Jerusalen llaqta librasqa kananmanta
52
Sion Moqopi llaqta,
rikchariy.
Kallpanchakunaykipaqyá rikchariy.
Yaw Jerusalen llaqta,
sumaqllaña pachaykiwanyá churakuy.
Tayta Diospaq sapaqchasqa llaqta,
sumaqllaña pachaykiwanyá pachakuy.
Dios mana yupaychaq mana señalasqakunaqa
manañam yaykumusunkichu yapamantaqa.
2 Jerusalen llaqta,
hatariyña.
Hawaykipi allpatayá taspirikuyña.
Gobiernanaykipaqyá tiyayña.
Presochasqa sipas hina sumaq Jerusalen llaqta,
horqokuy presochaqniki kunkaykipi cadenata.
3 Tayta Diosmi nin:
Debaldellam rantikusqa karqankichik.
Mana qollqewantaqmi reclamamusqa kankichik.
4 Ñoqa Tayta Diosmi kaynata nini:
Ñawpaq tiempopim rirqa Egipto nacionman runaykunaqa.
Chaypim forastero hina yacharqaku paykunaqa.
Asiria runakunam ñakarichirqa paykunata.
Yanqamantam ñakarichirqa paykunata.
5 Chayraykum ñoqa Tayta Dios nini:
Kunanqa ¿imatataq qawarini?
Presochasqa runaykuna pusasqankutam qawachkani.
Yanqamanta presochaspa pusasqankutam qawachkani.
Munaychakuqninkunam orgullowan qaparinku.
Mana tukuytam sapa punchaw kamiwanku.
6 Chaymi runaykuna reqsinkichik sutiyta.
Chay punchawpim yachankichik chayna nisqayta.
Yachankichikmá ñoqapa chayna nisqayta.
7 ¡Ima sumaqmi orqon-orqon
allin noticia willakuqkunapa chayamusqanqa!
¡Ima sumaqmi hawkayaymanta
uyarichiqkunapa chayamusqanqa!
Paykunam allin noticiata willakuchkanku.
Paykunam salvacionmanta uyarichichkanku.
Diosninchikqa gobiernachkanmi,
nispam nichkanku.
8 Uyariychik,
llaqta cuidaqkunam qaparichkanku.
Kusikuymantam chulla runa hinalla qaparichkanku.
Qaparichkankuqa ñawinkuwanpuni rikuspankum,
Sion Moqopi llaqtaman Tayta Dios kutimusqanta qawaspankum.
9 Kusikuyllawanñayá llapallaykichik qapariychik.
Jerusalen llaqtapi tuñichisqa sitiokuna,
qapariychik.
Runankunatam Tayta Dios llakipayaykurqa.
Jerusalen llaqtatam payqa reclamaykurqa.
10 Tayta Diosmi chuya atiyninta qawachirqa.
Llapallan nacionkunamanmi qawachirqa.
Tukuy hinastinpi kaqkunam yachanqaku.
Diosninchik salvawasqanchiktam yachanqaku.
11 Utqaymanyá ripuychik.
Babilonia llaqtamantayá lloqsiychik.
Diospa millakusqan kaqkunata ama hapispayá lloqsiychik.
Diosman asuykunaykichikpaq hinayá rurakuychik.
Diospa servicionkunata apaqkuna,
paypaq hinayá rurakuychik.
12 Ichaqa manam apurawmanchu lloqsinkichik.
Ichaqa manam ayqechkaq hinachu ripunkichik.
Tayta Diosmi harkasunaykichikpaq ñawpaqnikichikta richkan.
Tayta Diosmi harkasunaykichikpaq qepaykichikta richkan.
Tayta Diospa serviqnin ñakarispan vencesqanmanta
13 Serviqniymi ancha yuyaywan ruranqa.
Paymi ancha hatunchasqa kanqa.
Ancha-ancha reqsisqam kanqa.
Llumpay hatunllañam kanqa.
14 Imaynam qanmanta achkaq admirasqa karqa,
chaynam uyallanpas pasaypaq dañasqa karqa.
15 Chaynatam paypas challanqa achka nacionkunata.
Reykunapas payta qawarispankum mana atinqakuchu imam niyta.
Haykapipas mana willachikusqankutam rikunqaku.
Haykapipas mana uyarisqankutam entiendenqaku.