Tayta Diosqa wiñaypaq kuyakuq kasqanmanta
54
Tayta Diosmi nin:
Yaw mana wachakuq warmi,
kusikuywanyá qapariy.
Yaw mana wachakuy reqsiq warmi,
takillawanñayá qamqa qapariy.
Qosanpa saqesqan warmiqa
achka wawasapam kanqa.
Qosayoq warmimantapas
achka wawayoqraqmi kanqa.
2 Hatunyachiy karpaykita.
Confianzawan mastariy toldoykita.
Mastariy yachasqayki karpapa toldonta.
Karpaykipa waskankunata masyachiy.
Karpaykipa estakankunata takyachiy.
3 Alleq lawnikimanmi mastarikunki.
Ichoq lawnikimanmi mastarikunki.
Miraynikikunam dueñochakunqa achka nacionta.
Runakunawanmi huntachinqa tuñichisqa llaqtakunata.
4 Manam penqachisqachu kanki.
Chaynaqa amayá manchakuychu.
Manam humillasqachu kanki.
Penqaypi kaytaqa amayá manchakuychu.
Qonqankim sipas kaynikipi penqakusqaykita.
Manañam yuyarinkichu viuda kaspayki kamisqa kasqaykita.
5 Qamta unanchaqnikim kani qosaykiqa.
Llapallan Kamachiq Tayta Dioswan
sutichasqam kani qosaykiqa.
Israelpa Chuya Diosninmi kani
libraqniki qosaykiqa.
Enteron Kay Pachapa Diosninwan
sutichasqam kani libraqnikiqa.
6 Qosanpa saqerusqan sipasllaraq
warmi hinam karqanki.
Llakisqa sonqoyoq sipasllaraq
warmi hinam karqanki.
Aswanqa ñoqa Tayta Diosnikim qayaykurqayki.
Kaqllamantam ñoqa Diosniki qayaykuspa niki:
7 Ratollapaqmi saqeykurqayki.
Anchata llakipayaspaymi
kaqllamanta reclamasqayki.
8 Contraykipim anchallataña piñakururqani qonqayllamanta.
Ichaqa ratollapaqmi pakakurqani qanmanta.
Wiñaypaq kuyapayaspaymi llakipayarqayki.
Reclamaqniki ñoqa Tayta Diosmi chaynata niki.
9 Noeyman juramentaspaymi nirqani.
Sinchi parachimusqay tiempopim nirqani.
Kay pachata yakuwan manaña tuytuchinaypaqmi juramentarqani.
Chaynatam kunanpas qanman juramentani.
Yapamantaqa manañam contraykipi piñakusaqñachu.
Yapamantaqa manañam qamta qaqchasqaykiñachu.
10 Orqokuna suchuriptinpas,
moqokuna asuriruptinpas
qampaq kuyapayakuyniyqa manam cambiakunqachu.
Hawkayaymanta contratoypas manam cambiakunqachu,
chaynataqa llakipayasuqniki Tayta Diosmi nini.
Mosoq Jerusalen llaqtamanta
11 Ancha humillachisqa Jerusalen llaqta,
wayra-parapa hina tukusqan Jerusalen llaqta,
manaña pipapas consuelasqan Jerusalen llaqta,
turquesa nisqanku rumipa hawanpim
rumikikunata churasaq.
Zafiro nisqanku rumiwanmi
cimientoykikunata hatarichisaq.
12 Torrekikunatam hatarichisaq
rubi nisqanku alhaja rumikunamanta.
Zaguanninkunatam rurasaq
llipipipiq alhaja rumikunamanta.
Llapallan murallaykikunatam rurasaq
suma-sumaq rumikunamanta.
13 Llapallan churikikunatam
yachachisaq ñoqa Tayta Diosqa.
Churikikunatam anchata
hawkayachisaq ñoqa Tayta Diosqa.
14 Allinkuna rurasqaykim kallpanchasunki.
Ñakarichisuqnikikunamantam karunchakunki.
Paykunataqa manañam manchakunkichu.
Tuñichisuqnikikunamantam karunchakunki.
Paykunaqa manañam asuykamusunkichu.
15 Sichu pipas contraykipi hatarimuspanqa
manam ñoqaraykuchu hatarimunqa.
Qanmi ichaqa vencenki contraykipi hatarimuqtaqa.
16 Herrerotaqa ñoqam unancharqani
sansata pukuspa tukuy rikchaq armakunata rurananpaq.
Purmachiq runatapas ñoqam unancharqani
tukuy ima kaqkunata tuñichinanpaq.
17 Ichaqa manam pipas contraykipi atirqachu arma rurayta.
Manam atirqachu wañuchisunaykipaq arma rurayta.
Juzgadopi llapallan acusaqnikikunam
juiciopi vencesqa kanqa.
Ñoqa Tayta Diosmi kaynata nini:
Serviqniykunapa herencianqa chaynam kanqa.
Chaynam ñoqapa salvasqaykunaqa kanqa.