Israel castakuna rumi sonqo kasqankumanta
48
Uyariychik Jacobpa castankuna.
Uyariychik Israel castawan sutichasqa kaqkuna.
Judapa mirayninkuna,
uyariychik.
Tayta Diospa sutinpi juraqkuna,
uyariychik.
Israelpa Diosnin mañakuqkuna,
uyariychik.
Jurachkankichikpas manam cheqapta rimaspachu.
Mañakunkichikpas manam allinta ruraspachu.
2 “Tayta Diospaq sapaqchasqa llaqtamantam
kaniku” nispam ninkichik.
Qamkunam Israelpa yupaychasqan Diospi amparakunkichik.
Llapallan Kamachiq Tayta Dios sutiyoqpim amparakunkichik.
3 Ñawpaq pasaqkunamantaqa
qallariyninmantapunim nirqaykichikña.
Kikiy rimarispaymi
chay tiempopi kaq runakunaman nirqaniña.
Chaymi qonqayllamanta kikiy rurarqani chaykunataqa.
Hinaptinmi chaylla cumplisqa karqa chaykunaqa.
4 Ancha rumi sonqo kasqaykita yachaspaymi,
kunkaykipas fierro hina kasqanta yachaspaymi,
uyaykipas broncemanta hina kasqanta qawaspaymi
5 unaymantaraq ñoqaqa qamkunaman nirqaykichikña.
Manaraqpas sucedekuchkaptinmi willarqaykichikña.
Chaynaqa manam niwaqchu:
“Taytachaymi chaykunata rurarun” nispaqa.
Nitaqmi niwaqchu:
“Tallasqa taytachaymi chaykunata rurarun” nispaqa.
Nitaqmi niwaqchu:
“Fundisqa taytachaymi chaykunata rurarun” nispaqa.
6 Uyarirqankim chaykunata.
Chaynaqa qawarikuy sumaqta.
¿Manachum willakunki chaykuna cheqap kasqanta?
Kunanmi ichaqa uyarichisqayki mosoq asuntokunata.
Willasqaykim mana yachasqayki pakasqa kaqkunata.
7 Kunan tiempopi unanchasqakunatam uyarichisqayki.
Kunankama mana uyarisqayki kaqkunatam uyarichisqayki.
Manam niwaqchu qamqa:
“Yacharqaniñam” nispaqa.
8 Chaykunamantaqa manam uyarirqankichu.
Nitaqmi chaykunamantaqa yacharqankichu.
Ñawpaqmantapas rinrikiqa manam kichakurqachu.
Reqsikim pasaypaq traicionaq kasqaykita.
Yacharqanim mana kasukuqwan sutichasqa kasqaykita.
9 Kikiyraykum piñakuyniypi manaraq castigarqaykichu.
Alabasqa kanayraykutaqmi manaraq tukururqaykichu.
10 Manam qollqeta chulluchichkaq hinachu chuyancharqayki.
Aswanqa hornopi hinam ñakariywan pruebarqayki.
11 Kikiyraykullam rurarqani chaykunataqa.
Manam permitiymanchu karqa despreciawanankutaqa.
Manam dejaymanchu sapaq dios adoranankutaqa.
Israelpa castankunata Tayta Dios librananmanta
12 Uyariwaychik Jacob castakuna.
Uyariwaychik Israel castakuna.
Uyariwaychik qayasqay runakuna.
Ñoqaqa sapallaymi Dios kani.
Punta kaqpas,
qepa kaqpas ñoqallam kani.
13 Atiyniywanmi takyachirqani kay pachataqa.
Atiyniywanmi mastarqani cielokunataqa.
Qayaykuptillaymi takyarun chaykunaqa.
14 Huñunakuspayá uyariwaychik llapallaykichik.
Taytacha-mamachakunamantaqa ¿mayqannintaq
chaykunata willasurqankichik?
Tayta Diospa kuyasqanmi chaykunata
Babilonia nacionpi ruranqa.
Tayta Diospa atiyninmi munasqanta
Caldea law runakunapi ruranqa.
15 Ñoqallam payman rimarqani.
Ñoqallam payta qayarqani.
Ñoqam payta pusamurqani.
Maylawman rispapas
allin lloqsinanpaqmi qayamurqani.
16 Ñoqamanyá asuykamuwaychik
hinaspayá kayta uyariwaychik:
Willakuy qallarisqaymantapas
pakasqapiqa manam rimarqanichu haykapipas.
Tukuy chaykuna sucedeptinqa
chaypim karqani ñoqapas.
Señor Diosmi kunan kachamuwarqa.
Espiritunwanmi huntaykamuwarqa.
17 Libraqniki Tayta Diosmi kaynata nin,
Israelpa yupaychasqan Chuya Diosmi nin:
Yupaychasqayki Tayta Diosmi ñoqaqa kani.
Allinnikipaq yachachiqnikim kani.
Imaynam kawsanaykipaq yachachiqnikim kani.
18 Amalaya kamachisqaykunata
entiendewaq karqa,
hinaptinqa hawkayaynikim
mayu hinaraq kanman karqa.
Allin ruraynikim
lamar qochapi olakuna hinaraq kanman karqa.
19 Chaynataqmi aqo hina
kanman karqa miraynikikuna.
Manaña yupay atinam aqo hina
kanman karqa churikikuna.
Manam chinkachisqachu kanman karqa.
Manam qayllaymanta tukusqachu kanman karqa.
20 Lloqsiychik Babilonia llaqtamanta.
Ayqeychik Caldea law runakunamanta.
Kusikuywan qaparispayá willakamuychik.
Kay pachapa cantonkamayá uyarichimuychik.
Nimuychikyá:
“Tayta Diosmi librarun” nispa.
“Serviqnin Jacobpa castantam librarun” nispa.
21 Chunniqninkunatam paykunata pusarqa.
Ichaqa manam yakumantachu paykuna karqa.
Qaqa rumimantam paykunapaq toqyachirqa yakuta.
Qaqa rumitam raqrachispan lloqllachimurqa yakuta.
22 Manam hawkayay kanchu mana allin ruraqkunapaqqa,
chaynatam nin Tayta Diosqa.