Huchamantawan castigomanta
59
Tayta Diospa atiyninqa manam pisiyarunchu
manaña salvananpaq hinaqa.
Tayta Diospa rinrinqa manam upayarunchu
manaña uyarinanpaq hinaqa.
2 Mana allinkuna rurasqaykichikmi
Tayta Diosmanta rakirusunkichik.
Manaña uyarisunaykichikpaqmi
huchaykichik payta pakarusunkichik.
3 Makikichikmi wañuchisqaykichikkunapa yawarninwan
qanrachasqa kachkan.
Dedoykichikmi mana allin rurasqaykichikkunawan
qanrachasqa kachkan.
Rimankichikmi llullallata.
Parlankichikmi mana allinkunallata.
4 Manam pipas razonninpichu
juzgadopiqa quejakunku.
Manam cheqap razonwanchu
juzgadopiqa reclamanku.
Aswanqa confiakuchkanku chaqwakunallapim.
Aswanqa hapipakuchkanku yanqakunallapim.
Mana allinkuna wiksayasqam kachkanku.
Wachakuruq warmi hinaraqmi desgraciallata apaykamunku.
5 Paykunaqa culebrapa runtun oqllachkaq hinaraqmi.
Paykunaqa arañapa llikankuna awachkaq hinaraqmi.
Wañurunqam pipas chay runtuta mikuspanqa.
Chay runtu toqyaruptinqa kachukuq culebram nacerunqa.
6 Pachakunataqa manam ruranmankuchu arañapa llikankunawanqa.
Desgraciallatam paykunaqa ruran.
Paykunapa makinqa dañollatam ruran.
7 Mana allinta ruranankupaqmi kallpanku.
Inocente runakunata wañuchiqmi apurawman rinku.
Yuyaymanaspaqa desgracia rurayllapim yuyaymananku.
Mayman rispapas dañaspam purmachinku.
8 Manam yachankuchu hawkalla kawsayta.
Mayman rispapas manam rurankuchu allin arreglota.
Kawsayninkupas panta-pantallam paykunapaqqa.
Chayna kawsaqkunaqa manam tarinkuchu hawka kawsaytaqa.
9 Chayraykum allin arreglotaqa mana pipas rurapuwankuchu.
Chayraykum mana pipas allintaqa rurapuwankuchu.
Suyarqanikuqa kanchaytam
ichaqa lutokuyllam chayaramuwanku.
Suyarqanikuqa achkiytam
ichaqa tutayaypiraqmi purichkaniku.
10 Ñawsa hinaraqmi ñoqaykuqa purichkaniku.
Perqakunata llachpaykachastinmi purichkaniku.
Purichkanikuqa manaña ñawiyoq hinaraqmi.
Mitkachkanikuqa chawpi punchawpiraqmi.
Tutayaypi hinaraqmi urmachkaniku.
Sanolla kaspaykupas wañusqa hinaraqmi kachkaniku.
11 Llapallaykum waqaniku ukumarikuna hinaraq.
Llapallaykum qoqoqyaniku kullkukuna hinaraq.
Allin arreglotam suyachkaniku
ichaqa manam kanchu.
Salvawanankupaqmi suyachkanikuqa.
Aswanqa karupiraqmi kachkan ñoqaykumantaqa.
12 Anchallatañam mana kasurqaykikuchu qamtaqa.
Huchallaykum acusawanku ñoqaykutaqa.
Chayllam yuyariniku mana kasukusqaykuta.
Reqsikunikum mana allin rurasqaykuta.
13 Mana kasukuqmi karqaniku Tayta Diospaq.
Traicionaqkunam karqaniku Tayta Diospaq.
Tayta Dios qepanchaqmi karqaniku.
Runamasiyku ñakarichinaykupaqmi rimarqaniku.
Runamasiyku engañanaykupaqmi parlarqaniku.
Engañokunatam sonqoykupi tanteaspa rimarqaniku.
14 Manañam allin arreglota rurankuchu.
Manañam allinkuna rurayta yachankuchu.
Manañam rimankuchu plazakunapi cheqap palabrakunata.
Manañam atinkuchu wasikunapi cheqap kaqkuna rimayta.
15 Cheqap rimaq runaqa chinkarunñam.
Mana allinmanta asurikuqqa imanpas suwasqañam.
Allin arreglota manaña rurasqankuraykum piñakurqa.
16 Tayta Diosmi qawarirqa
manaña pipas kasqanta.
Tayta Diosmi hukmanyarurqa
paywan allinyanachiq runa manaña kasqanmanta.
Chaymi kikinpa atiyninwanña salvarqa.
Kikinpa allinkuna rurasqanpiñam amparakurqa.
17 Allinkuna rurasqanwanqa
qasqo harkachikunawan hinaraqmi churakurqa.
Salvaq kasqanwanqa
uma harkachikunawan hinaraqmi churakurqa.
Pachawan churakuchkaq hinaraqmi
runankunamanta sienteq kasqanwan churakurqa.
18 Tayta Diosqa sapakamamanmi paganqa.
Rurasqankuman hinam qopunqa.
Enemigonkunatam payqa castiganqa.
Cheqniqninkunamanmi payqa paganqa.
Lamar qochapa patanpi kaqkunamanpas paymi paganqa.
Rurasqankuman hinam payqa paganqa.
19 Intipa qespimunan lawmanta kaqkunam
Tayta Diosta respetanqaku.
Intipa seqaykunan lawmanta kaqkunam
atiyninta respetanqaku.
Lloqlla mayu hinaraqmi Tayta Diosqa hamunqa.
Wayrachimusqanpa apamusqan mayu hinaraqmi hamunqa.
20 Tayta Diosmi nin kaynata:
Sion llaqtamanmi hamunqa libraqnin.
Jacob castamanta wanakuqkunapaqmi hamunqa libraqnin.
21 Tayta Diosmi nin:
Qamkunawanmi contratota rurani kayna niqta:
“Espirituymi mana rakikunqachu qamkunamanta.
Palabraykuna qosqaymi qamkunamanta mana chinkanqachu.
Nisqaykunam miraynikikunamanta mana chinkanqachu.
Miraynikikunapa mirayninkunamantam mana chinkanqachu.
Kunanmanta wiña-wiñaypaqmi mana chinkanqachu.”