Cheqap ayunomanta
58
Tayta Diosmi niwarqa:
Ama upallaspa qayaykachakuy.
Cornetilla hinayá qayaykachakuy.
Runaykunamanyá willakuy mana kasukusqankumanta.
Jacob castakunamanyá willakuy huchallikusqankumanta.
2 Sapa punchawsi maskawanku.
Munasqayta hinas kawsayta munanku.
Allin ruraq nacion hinaraqsi
allin arreglota ruranaypaq mañawanku.
Ñoqa Diosninkupa leyninkuna mana saqeruq hinaraqsi
ñoqa Diosman asuykamuwayta munanku.
3 Chaywanpas niwankuraqmi:
“¿Imapaqtaq ayunaymanku
qam mana rikuchkaptikiqa?”
nispa,
“¿Imapaqtaq ñakariymanku
qam mana cuentata qokuchkaptikiqa?”
nispa.
Ayunasqaykichik punchawmi
munasqaykichikta rurarunkichik.
Llapallan llamkapusuqnikichiktam
chay punchawpi engañankichik.
4 Ayunaspaykichikmi kakunkichik peleayllapi.
Ayunaspaykichikmi kakunkichik quejanakuyllapi.
Wañuchinakuq hinam takanakunkichik qamkunaqa.
Manam kunan punchaw hinachu ayunanaykichikqa.
Chaynata ruraptikichikqa
mañakusqaykichikpas manam uyarisqachu kanqa hanaq pachapiqa.
5 Qamkunaqa ¿piensankichikchu
chayna ayunasqaykichik gustawasqanta?
Qamkunaqa ¿piensankichikchu
chay ñakariy punchawpi rurasqaykichik gustawasqanta?
¿Kumurachisqa tutura hinachu runa
chay punchawpi kumurayanman?
¿Lutokuruspanchum uchpapi runa
chay punchawpi wischurayanman?
¿Chaynata ruraspachu
“Ayuno punchawmi” ninkichik?
¿Chaynata ruraspachu
“Tayta Diospa agradonpaq ayuno
punchawmi” ninkichik?
6 Kaynam agradoypaq ayuno rurayqa:
Mana allin ruraqkunapa cadenasqan kachariymi.
Yugopa watunkunata paskarichkaq
hina runakuna libraymi.
Ñakariq runakunata kachaykuymi.
Yugota pakichkaq hina kachariymi.
7 ¿Manachum yarqasqa runamasikita mikuchinayki?
¿Manachum purikuq wakchata wasikipi chaskinayki?
¿Manachum mana pachayoqta qawaspaykiqa pachachinayki?
¿Manachum runamasikita tukuypi yanapaykunayki?
8 Chaynata ruraptikiqa
achikyaq kanchariywanmi kancharisqayki.
Heridaykimantam chaylla sanoyanki.
Allin rurasqaykikunam ñawpaqnikita rinqa.
Ñoqa Tayta Diospa kanchariyniymi qepaykita rinqa.
9 Chayna kaptinqa qayakamuwankim.
Hinaptinmi ñoqa Tayta Dios contestasqayki.
Yanapanaypaqmi qayakamuwanki.
Hinaptinmi “Kaypim kachkani” nisqayki.
Yugota qechuchkaq hina kasqayki ukupi kaqkunata
manaña ñakarichiptikiqa,
runamasikimanta mana burlakuspa
manaña insultaptikiqa,
10 yarqaymanta kaq runamasikiman
kikikipaq munasqaykita qoykuptikiqa,
ñakariq runamasikita
sasachakuyninpi yanapaykuptikiqa
tutayaypi kanchaq hinam
rurasqaykikuna rikurinqa.
11 Ñoqa Tayta Diosmi sapa punchaw pusasqayki.
Ñoqa Tayta Diosmi chunniqpi saksachisqayki.
Cuerpoykitam kallpanchasqayki.
Parqosqa huerta hinam kanki.
Mana chakiq pukyu hinam kanki.
12 Runaykikunam mosoqmanta perqanqaku.
Ñawpaq miraykunapa cimientasqanpim hatarichinqaku.
Hinaptinmi qamta sutichasunki:
“Tuñichisqa murallakuna allichaq” nispa.
“Yachanankupaq mosoqmanta calle kichaq” nispa.
Samana punchawmanta
13 Samana punchawniypi samaspaykiqa,
sapaqchasqay punchawpi munasqaykita mana ruraspaykiqa,
chay punchawta:
“Kusikuna Punchawwan” sutichaspaykiqa,
ñoqa Tayta Diospa punchawniyta
“Ancha Reqsisqa Punchawwan” sutichaspaykiqa,
munasqaykiman hina mana kawsaspa
chay punchawta respetaspaykiqa,
kusikuynikita mana maskaspa
chay punchawta respetaspaykiqa,
yanqa rimaykunata mana rimaspa
chay punchawta respetaspaykiqa
14 ñoqa Tayta Diospim kusikuyta tarinki.
Hinaptinqa carretapi hinam
nacionnikipa orqonkunapa hawanta apasqayki.
Hinaspam mikuchisqayki
abueloyki Jacobpa herencianpi qespiqkunata.
Ñoqa Tayta Diosmi nini chaynata.