53
Willakusqaykutaqa ¿pitaq creerqa?
Tayta Diosqa ¿pimantaq atiynintaqa revelarqa?
2 Tayta Diospa serviqninmi
qayllanpi ikllichkaq hina wiñanqa.
Manam karqachu allin rikchayninqa
nitaq sumaq kayninqa.
Qawariptinchikqa manam
estimanapaq hinachu karqa.
3 Runakunam payta despreciarqa.
Paykunam payta wischupakurqa.
Ñakariqlla runam kallarqa.
Nanayllapi kaq runam kallarqa.
Payqa karqa
runakunapa qepanchakusqanmi
Payqa karqa runakunapa despreciasqanmi.
Manam kaqpaqpas hapirqanchikchu paytaqa.
4 Cheqaptapunipas ñakariyninchikkunawanmi ñakarichkarqa.
Piensarqanchikmi chaynataqa Diospuni ñakarichisqanta.
Piensarqanchikmi chaynataqa Diospuni castigasqanta.
Piensarqanchikmi chaynataqa Diospuni humillachisqanta.
5 Aswanqa tuksipasqam karqa
mana kasukusqanchikkunarayku.
Aswanqa qoyuy-qoyuymi karqa
mana allinkuna rurasqanchikrayku.
Hawkayaypi kananchikpaqmi castigasqa karqa.
Sanoyasqa kananchikpaqmi heridasqa karqa.
6 Llapallanchikmi chullarurqanchik ovejakuna hina.
Sapakamam kawsarqanchik munasqanchikman hina.
Aswanqa Tayta Diosmi serviqninman qepiykachirqa.
Llapallanchikpa mana allinkuna rurasqanchiktam qepiykachirqa.
7 Ñakarichispa humillachiptinkum
mana rimarirqachu.
Nakanankupaq carnerota hina pusaptinkum
mana rimarirqachu.
Imaynam oveja kanman millwan
rutuqninpa qayllanpi upallalla,
chaynam paypas karqa
ñakarichiqninkunapa qayllanpi upallalla.
8 Yanqamanta presochaspam
juzgadoman pusarurqaku.
Miraymasinmantaqa pikunataq
paymanta cuentata qokurqaku?
Kay pachamanta qechusqa kasqantaqa
¿pikunataq cuentata qokurqaku?
Runaykuna mana kasukusqanrayku
castigasqa kasqankumantaqa
¿pikunataq cuentata qokurqaku?
9 Mana pita dañaq kachkaptinpas
mana allin ruraq runakunapa sepulturanpim
pampasqa kanan karqa.
Rimayninwan mana pita engañachkaptinpas
mana allin ruraq runakunapa sepulturanpim
pampasqa kanan karqa.
Aswanqa apukunapa sepulturanpim pampasqa karqa.
10 Tayta Diospa munasqanman hinam qoyuy-qoyuy karqa.
Tayta Diosmi serviqninta ñakarichirqa.
Tayta Diosmi culparayku ofrendata hina wañunanpa churarqa.
Chayna kachkaspapas qawanqam mirayninkunata.
Chaynataqmi kawsakunqapas unay watakunata.
Tayta Diospa munasqankunam rurasqa kanqa.
Serviqnintakamam munasqankuna rurasqa kanqa.
11 Ancha ñakarisqanpa qepantam
kawsarispa achkiyta qawaspan contentakunqa.
Tayta Diospa serviqninmi allinta ruranqa,
achkallaña reqsiqninkunatam
mana huchayoqpaqña chaskisqata ruranqa.
Paykunapa mana allin rurasqantam
qepichkaq hina qechunqa.
12 Chayraykum Tayta Dios sitiota payman qonqa.
Ancha reqsisqa runakunawan kananpaqmi qonqa.
Guerrapi qechusqankutam aypunakunqa.
Kallpasapa runakunawanmi aypunakunqa
vidanta wañunankama qosqanrayku.
Vidantam qorqa wañunankama
mana kasukuq runakunaman hukllawasqa kasqanrayku.
Achkaqpa huchankunatam qepichkaq hina qechurqa.
Mana kasukuqkunapa favorninpim mañakurqa.