Diospa contraton waqaychaqkunamanta
56
Tayta Diosmi nin kaynata:
Allin arreglota ruraychik.
Ñoqapa agradoypaq ruraychik.
Chayllam tiempo hichpamuchkan libranaypaq.
Chayllam tiempo hamuchkan allin ruraq kasqayta qawachinaypaq.
2 ¡Mayna kusisqam chay kamachisqaykuna kasukuq runaqa!
¡Mayna kusisqam chayna kawsakuq runaqa!
¡Mayna kusisqam samana punchawkunapi kasuwaspa samaq runaqa!
¡Mayna kusisqam mana allinkuna rurananmanta cuidakuq runaqa!
3 Forastero runa Tayta Diosta qatispaqa
amayá nichunchu kaynata:
“Tayta Diosqa runankunamanta rakisqatam hatalliwanqa”
nispaqa.
Qolluq runapas
amayá nichunchu kaynata:
“Ñoqaqa chakisqa sacha hinam kani” nispaqa.
4 Chayraykum Tayta Dios kaynata nin:
Sichum qolluq runakuna kasuwaspa
samana punchawniykunapi samanqaku,
chaynataq munasqaykunata akllanqaku,
hinaspa contratoytapas kasukuq kanqaku
5 hinaptinqa paykunamanmi qosaq aswan allin kaqkunata.
Churikuna qonaymantam qosaq aswan allin kaqkunata.
Ñoqam sutinkuta temploypi qellqachisaq.
Temploypa perqankunapim sutinkuta qellqachisaq.
Sutitam qosaq wiñaypaq reqsisqa kanankupaq.
Sutitam qosaq wiñaypaqña mana chinkanankupaq.
6 Sichu forastero runakuna ñoqa Tayta Diosta
serviwananpaq qatiwaptinkuqa,
otaq ñoqa Tayta Diospa sutiyta kuyaspa
serviqniyña karuptinkuqa
chaynataq ñoqata kasuwaspa
samana punchawniypi samaptinkuqa
hinaspa contrato rurasqaytapas kasukuptinkuqa
7 ñoqam sapaqchasqay orqoman yaykuchisaq.
Hinaspam mañakamuwananku wasipi kusichisaq.
Altarniypim chaskisaq kañapuwasqanku animalkunata.
Altarniypim chaskisaq wañuchipuwasqanku animalkunata.
Temployqa “Mañakamuwananku Wasiwan” sutichasqam kanqa.
Llapallan runakunapa mañakamuwananku wasim kanqa.
8 Israel castakuna presochasqa kasqankumanta
huñumuq Tayta Diosmi nin:
Chay huñumusqaykunamanmi huk runakunatawan
huñumusaq,
nispam nin.
Mana allin kamachikuqkunapa contranpi rimasqanmanta
9 Purun animalkuna,
hamuychikyá ovejakunata mikuq.
Monte animalkuna,
hamuychikyá ovejakunata mikuq.
10 Runaykuna cuidaqkunam ñawsayarunku.
Manaña imamantapas cuenta qokuqmi rikurirunku.
Llapallankum upa allqo hina rikurirunku.
Mana anyakuy atiq allqo hinam rikurirunku.
Wischurayaspa puñukuyllapaqmi kawsanku.
Puñukuyllatam anchata gustanku.
11 Paykunaqa mikuysapallaña allqokuna hinam,
mana imawanpas saksaq allqokuna hinam.
Paykunaqa mana imapas entiendeq michiqkunam.
Sapakama munasqankuman hina kawsaqkunam.
Sapakama kikillankupaq ganay munaqkunam.
12 Paykunam sapakama ninku:
“Hakuwá tomananchikpaq maskamusun vinota.
Sinkananchikkamayá upyamusunchik poqosqa aqata.
Paqarinpas kunan punchaw hinam kanqa.
Kunanmantapas aswan allin punchawraqmi kanqa.”