Babilonia llaqta vencesqa kananmanta
47
Tayta Diosmi kaynata nin:
Uraykamuy sipas kaqlla sumaq Babilonia llaqta.
Polvopi tiyay sipas kaqlla sumaq Babilonia llaqta.
Manañam reinapa tiyananpiqa tiyankichu
Caldea lawpi sumaq llaqta.
Aswanqa allpapiyá tiyay
Caldea lawpi sumaq llaqta.
Manañam nisunkichu:
“Suma-sumaq llaqta” nispaqa.
Manañam nisunkichu:
“Kuyayllapaq llaqta” nispaqa.
2 Sirvienta warmi hinayá
maraynikita alistamuy.
Harina kanankamayá kutamuy.
Horqokuy uya tapaykita.
Qempikuy walikita.
Qala piernallayá chimpay mayukunata.
3 Pachaykita chustukuptikim rikunqaku.
Chayna kaptikim penqaynikita qawanqaku.
Chayna kanaykipaqmi vengakusaq.
Pitapas mana llakipayaspaymi vengakusaq.
4 Libraqnikichik Diosmi nin,
Israel castapa chuya Diosninmi nin,
Llapallan Kamachiq Tayta Dios sutiyoqmi nin:
5 Caldea lawpi sumaq llaqta,
sirvienta warmi hinayá
upallalla tiyakuy.
Caldea lawpi sumaq llaqta,
sirvienta warmi hinayá
tutayayman yaykuy.
Manañam pipas nisunkiñachu mastaqa:
“Nacionkuna gobiernaq llaqta” nispaqa.
6 Runaykunawanmi piñasqa karqani.
Penqaypi kanankupaqmi qanman qoykurqani.
Mana llakipayakuqmi paykunawan karqanki.
Yugoman watasqa bueyeskunawan hinam
yuyaqkunawanpas servichikurqanki.
7 “Wiñaypaqmi reina hina gobiernasaq” nispam nirqanki.
Aswanqa manam kaykunamantachu piensarqanki.
Nitaqmi imaynam kaykuna tukunanmantachu yuyaymanarqanki.
8 Yaw mana allin kawsay kuyaq warmi,
gobiernasqaykipi hawka kakuq warmi,
sonqoykipim qamqa piensachkanki:
“Ñoqallam kani,
ñoqa hinaqa manam hukqa kanchu” nispayki.
“Manam haykapipas viudayasaqchu” nispayki.
“Wawaykunaqa manam wañunqachu” nispayki.
9 Chaywanpas qonqayllamantam chayaramusunki.
Huk punchawllapim iskaynin llaki hayparamusunki,
chaynapi viudaña rikurinaykikama,
chaynapi manaña wawayoq kanaykikama.
Chaykunam sucedesunki
llumpay brujeria ruraq kachkaptikipas.
Chaykunam sucedesunki
llumpay musyaq kachkaptikipas.
10 Mana allin rurasqaykikunapim confiakurqanki.
Hinaspam:
“Manam pipas rikuwanchu” nispa nirqanki.
Yuyaysapa hinaspa yachaysapa kaynikim pantarachisunki.
“Ñoqallam kani,
ñoqa hinaqa manam hukqa kanchu” nispam nirqanki.
11 Sasachakuymi chayaramusunki.
Brujeriaykikunaqa manam harkayta atinqachu.
Desgraciam hayparamusunki.
Ofrendaykikunaqa manam hamunanta harkanqachu.
Qonqayllamantam tuñirachisunki.
Chayamunan tiempotaqa manam yachankichu.
12 Seguikuyá brujeriaykikunawan.
Seguikuyá musyaynikikunawan,
warma kasqaykimantapuni chayna rurasqaykikunawan.
Icha imallapipas servisunkiman.
Ichapas runakuna manchakusunkiman.
13 Consejasuqnikikunam kapusurqanki.
Aminaykikamam paykuna consejasurqanki.
Kunanyá cielokunapi kaqkunamanta
musyaqkuna rikurimuchunku.
Kunanyá lucerokunata qawaspa
musyaqkuna rikurimuchunku.
Hamuchunkuyá killan-killan willasuqnikikunaqa.
Imam sucedesunaykitayá
willasunki paykunaqa.
Kunanyá salvasunki paykunaqa.
14 Tamo hinallam paykunaqa.
Paykunataqa ninam tukurunqa.
Ninapa lenguasqanmantaqa
manam librakunqachu paykunaqa.
Chay ninaqa manam qonikunapaq sansallachu.
Chay ninaqa manam ladonpi tiyanallapaqchu.
15 Chaynam kachkan chay musyaqkuna,
warma kasqaykimanta ruraqmasikikuna.
Sapakamam pantasqankuman pasanku paykunaqa.
Manam mayqanninpas salvasunkichu paykunaqa.