachinqa.
Chaynatam lliw nacionkunawan Tayta Dios alabachikunqa.