Jerusalen llaqta wiñaypaq salvasqa kananmanta
51
Tayta Diosmi nin:
Uyariychik allin rurayta munaqkuna.
Uyariychik ñoqa Tayta Diosta maskaqniykuna.
Mayqan qaqa rumimanta
pakimusqa kasqaykichiktayá yuyariychik.
Mayqan rumi horqomunamanta
kasqaykichiktayá yuyariychik.
2 Yuyariychik abueloykichik Abrahanmanta.
Yuyariychik abuelaykichik Saramanta.
Sapallanraqmi Abrahamqa karqa
payta qayamuptiyqa.
Bendecispaymi achka mirayninkunata
qorqani paymanqa.
3 Sion Moqopi llaqtatam
ñoqa Tayta Dios llakipayarisaq.
Pasaypaq tuñichisqa llaqtatam
llakipayarisaq.
Chunniq allpakunatam
Eden huertaman tikrasaq.
Ñoqa Tayta Diosqa chaki allpakunatam
plantasqa huertaman tikrasaq.
Chaypim ancha kusikuypi kanqaku.
Chaypim graciasta qospa takinqaku.
4 Runaykuna,
sumaqta entiendeychik.
Nacionniy,
allinta uyariwaychik.
Willakusaqmi yachachikuyniykunata.
Leyniymi kancharinqa runakunata.
5 Hichpamuchkanñam tiempo allin rurasqayta qawanankupaq.
Chayaramunqañam tiempo salvanaypaq.
Atiyniywanmi runakunapaq rurasaq allin arreglota.
Lamar qochapa patanpi kaqkunam suyawanqaku ñoqata.
Paykunam confianzawan suyanqaku atiyniyta.
6 Qawaychik cielokunata.
Qawariychik kay pachata.
Cielokunam chinkarunqa qosni hina.
Kay pacham tukurunqa mawka pacha hina.
Chaypi yachaqkunam wañunqa chuspikuna hina.
Salvacion qosqaymi ichaqa wiña-wiñaypaq kanqa.
Allinkuna rurasqayqa mana tukuqmi kanqa.
7 Uyariwaychik allinkuna ruray yachaqkuna.
Uyariwaychik yachachikuyniy sonqoykichikpi hatalliqkuna.
Ama hukmanyaychikchu runakuna kamisuptikichik.
8 Puyurusqa pacha hinam tukurunqaku.
Puyukunapa tukurusqan millwa hinam tukurunqaku.
Allinkuna rurasqayqa kanqa wiña-wiñaypaqmi.
9 Atiyniyoq Dios Taytalláy,
rikchariy,
rikchariy.
Atiyniyoq Dios Taytalláy,
ñawpaq tiempokunapi hinayá rikchariy.
Atiyniyoq Dios Taytalláy,
pasaq wiñay watakunapi hinayá rikchariy.
¿Manachum qamqa kachkanki
Rahab sutiyoq animalta saruparuq?
¿Manachum qamqa kachkanki
lamar qochapi manchakuypaq animal tuksiparuq?
10 ¿Manachum qamqa kachkanki
lamar qocha chakichiq?
¿Manachum qamqa kachkanki
uku-uku lamar qochakuna chakichiq?
Lamar qochapa uku pampantam
ñanman tikrarqanki.
Reclamasqayki runakuna chayninta
pasananpaqmi tikrarqanki.
11 Qampa reclamasqaykikunaqa
chaynatam kutimunqaku.
Kusikuywan qaparispam
Sion Moqopi llaqtaman kutimunqaku.
Umanku coronasqa hinam
wiñaypaq kusikuywan yaykunqaku.
Ancha kusisqallañam
paykunaqa tarikunqaku.
Paykunamantam llakikuy chinkanqa.
Paykunamantam waqaypas chinkanqa.
12 Tayta Diosmi nin kaynata:
Kikiypunim consuelasqaykichik,
chaynaqa ¿pitataq qamkunaqa manchakunkichik?
¿Wañuqlla runakunatachu manchakunkichik?
Runamasillaykichikmi paykunaqa.
Qora hina chinkaruqllam paykunaqa.
13 ¿Qonqarunkichikchu unanchasuqnikichik Tayta Diosta?
Paymi mastarirqa cielokunata.
Paymi takyachirqa kay pachata.
Ñakarichisuqnikichikpa piñakuynintaqa
¿mancharikunkichikchu?
Chaylla wañuchisuqnikichikpaq kaq runakunataqa
¿mancharikunkichikchu?
Ñakarichisuqnikichikpa piñakuyninqa
manam imanasunkichikpaschu.
14 Ñakarichiqkunapa humillachisqan runaqa
chaylla librasqam kanqa.
Manam calabozopiqa wañunqachu.
Mikunankupaqmi mana pisinqachu.
15 Yupaychasqaykichik Tayta Diosqa ñoqallam kani.
Lamar qocha yakukunatam ñoqaqa kuyuchini.
Lamar qochapa olankunatam ñoqaqa qaparichini.
Ñoqaqa Llapallan Kamachiq Tayta Dioswan
sutichasqam kani.
16 Cielokunatam ñoqaqa mastarirqani.
Kay pachatam ñoqaqa takyachirqani.
Makiypa llantuyninwan hinam harkarqayki.
Ñoqam palabraykunata rimachirqayki.
Sion Moqopi yachaqkunatam:
“Runaykunam kankichik”
nispa nichirqayki.
17 Jerusalen llaqta,
rikchariy.
Jerusalen llaqta,
hatariy.
Copamanta upyachkaq hinam ñakarirqanki.
Tayta Diospa piñakuynintam ñakarirqanki.
Tankikachanaykikamam vasomanta tomarqanki.
Vasopi kaqta tukunaykikamam tomarqanki.
18 Qamqa kanki achka wawayoq warmi hinam.
Ichaqa manam mayqanninpas guiasurqankichu.
Qamqa kanki achka wawakuna uywakuq warmi hinam.
Ichaqa manam mayqanninpas makikimanta hapisurqankichu.
19 Hamusurqankim kay iskay desgracia.
Hamusurqankim tuñichisunaykipaq desgracia.
Runaykikunatam yarqaymanta wañuchirqaku.
Guerrapitaqmi paykunataqa wañuchirqaku.
¿Piraq consuelasunkiman?
¿Piraq llakipayasunkiman?
20 Wawaykikunam desmayaruspa
kuchpallaña rikurirunku.
Callekunapa esquinankunapim
wischurayachkanku.
Mallapi luwichu hapisqa hinam
kachkanku paykunaqa.
Tayta Diospa piñakuyninpi castigasqam
kachkanku paykunaqa.
Diosnikipa qaqchasqanwan
castigasqam kachkanku paykunaqa.
21 Chaynaqa uyariy kayta,
ñakarichisqa Jerusalen llaqta.
Chaynaqa uyariy kayta,
mana vinollawan macharuq Jerusalen llaqta.
22 Tayta Dios Señornikim
kaynata nin,
runankuna defiendeq Diosnikim kaynata nin:
Makikipi tankikachachisuqniki copatam qechusqayki.
Machanapaq vasopi tomasqaykita hinam
castigoyta qechusqayki.
Manañam mastaqa chay copamanta tomankiñachu.
Piñakuyniy vasomantaqa manañam tomankiñachu.
23 Ñakarichisuqnikikunamanmi
chay vasota tomachisaq.
“Pakchakuy hawaykita pasanaykupaq” nispa
nisuqnikikunamanmi tomachisaq.
Chaynata nisuptikim
wasaykita pampata hina churarqanki.
Calleta hina pasanankupaqmi
wasaykita churarqanki.