Jerusalen llaqta ancha kanchariq kananmanta
60
Tayta Diosmi nin kaynata:
Jerusalen llaqta,
wischurayasqanmanta hatarichkaq hinayá hatariy.
Kanchariyniki chayamusqanraykuyá kanchariy.
Tayta Diospa kanchariynin achikyamususqaykiraykuyá kanchariy.
2 Tutayaymi tapaykunqa kay pachata.
Tutayaymi llantuykunqa nacionkunata.
Aswanqa Tayta Diosmi hawaykipi achikyanqa.
Tayta Diospa kanchariyninmi hawaykipi rikurinqa.
3 Nacionkunam hamusunki kanchaynikiman.
Reykunam hamusunki achikyaynikipa kanchariyninman.
4 Qamqa muyuriqnikitayá qawariy.
Llapallanku huñunasqa qanman hamuqtayá qawariy.
Karukunamantam qari churikikuna hamusuchkanki.
Warmi churikikunatam marqayninkupi apamusuchkanki.
5 Paykunatam qawaykunki.
Hinaspam uyaykipipas kancharinki.
Kusikuymantam pampanyanqa sonqoyki.
Tukuy sonqoykiwanmi anchallataña kusikunki.
Lamar qochanta apamusqanku qori-qollqetam apamusunki.
6 Huntaykamusunkim nana-nanaq camellokuna.
Madian lawmantam huntaykamusunki camellokuna.
Efa lawmantam huntaykamusunki camellokuna.
Huntaykamusunkim Saba lawmanta llapallan camellokuna.
Qoritawan inciensotam apamusunki.
Ñoqa Tayta Diosta alabawanankupaqmi noticiakunata willasunki.
7 Cedar lawpi llapallan ovejakunam
qampaqña huñunasqa kanqa.
Nabaiot lawpi carnerokunam
servichikunaykipaqña huñunasqa kanqa.
Altarniypi agradoypaq ofrecewaptinkum chaskisaq.
Sumaqyasqa temploytam aswanraq sumaqyachisaq.
8 ¿Pikunataq puyu hinaña wak pawaqkunaqa?
¿Pikunataq wasinman kutiq paloma hinaña pawaqkunaqa?
9 Lamar qochapa patanpi nacionkunam
suyawachkanku hamunankupaq.
Tarsis lawmanta buquekunam
puntamuchkan chayamunanpaq.
Karumanta churikikunata apamunanpaqmi hamuchkan.
Qori-qollqenkutawan kuskata apamunanpaqmi hamuchkan.
Hamuchkankuqa yupaychasqayki ñoqa Tayta Diosta adorawanankuraykum.
Hamuchkankuqa qamkunata Israelpa Chuya Diosnin reqsisqataña rurasqayraykum.
10 Forasterokunam hatarichinqa murallaykikunata.
Paykunapa reyninkunam servisunkichik qamkunata.
Ñoqa piñakuspaymi castigarqayki.
Kuyaspaymi kunan llakipayayki.
11 Zaguannikikunam sapa punchaw kicharayanqa.
Tuta punchawmi mana wichqakuq kanqa.
Chaynaqa kanqa nacionkunamanta qori-qollqeta apamusunaykipaqmi.
Chaynaqa kanqa vencesqa reyninkunata pusamusunaykipaqmi.
12 Mana servisuqniki nacionqa chinkachisqam kanqa.
Chayna nacionqa pasaypaq chunnichisqam kanqa.
13 Apamusunkim Libano Orqopi fino sachakunata.
Apamusunkim cipres,
pino hinaspa boj sachakunata.
Temployta adornanankupaqmi apamusunki.
Sarunay temployta ancha reqsisqata ruranaypaqmi apamusunki.
14 Ñakarichisuqnikikunapa churinkunam humillasqa hamunqa.
Qayllaykipim qonqorakuspa pampaman kumuykunqa.
Paykunam sutichasunki:
“Tayta Diospa Llaqtan” nispa.
“Sion Moqopi Israelpa
Chuya Diosninpa Llaqtan” nispa.
15 Saqesqa kanaykimantaqa,
cheqnisqa kanaykimantaqa,
manaña pipapas purinan kanaykimantaqa
wiñaypaq reqsisqatam churasqayki.
Wiñaypaq reqsisqatam rurasqayki.
16 Wawanta ñuñuq mama hinam
nacionkuna uywasunki.
Wawan ñuñuq mama hinam
reykuna mikuchisunki.
Chaynapim reqsiwanki
ñoqa Tayta Dios salvaqniki kasqayta.
Chaynapim reqsiwanki Jacobpa Atiyniyoq Diosnin
reclamaqniki kasqayta.
17 Qoritam qosqayki broncepa rantinpi.
Qollqetam qosqayki fierropa rantinpi.
Kullupa rantinpim qosqayki bronceta.
Rumipa rantinpim qosqayki fierrota.
Gobiernaqnikikunam hawkayaypi gobiernasunki.
Kamachisuqnikikunam allinkunata ruraspa kamachisunki.
18 Nacionnikipim manaña rimanqakuñachu
dañasunaykimanta.
Allpaykipim manaña rimanqakuñachu
tuñichisunaykimantawan purmachisunaykimanta.
Murallaykikunatam sutichanki
“Libraqniy Muralla” nispa.
Zaguannikikunatam sutichanki:
“Diosta Alabana Zaguankuna” nispa.
19 Punchawpi kanchasunaykipaqpas
manañam intitaqa necesitankichu.
Tutanpi kanchasunaykipaqpas
manañam killataqa necesitankichu.
Ñoqa Tayta Diosñam kasaq
wiñaypaq kanchaqnikiqa.
Ñoqa Diosnikiñam kasaq
qamta achkiriqnikiqa.
20 Intikiqa manañamá seqaykunqachu.
Killaykiqa manañamá wañurunqachu.
Ñoqa Tayta Diosñam kasaq
wiñaqpaq kanchariqniki.
Llakisqalla kaynikipas
tukunqam qampaqariki.
21 Runaykikunapas llapallanmi
allin ruraqkunaña kanqaku.
Wiñaypaqñam paykunaqa
allpankutapas dueñochakunqaku.
Paykunaqa plantakusqaypa ikllimuqninkunam.
Paykunaqa makiykunapa rurallasqankunam.
Chaynataqa rurarqani
atiyniyta qawachikunaypaqmi.
22 Aschalla kaqkunam waranqaman mirarunqa.
Aschalla kaqkunam hatun nacion karullanqa.
Ñoqa Tayta Diosmi chaytaqa tiemponpi rurasaq.
Ñoqa Tayta Diosmi chaytaqa prontolla rurasaq.