46
Bel nisqanku taytacham qonqorakuykun.
Nebo nisqanku taytacham kumukuykun.
Animalkunaman churkuspam apanqaku taytachakunataqa.
Animalkuna pisipachiq llasaq cargam chaykunaqa.
2 Lliw taytacha-mamachakunam qonqorakuykuspa kumukuykunku.
Llasayninkumantapas manam librakuyta atinkuchu.
Kikillankum presochasqa pasakunku.
3 Tayta Diosmi nin kaynata:
Uyariwaychik Jacobpa castankuna.
Uyariwaychik Israel castamanta puchuqkuna.
Manaraq nacechkaptikichikmi
qepichkaq hina ñoqa aparqaykichik.
Manaraq wachakusqa kachkaptikichikmi
marqakuchkaq hina aparqaykichik.
4 Ñoqaqa hina kaqllam kasaq
machuyaptikichikpas.
Ñoqam apasqaykichik
soqo umaña kaptikichikpas.
Qamkunataqa unanchasqayraykum apasqaykichik.
Apaspaymi qamkunataqa librasqaykichik.
5 ¿Pimantaq rikchanachiwankichikman?
¿Pimantaq igualawankichikman?
¿Pimantaq comparawankichikman?
¿Piman rikchakuqtaq kayman?
6 Wakin runakunam wayqankumanta
achka qorita horqomunku.
Wakinñataqmi balanzapi
qollqeta pesanku.
Maestrotam contratanku
taytacha-mamachata rurananpaq
chaynapi qonqorakuspa qayllanpi adoranankupaq.
7 Hombrorikuspankum aparikunku.
Maymi kananpim sayarachinku.
Chay churasqankupim sayarayan.
Maypi kasqanmanta mana asurispanmi sayarayan.
Paykunata yanapananpaq qayakuptinkupas
manam contestanchu.
Sasachakuyninkumantapas manam salvayta
atinmanchu.
8 Yaw mana kasukuqkuna,
kayta yuyariychik.
Qamkunaqa allintayá yuyaymanaychik.
Qamkunaqa allintayá piensariychik.
9 Yuyariychik ñawpaq kaqkunata.
Yuyariychik pasaq kaqkunamanta.
Ñoqallam Diosqa kani.
Ñoqamanta hukqa manam kanchu.
Diosmi ñoqaqa kani.
Ñoqaman rikchakuqqa manam pipas kanchu.
10 Hamuq tiempokunapi sucedenanmantam willakuni.
Manaraq sucedeqkunatam ñawpaqmantapuni willakuni.
Ñoqam nini:
Tanteasqaykunatam rurasaq,
nispa.
Tukuy munasqaykunatam rurasaq,
nispa.
11 Intipa qespimunan lawmantam qayamuchkani runataqa.
Suwa anka hinam karumantaraq hamunqa chay runaqa.
Paymi ruranqa ñoqapa piensasqaykunata.
Rimasqayta hinam cumplisaq.
Tanteasqayta hinam rurasaq.
12 Uyariychik rumi sonqo runakuna.
Uyariychik allin ruraymanta karunchasqakuna.
13 Ñoqam hichpachimuchkani allin rurayniykunata.
Chaykunaqa manam karunchakunqachu.
Ñoqam hichpachimuchkani salvanay tiempota.
Chay salvacionqa manam unamunqachu.
Ñoqam Sion Moqopi yachaqkunata salvasaq.
Ñoqam Israel castakunata sumaqyachisaq.