Tayta Diospa agradonpaq alabanamanta
66
Tayta Diosmi kaynata nin:
Hanaq pachaqa gobiernaspa tiyanaymi.
Kay pachaqa ñoqapa sarunaymi.
¿Maypitaq wasita rurapuwankichikman?
¿Maypitaq samarinay sitiota rurapuwankichikman?
2 Ñoqa Tayta Diosmi nini:
Ñoqa ruraptiymi karqa tukuy kaykuna.
Chaymantapunim rikurirqa tukuy kaykuna.
Favorecesqay runakunaqa
humillakuspa wanakuq runakunam.
Favorecesqay runakunaqa
palabray respetaq runakunam.
3 Toro wañuchipuwaqniy runaqa
runa wañuchiq hinam.
Oveja wañuchipuwaqniy runaqa
allqopa kunkan qewichkaq hinam.
Kawsaykunamanta ofrecewaqniy runaqa
kuchipa yawarnin ofreceq hinam.
Incienso kañapuwaqniy runaqa
taytachata adoraq hinam.
Paykunaqa kikinkupa munasqanman hina kawsaytam akllakurqaku.
Paykunaqa millakuypaq rurasqankunapim kusikunku.
4 Ñoqapas paykunata ñakarichinaypaqmi akllasaq.
Ancha manchakusqankutam paykunaman apamusaq.
Qayakuptiymi mana pipas contestawarqachu.
Rimapayaptiymi mana pipas contestawarqachu.
Qawachkaptiymi mana allinta rurarqaku.
Mana gustasqaytam akllakurqaku.
Castigasqa karuspa librasqa kanankumanta
5 Tayta Diospa palabranta uyariychik.
Paypa palabranta respetaqkuna uyariychik:
Qamkunamanta wakiqnin cheqnisuqnikichikkunam ninku,
ñoqarayku wischusuqnikichikkunam kaynata ninku:
“Tayta Diosqa alabasqayá kachun” nispa.
“Kusisqata qamkuna qawaytam munaniku” nispa.
Aswanqa paykunam penqachisqa rikurinqaku.
6 Llaqtamanta qayakamuqkunatayá uyariychik.
Templomanta qayakamuqkunatayá uyariychik.
Enemigonkunamanmi Tayta Dios pagapuchkan.
Merecesqankuman hinam payqa qopuchkan.
7 Warmi hinaraqmi Sion Moqopi llaqtaqa wachakurun.
Manaraq wachakunan tiempopi
wachakuchkaq warmi hinam wachakurun.
Nanaynin manaraq hapichkaptin
wachakuchkaq warmi hinam wachakurun.
Wachakuchkaq warmi hinam qari wawata wachakurun.
8 ¿Pitaq chayna sucedesqanmanta uyarirqa?
¿Pitaq chayna kaqkunata rikurqa?
¿Huk punchawllapiqa nacionnintin runa nacerunmanchum?
¿Huk ratollapiqa nacionnintin runakuna wachakusqa kanmanchum?
Wachakuchkaq warmi hinam
Sion Moqopi llaqta nanaypi karqa.
Wachakuchkaq warmi hinam
chay ratollapi wawankunata wachakurqa.
9 Ñoqa Tayta Diosmi nini:
Wachakunan tiempota chayachimuchkaspayqa
¿harkakuymanchum wachakunantaqa?
Yupaychasqaykichik Diosmi nini:
Wachakunanpaq kachkaptinqa
¿michakuymanchum wachakunantaqa?
10 Jerusalen llaqtawan kusikuychik,
llapallan kuyaqninkuna payrayku kusikuychik.
Kusikuyninmanyá hukllawakuychik.
Payraykuyá llapallan waqaqkuna kusikuychik.
11 Jerusalen llaqtaqa wawanta ñuñuchkaq mama hinam
saksachisunkichik.
Saksanankama wawan mikuchiq mama hinam
consuelasunkichik.
Mamanpa lechenta tukunankama ñuñuq wawa hinam
saksankichik.
Achka-achka lecheta tomachkaq wawa hinam
kusikunkichik.
12 Ñoqa Tayta Diosmi nini:
Hawkayaytam mayuta hina Jerusalen llaqtaman kachamusaq.
Nacionkunapa qori-qollqentam lloqllata hina apachimusaq.
Chay llaqtaqa wawanta ñuñuchkaq mama hinam mikuchisunkichik.
Chay llaqtaqa wawanta marqachkaq mama hinam apasunkichik.
Payqa wawanta moqonpi tusuchispa kuyaq mama hinam kuyasunkichik.
13 Imaynallam maman consuelan wawanta
chaynatam consuelasqaykichik qamkunata.
Jerusalen llaqtapim consuelasqaykichik qamkunata.
14 Chayta qawaspam sonqoykichikpi kusikunkichik.
Verdeyariq qora hinam mosoqyanqa cuerpoykichik.
Tayta Diosmi serviqninkunaman atiyninta qawachinqa.
Enemigonkunamanmi piñakuyninta qawachinqa.
15 Tayta Diosqa ninapa chawpinpim hamuchkan.
Carretankunaqa wayra-para hinaraqmi hamuchkan.
Anchata piñakuspanmi payqa castiganqa.
Lenguachkaq nina hina piñakuyninwanmi castiganqa.
16 Arí,
ninawanmi Tayta Diosqa juzganqa.
Arí,
guerra rurasqanwanmi llapallan runakunata juzganqa.
Arí,
Tayta Diosqa achkaqtam wañuchinqa.
17 Tayta Diosmi kaynata nin:
Taytaycha-mamachakunata adoranankupaq
huertapi chuyanchakuqkunaqa,
huertapa chawpinpi
taytachata qatiqkunaqa
llapallankum chinkachisqa kanqaku.
Kuchi aycha mikuqkunaqa,
millakuypaq animalkuna mikuqkunaqa,
ukucha aycha mikuqkunaqa
llapallankum chinkachisqa kanqaku.
18 Ñoqaqa qawanim mana allinkuna rurasqankuta.
Ñoqaqa yachanim mana allinkuna tanteasqankuta.
Chayraykum kikiy hamuspay llapallan nacionkunata huñusaq.
Chayraykum tukuy rikchaq idiomayoqkunata huñusaq.
Chaynapim paykuna hamunqaku.
Chaynapim atiyniyta qawanqaku.
19 Paykunapaqmi señalta rurasaq.
Wakin lluptiqkunatam huklaw nacionkunaman kachasaq.
Kachasaqmá Tarsis lawman hinaspa Libia lawman.
Kachasaqmá flechana arma manejaq Lidia lawman.
Kachasaqmi Tubla lawman hinaspa Grecia lawman.
Kachasaqmi lamar qochapa karu patankunapi nacionkunaman.
Chaypi kaq runakunam
mana haykapipas ñoqamanta uyarirqakuchu.
Paykunaqa atiyniytapas manam qawarqakuchu.
Paykunaqa nacionkunamanmi willakunqaku.
Paykunaqa atiyniymantam willakunqaku.
20 Ñoqa Tayta Diosmi nini:
Pusamunqakum llapallan nacionkunamanta.
Pusamunqakum castamasikichikkunata.
Ñoqa Tayta Diospaqmi ofrendata hina pusamunqaku.
Caballokunapim,
carretakunapim,
andaskunapim pusamunqaku.
Mulakunapiwan camellokunapim pusamunqaku.
Jerusalen llaqtapi sapaqchasqay orqomanmi pusamunqaku.
Pusamunqakuqa Israelpa mirayninpa kawsay ofrenda apamusqankuta hinam
otaq ñoqa Tayta Diospa temployman chuyanchasqa tupupi
apamusqankuta hinam.
21 Tayta Diosmi nin:
Paykunamantam akllasaq sacerdotey kanankupaq.
Paykunamantam akllasaq Leviy casta hina serviwanankupaq.
22 Ñoqa Tayta Diosmi nini:
Mosoqyachisqay cielokunam qayllaypi takyanqa.
Mosoqyachisqay kay pacham qayllaypi takyanqa.
Chaynatam qayllaypi takyanqa miraynikichikkuna.
Chaynatam qayllaypi takyanqa sutikichikkuna.
23 Ñoqa Tayta Diosmi nini:
Sapa mosoq killa punchaw fiestapim,
sapa semana punchawpim
llapallan runakuna hamuwanqa.
Qayllaypi qonqorakuqmi hamunqa.
24 Lloqsimuspankum qawanqaku runankunapa aychankunata.
Qawanqakum contraypi hoqarikuqkunapa aychankunata.
Aychanku mikuq urukunaqa manañam wañunqachu.
Cuerponku rupaq ninaqa manañam wañunqachu.
Chaykunaqa millakuypaqmi kanqa.
Llapallan runakunapa millakusqanmi kanqa.