Tayta Diospa serviqninmanta
49
Tayta Diospa serviqnin Israel castam kaynata nin:
Uyariychik lamar qochapa patanpi nacionkuna.
Atiendeychik karu llaqtapi kaq runakuna:
Manaraqpas nacechkaptiymi Tayta Dios qayawarqa.
Mamaypa wiksanpi kachkaptiymi sutiyta rimarirqa.
2 Rimayniytam rurarqa filoyachisqa espadata hina.
Harkaykuwarqam makinpa llantuyninpi hina.
Ruraruwarqam ñawchi-ñawchi flechata hina.
Waqaychaykuwarqam flechakuna waqaychananpi hina.
3 Hinaspam niwarqa:
“Yaw Israel casta,
serviqniymi kanki” nispa.
“Qanwanmi qawachikusaq
sumaq kayniyta” nispa.
4 Ichaqa ñoqam nirqani:
“Yanqapaqmi llamkarqani” nispay.
“Mana imapas haypanaypaqmi
kallpayta tukurqani” nispay.
“Chinkaruq waspiyta hinalla haypanaypaqmi
kallpayta tukurqani” nispay.
“Cheqaptapunipas asuntoyqa Tayta Diospa makinpim kachkan.
Pagapuwananpas paypa makinpim kachkan.”
5 Tayta Diosmi unanchawarqa payta servinaypaq.
Mamaypa ukunpim unanchawarqa payta servinaypaq.
Jacob castata payman kutirichinaypaqmi churawarqa.
Israel castata payman huñunaypaqmi churawarqa.
Tayta Diospa qayllanpim alabasqa karqani.
Diospa kallpanchasqanmi karqani.
Chaymi Tayta Dios kaynata nin:
6 “Manam serviqllaychu kanaykiqa.
Manam Jacobpa ayllunkuna hatarichimuqllachu kanaykiqa.
Manam Israel castamanta puchuqkuna kutirichimuqllachu kanaykiqa.
Aswanqa achkiqta hinaraqmi
churasqayki nacionkunapaq
chaynataq ñoqalla salvaq
kasqaymanta willakunaykipaq,
tukuy hinastinpi kaqkunaman salvaq
kasqaymanta willakunaykipaq.”
7 Israel castata libraq
Tayta Diosmi nin,
Israel castapa chuya
Diosninmi nin,
wakin runakunapa pasaypaq despreciasqan runatam nin,
nacionkunapa cheqnisqan
runatam nin,
gobiernaqkunapa serviqninmanmi nin:
Reykunam qawasuspayki
respetowan sayarinqaku.
Kamachikuqkunam qawasuspayki
qonqorakuspa pampaman kumuykunqaku.
Chaynatam ruranqaku
confianapaq ñoqa Tayta Dios kasqayrayku.
Chaynatam ruranqaku
akllaqniki kasqayrayku.
Chaynatam ruranqaku
Israelpa Chuya Diosnin kasqayrayku.
Jerusalen llaqta kaqllamanta hatarichisqa kananmanta
8 Tayta Diosmi kaynata nin:
Favorecenay tiempopim contestasqayki.
Salvanay punchawpim yanapasqayki
waqaychasqaykim hinaspam churasqayki contrato ruranaypaq.
Churasqaykim qamnintakama runaykunawan contrato ruranaypaq.
Chaynapim yapamanta hatarichinki nacionta.
Huktawanmi dueñochachinki purmachisqa allpakunata.
9 Ninkitaqmi presokunata:
“Libreña lloqsiychik” nispa.
Ninkitaqmi tutayaypi kaqkunata:
“Qawachikuychikña” nispa.
Paykunaqa ñan patanpi
pastokunata ovejakuna tarichkaq hinam
cuidasqa kanqaku.
Chunniq orqokunapi
pastokunata ganadokuna tarichkaq hinam
cuidasqa kanqaku.
10 Manam yarqachikunqakuchu.
Manam yakunayachikunqakuchu.
Intipa rupayninpas manam ñakarichinqachu.
Paykunataqa kuyapayaspaymi pusasaq.
Pukyukunapa kasqanmanmi ñoqaqa pusasaq.
11 Orqoykunatam ñanman tikrasaq.
Hatun ñanniykunatam allichachisaq.
12 Qawaychik,
wakinmi hamuchkan karukunamanta.
Qawaychik,
wakinmi hamuchkan norte lawmanta.
Wakinkunam hamuchkan intipa seqaykunan lawmanta.
Wakinkunam hamuchkan Aswan sutiyoq lawmanta.
13 Yaw cielokuna,
kusikuywan qapariychik.
Yaw kay pacha,
ancha-anchata kusikuychik.
Yaw orqokuna,
kusikuywan takiychik.
Runankunatam Tayta Dios consuelan.
Ñakarichisqa kaqkunatam llakipayan.
14 Sion Moqopi yachaq runakunam ninku:
Saqeruwarqakum Tayta Diosqa,
nispa.
Qonqaruwarqakum Señor Diosqa,
nispa.
15 Tayta Diosñataqmi kaynata nin:
¿Ñuñusqan wawata maman qonqarunmanchu?
¿Wachakusqan wawata maman qepanchakurunmanchu?
Ichapas mamanqa qonqarunman wawanta.
Ñoqam ichaqa mana qonqasqaykichikchu qamkunata.
16 Maki pampaypi qellqasqata hinam
sutikichikta apaykachani.
Mana qonqaspam sapa punchaw
murallaykichikkunata yuyarichkani.
17 Kaqllamanta hatarichisuqnikim chaylla kutimunqaku.
Tuñichiqnikikunamantapas aswan apurawmanmi hamunqaku.
Purmachiqnikikunam qamkunamanta pasakunqaku.
18 Muyuriqnikita qawariy.
Huñunakuruspa qanman hamuqkunata qawariy.
Ñoqa Tayta Diosmi jurani.
Kawsasqayraykum jurani.
Llapallanwanmi alhajawan hina churakunki.
Noviapa churakunan hina alhajawanmi churakunki.
19 Llaqtaykikuna tuñichisqa kaptinpas
chunnichisqa,
purmachisqa kaptinpas.
allpaykim kunanqa kanqa
runaykikuna yachananpaq kichkillaña.
Millpuchkaq hina tuñichiqnikikunam
kunanqa kanqa karupiña.
20 Ñawpaq tiempopi qechususqayki churikikunam nisunki:
“Ñoqaykupaqmi kichkillaña kay allpaqa” nispa.
“Campota qowayku yachanaykupaq” nispa.
21 Chaymi sonqoykipi kaynata ninki:
“¿Pitaq ñoqapaq wachakurqa kaykunata?”
nispa,
“Ñoqaqa mana wawayoq qolloqmi karqani” nispa,
“Qarqosqa hinaspa preso apasqam karqani” nispa.
“¿Pitaq kaykunataqa uywarqa?
Sapallaymi saqesqa karqani ñoqaqa.
¿Maymantataq hamurunku paykunaqa?”
22 Señor Diosmi kaynata nin:
Makiywan señaschaq hinam qayasaq nacionkunata.
Banderawan qayachkaq hinam qayasaq runakunata
chaynapi qari churikichikkunata
marqaspa apamunankupaq,
chaynapi warmi churikichikkunata
hombrokuykuspa apamunankupaq.
23 Reykunam padrastoyki hina uywasuqniki kanqa.
Reinakunam mamayki hina ñuñusuqniki kanqa.
Qonqoranpam pampaman kumuykunqaku qayllaykipi.
Chakikipi allpatam llaqwanqaku qayllaykipi.
Tayta Dios kasqaytam
reqsiwanki qamqa.
Manam penqaypichu kanqaku ñoqapi
confianzawan suyaqkunaqa.
24 ¿Qechunmankuchu valeroso soldadomanta
guerrapi hapikusqanta?
¿Qechurunmankuchu presokunata
manchakuypaq soldadomanta?
25 Tayta Diosmi kaynata nin:
Cheqaptam presokunataqa
qechunqaku valeroso soldadomanta.
Cheqaptam guerrapi hapikusqantaqa
qechunqaku manchakuypaq soldadomanta.
26 Ñakarichisuqnikikunatam
kikinkupa aychanta mikuchisaq.
Kikinkupa yawarninkuwantaqmi
vinowan hina sinkachisaq.
Hinaptinmi llapallan runakuna reqsiwanqaku.
Salvaqniki Tayta Dios kasqaytam reqsiwanqaku.
Jacobpa atiyniyoq Diosnin kasqaytam reqsiwanqaku.
Ñoqalla libraqniki Dios kasqaytam reqsiwanqaku.