57
Allin ruraq runakunam wañunku,
mana pipapas reparasqanmi wañunku.
Kuyapayakuq runakunam chinkanku,
ichaqa mana pipapas entiendesqanmi chinkanku.
Manam entiendenkuchu imanasqam chinkasqankumanta.
Manam entiendenkuchu sasachakuymanta librasqaña kasqankuta.
2 Allin kawsaq runakunaqa hawka kaymanmi yaykurunku.
Chay runakunaqa sepulturankupim hawkaña samarunku.
Taytacha-mamacha adoraqkunata sentenciasqanmanta
3 Tayta Diosmi nin kaynata:
Asuykamuychik brujakunapa wawankuna.
Asuykamuychik chuchumika warmipa mirayninkuna.
4 ¿Pimantataq burlakuchkankichik?
¿Pitataq despreciaspa qalluchkankichik?
¿Manachum qamkunaqa
mana kasukuqkunapa churinkuna kankichik?
¿Manachum qamkunaqa
llullakuq runakunapa mirayninkuna kankichik?
5 Encina sachakunapa
ukunpim huchapakunkichik.
Llapallan llaqesapa sachakunapa
ukunpim huchapakunkichik.
Taytachakunapaqmi wayqokunapi
wawakunata wañuchipunkichik.
Taytachakunapaqmi qaqa uchkukunapi
wawakunata wañuchipunkichik.
6 Qamkunaqa gustankichik
lluchka rumikuna adoraytam wayqokunapi.
Señalasqa adoranaykichik
sitiom kachkan chaypi.
Chay rumikunapaqmi hichapurqankichik
vino ofrendakunata.
Chaykunapaqmi kañapurqankichik
kawsaykunamanta ofrendakunata.
Chaykunata yachaspayqa
¿manachum castigaykichikman qamkunata?
7 Camaykitam churarqanki alto orqokunapa puntanpi.
Camaykitam churarqanki sayay-sayay orqopa puntanpi.
Chay orqokunamanmi seqarqanki.
Ofrenda kañaqmi seqarqanki.
8 Wasi punkuykipa qepanpim churarqanki
millakuypaq taytacha-mamachakunata.
Ñoqatapas qepanchawaspaykim
llustikurqanki pachaykikunata.
Ancho camapim sirikuykurqanki.
Huchapakuy munasqayki
qarikunawanmi contratota rurarqanki.
Paykunapa qari kaynintam qawarqanki.
9 Aceiteta apaspam rirqanki aMoloc sutiyoq taytachaman.
Achkallaña olorkunatam aparqanki payman.
Ancha karukunamanraqmi
comisionta kacharqanki.
Wañuqkunapa kasqanmanraqmi
uraykachirqanki.
10 Chaylla-chaylla purimuspaykim pisiparurqanki.
Ichaqa manam yanqapaq kasqantachu reqsikurqanki.
Kawsanaykipaq mikuytam tarirqanki.
Chaymi mana eqoyaqña rikurirurqanki.
11 ¿Pita manchakuspaykitaq
ñoqataqa engañawanki?
¿Pita respetaspaykitaq
ñoqataqa qonqawanki?
¿Unayña mana rimarisqayraykuchu
manaña respetawanki?
¿chaynachu icha manachu?
12 Ñoqam willakusaq allin rurasqaykikunatapas.
Ñoqam willakusaq wakin rurasqaykikunatapas.
Chaykunaqa yanqapaqñam kanqapas.
13 Qayakuptikiqa manam taytacha-mamachaykichu librasunki.
Chaykunataqa llapallantam wayra qechurusunki.
Chaykunataqa pukurimuq wayrallam chinkarachinqa.
Ñoqapi amparakuqkunam
ichaqa herencianku nacionta chaskinqa.
Hinaspataqmi ñoqapaq sapaqchasqa
orqoytapas dueñochakunqa.
Wanakuqkuna consuelasqanmanta
14 Hinaptinmi hukkaqnin ninqa:
Ñanta kichaspa allichaychik,
nispa.
Tayta Diospa runankuna purinanpaq
ñanpi harkaqkunata wischuychik,
nispa.
15 Alto-altopi yachaq Diosmi,
wiña-wiñaypaq kawsaq Diosmi,
Chuya sutiyoq Diosmi
kaynata nin:
Alto-altopim yachani.
Chuyay-chuyay sitiopim yachani.
Chaywanpas ñakarichisqakunawanmi kachkani.
Chaywanpas humillachisqakunawanmi kachkani.
Paykunawanqa kachkani
ñakarichisqakunata kallpanchanaypaqmi.
Paykunawanqa kachkani
humillachisqakunata valorchanaypaqmi.
16 Manam wiñaypaqchu runaykunapa contranpiqa quejakusaq.
Manam wiñaypaqchu paykunapa contranpiqa piñakusaq.
Mana chayqa paykunapa espirituntachiki
qayllaymanta chinkarachiyman.
Mana chayqa unanchasqaypa samaynintachiki
qayllaymanta chinkarachiyman.
17 Runaykuna engañaspa
mana allinkuna rurasqanraykum piñakurqani.
Paykunata castigaspaymi
piñakuyniypi paykunamanta pakakurqani.
Aswanqa paykunam manaña kasukuq rikurirurqa.
Munasqallanku ruraymanmi qokururqa.
18 Qawarqanim imaynam kawsasqankuta.
Chaywanpas hampisaqmi paykunata.
Chaynataqmi paykunata ñoqa pusasaq.
Yapamantam llakisqakunata consuelasaq.
19 Ñoqa Tayta Diosmi
llapallankuta rimachisaq:
“Karupi kaqkunaqa hawkallayá kachun” nispa.
“Hichpapi kaqkunaqa hawkallayá kachun” nispa.
Chaynaqa ñoqam runaykunata hampisaq.
20 Nisyu wayrapa pukusqan
lamar qocha hinaraqmi
mana allin ruraqkunaqa.
Mana qasillalla kaq
lamar qocha hinaraqmi
mana allin ruraqkunaqa.
Olankuna mitutawan lavata
wischumuq hinaraqmi
mana allin ruraqkunaqa.
21 Manam kanqachu hawkayay paykunapaqqa.
Chaynatam nini ñoqa Tayta Diosqa.