Llapallanta Convidoman Dios qayasqanmanta
55
Yakumanta kaqkuna,
hamuychik.
Yaku tomaqyá llapallaykichik hamuychik.
Mana qollqeyoqkuna,
hamuychik.
Qamkunaqa debaldellayá mikuychik.
Vinotawan lechetayá debaldella chaskikuychik.
2 Mana mikunaykichikpaq kaqkunapiqa
¿imapaqtaq gastankichik qollqekichikta?
Mana saksachisunaykichik kaqkunapiqa
¿imapaqtaq gastankichik ganasqaykichikta?
Allintayá uyariwaychik
allinta mikunaykichikpaq.
Allintayá uyariwaychik
miski mikuykunata mikunaykichikpaq.
3 Atiendespa ñoqaman hamuychik.
Sumaqta uyariwaspam kawsankichik.
Qamkunawanmi wiñaypaq contratota rurasaq.
Rey Davidman prometesqaykunatam cumplisaq.
Payta kuyapayasqayraykum
confianapaq contratota cumplisaq.
4 Ñoqam payta churarqani
runakunaman testigo kananpaq.
Ñoqam payta churarqani
paykunapa jefen kananpaq.
5 Qanmi mana reqsisqayki nacionkunata qayanki.
Yupaychasqayki ñoqa Tayta Diosraykum
mana reqsisuqniki nacionkuna qanman kallpamusunki.
Israelpa ñoqa Chuya Diosninraykum kallpamusunki.
Qamta hatunchasqayraykum kallpamusunki.
6 Tarinaykichikpaq kachkaptillanraqyá
Tayta Diosta maskaychik.
Hichpaykichikpi kachkaptillanraqyá
Tayta Diosta qayakuychik.
7 Mana allinkuna ruraq runaqa
dejachunyá mana allin vidanta.
Mana allinlla piensaq runaqa
dejachunyá mana allin piensasqankunata.
Tayta Diosmanyá kutirikuchun
paymanta llakipayarikunanpaq.
Diosninchikmanyá kutirikuchun
allin sonqo kayninman hina pampachaykunanpaq.
8 Tayta Diosmi nin:
Piensasqaykunaqa manam piensasqaykichik hinachu.
Qamkunapa kawsasqaykichikqa manam kawsayniy hinachu.
9 Cielokunaqa alto-altom kay pachamantaqa,
chaynam kawsayniyqa
ancha allin qamkunapa kawsaynikichikmantaqa.
Chaynataqmi piensasqaykunaqa
ancha allin qamkunapa piensasqaykichikmantaqa.
10 Cielokunamantam para chayamun.
Cielokunamantam lasta wichimun.
Hinaspam kay allpata nuyuchin.
Cielokunaman mana kutispam allpata nuyuchin.
Aswanqa muhukunatam ikllichimuspa wiñachin.
Kaqllamantam tarpuqpaq muhuta ruruchin.
Kawsaykunatam mikunankupaq qespichin.
11 Chaynam palabraykunapas,
chaynam rimasqaykunapas,
manam yanqachu kanqa,
aswanqa munasqaytam ruranqa.
Kachasqayman hinam ruramunqa.
12 Qamkunapas kusikuywanmi lloqsimunkichik.
Presochasqa kasqaykichikmantam hawkallata pusamusunkichik.
Orqokunawan moqokunam runa hina qaparispa
qayllaykichikpi takinqaku.
Montepi llapallan sachakunam runa hina
qayllaykichikpi taqllakunqaku.
13 Kichkakunapa rantinpim wiñanqa cipres sachakunaña.
Itanakunapa rantinpim wiñanqa macha-macha sachakunaña.
Chaykunawanmi ancha reqsisqa kasaq ñoqa Tayta Diosqa.
Mana tukuq wiñaypaq señal hinam chaykunaqa kanqa.