Rey Cirota Tayta Dios kamachisqanmanta
45
Tayta Diosmi rey kananpaq churarqa Cirota.
Makinmantam Tayta Dios pusamurqa payta
nacionkunapi munaychakunanpaq
chaynataq reykunapa armankunata qechunanpaq.
Tayta Diosmi punkukunata Ciropaq kichachin.
Llaqtakunapa zaguanninkunatam kichachin.
Pipas manaña wichqay atinankamam kicharachin.
Hinaspam Cirota Tayta Dios kaynata nin:
2 Ñoqam risaq puntaykita.
Ñoqam pampayachisaq alto orqokunata.
Ñutupasaqmi broncemanta punkukunata.
Kuchusaqmi fierromanta cerrojokunata.
3 Pakasqa riquezakunatam qosqayki.
Pakasqa sitiokunapi tesorokunatam qosqayki.
Chaynataqa rurasaq
ñoqalla Tayta Dios kasqayta yachanaykipaqmi.
Chaynataqa rurasaq
Israel castapa Diosnin kasqayta yachanaykipaqmi.
Chaynataqa rurasaq
sutikimanta qayaqniki kasqayta yachanaykipaqmi.
4 Serviqniy Jacob castakunaraykum
sutikimanta qayayki.
Akllasqay Israel castakunaraykum
sutikimanta qayayki.
Mana merecesqayki sutitam churayki.
Mana reqsiwachkaptikipas chaynatam rurayki.
5 Ñoqallam Tayta Diosqa kani,
manam hukqa kanchu.
Ñoqamanta sapaq Diosqa manam kanchu.
Ñoqam armakunawan churachisqayki.
Mana reqsiwachkaptikipas chaykunawanmi churachisqayki.
6 Chaykunatam rurasqayki
llapallanku yachanankupaq,
intipa qespimunan lawmanta
intipa seqaykunan lawkama yachanankupaq,
ñoqalla Dios kasqayta yachanankupaq.
Manam huk Diosqa kanchu.
Ñoqallam Tayta Diosqa kani.
7 Achkiytapas tutayaytapas ñoqallam unancharqani.
Ñoqallam rurani hawkayayta.
Ñoqallam unanchani desgraciata.
Ñoqa Tayta Diosmi rurani tukuy chaykunata.
Atiyninwan munaychakuq Tayta Diosmanta
8 Altomanta parachimuchkaq hinayá
allin kaq hamuchun.
Puyumanta parachimuchkaq hinayá
allin kaq hamuchun.
Imaynam allpapas parata chaskispa rurunqa,
chaynatayá kay pachapi salvacionpas ikllimuchun.
Allin kaqpas wiñamuchkaq hinayá wiñamuchun.
Ñoqa Tayta Diosmi unancharqani chaykunataqa.
9 ¡Ay imaynaraq kanqa ruraqninwan churanakuqqa!
Wakin allpa mankaman rikchakuq huk allpa mankaqa
manam churanakunmanchu ruraqninwanqa.
Mituqa manam ninmanchu manka ruraqta:
“¿Imatataq rurachkanki ñoqamanta?”
nispaqa.
Rurasqayki allpa mankaqa manam nisunkimanchu,
“Manam llamkayta yachankichu qamqa” nispaqa.
10 ¡Ay imaynaraq kanqa:
“¿Imapaqtaq churyawarqanki?”
nispa
taytan anyaq runaqa!
¡Ay imaynaraq kanqa:
“¿Imapaqtaq wachawarqanki?”
nispa
maman anyaq runaqa!
11 Israelpa yupaychasqan Tayta Diosmi nin,
Israel unanchaq Chuya Diosmi kaynata nin:
¿Hamuq tiempokunamantachum tapuwankichik?
¿Churiykunamantachum cuentata mañawankichik?
¿Imaynam ruranaypaqchum kamachiwankichik?
12 Kay pachataqa ñoqam unancharqani.
Chaypi kananpaqmi runata unancharqani.
Atiyniywanmi cielokunata mastarirqani.
Chaypi kanankupaqmi lucerokunata kamachirqani.
13 Ñoqam Rey Cirota allinta rurananpaq hatarichisaq.
Ñanninkunatam ñoqa allichapusaq.
Jerusalen llaqtaytam mosoqmanta hatarichinqa.
Presochasqa pusachisqaykunatam kacharichinqa.
Llapallan Kamachiq ñoqa Tayta Diosmi nini kaynata:
Manam pagota chaskikuspanchu ruranqa chaykunata.
Manam regalokunaraykuchu ruranqa chaykunata.
14 Tayta Diosmi Israel castakunata kaynata nin:
Egipto nacion allpapi qespiqkunam,
Cus nacionpi imapas ganasqakunam
qamkunaman apamusqaña kanqaku.
Saba lawmanta hatunkaray runakunam
qamkunaman hamuspa qamkunapaña kanqaku.
Chaylaw runakunam qamkunata qatispanku
cadenasqa pasanqaku.
Qayllaykichikpi qonqorakuspam ruegakusunkichik.
“Cheqaptapunipas Diosmi
qamkunawan kachkan” nispam nisunkichik.
“Manam hukqa kanchu.
Paymanta sapaq Diosqa
manam kanchu” nispam nisunkichik.
15 Cheqaptapunipas qamqa
mana rikuy atina Diosmi kanki.
Qamqa Israel castapa salvaqnin
Diosmi kanki.
16 Llapallanmi humillachisqa
penqaypi rikurinqaku.
Taytacha-mamachakuna ruraqkunam
humillachisqa rikurinqaku.
17 Israel castakunatam Tayta Dios salvanqa.
Wiñaypaqmi paykunataqa salvanqa.
Israel castakuna,
manam penqaypaqchu kankichik.
Manam wiñaypaqchu
humillachisqa kankichik.
18 Cielokuna unanchaq Diosmi nin,
kay pachata unanchaspa takyachiqmi nin,
runakuna chaypi yachananpaq kay pacha unanchaqmi nin,
Tayta Diosmá kaynata nin:
Ñoqam Tayta Diosqa kani,
nispa.
Sapaq Diosqa manam kanchu,
nispa.
19 Ñoqaqa manam pakasqapichu rimani.
Ñoqaqa manam tutayay sitiokunapichu rimani.
Jacobpa mirayninkunataqa manam nirqanichu.
Mana imapa kasqan sitiopi
maskawananpaqqa manam nirqanichu.
Ñoqa Tayta Diosqa cheqap kaqtam rimani.
Ñoqaqa allin kaqkunallatam willakuni.
Tayta Dioslla cheqap Dios kasqanmanta
20 Nacionkunamanta lluptiqkuna,
huñunakuspayá hamuychik.
Qamkunaqa llapallaykichikyá asuykamuspa hamuychik.
Kullumanta taytacha-mamachakuna tronokunapi apaqkunaqa
mana yuyayniyoq runakunam.
Mana salvay atiqninku taytachakuna mañakuqkunaqa
mana yuyayniyoq runakunam.
21 Pruebakunatayá willakuspa presentaychik.
Mana atispapas consejanakuspayá yachachinakuychik.
¿Pitaq ñawpaqmantaraq kaykunamanta rimarqa?
¿Manachum ñoqa Tayta Dios willakurqani chaykunata?
Ñoqamanta sapaq Diosqa manam kanchu.
Ñoqamanta allin ruraq Diosqa manam kanchu.
Ñoqamanta huk salvaq Diosqa manam kanchu.
22 Tukuy hinastinpi kaqkuna,
ñoqatayá qawarimuwaychik.
Tukuy hinastinpi kaqkuna,
ñoqam salvasqaykichik.
Ñoqallam kani Diosqa.
Manam kanchu sapaq Diosqa.
23 Kikiyrayku juraspaymi
allin kaqta rimarqani.
Cumplikunanpaq kaqtam
prometerqani.
Qayllaypim qonqorakunqaku
llapallan runakunaqa.
Sutiypim juramentanqaku
paykunaqa.
24 Paykunam ñoqamanta ninqaku:
“Cheqaptapunipas Tayta Diosllam
allin ruraqqa” nispa.
“Cheqaptapunipas payllawanmi
kallpanchakusun” nispa.
Llapallan cheqniqniy runakunaqa ñoqamanmi hamunqaku
hinaspam paykunaqa penqaypi rikurinqaku.
25 Ñoqaraykum Israelpa llapallan mirayninkunaqa
mana huchayoqpaqña chaskisqa kanqaku.
Ñoqa Tayta Diosraykum
Israelpa llapallan mirayninkunaqa alabakunqaku.