Tayta Diosmi sapallan Diosqa
44
Jacobpa castan serviqniy runakuna,
kunan uyariwaychik.
Israelpa castan akllasqay runakuna,
kunan uyariwaychik.
2 Ñoqa Tayta Diosmi kaynata nini:
Ñoqa Tayta Diosmi unanchaqniki kani.
Manaraq nacechkaptiki ruraqnikim kani.
Manaraq nacechkaptiki yanapaqnikim kani.
Jacobpa castan serviqniy runakuna,
ama manchakuychikchu.
Jesurun nisqa akllasqay runakuna,
ama manchakuychikchu.
3 Ñoqam chunniq sitiokunapi
yakukunata kallpachisaq.
Ñoqam chaki allpakunapi
mayuchakunata purichisaq.
Miraynikichikkunamanmi
espirituywan huntachisaq.
Qamkunamanta naceqkunamanmi
bendicionniywan huntasaq.
4 Qorakunapa chawpinmanta wiñaq hinam kanqaku.
Mayu patanpi wayawkuna hinam kanqaku.
5 Wakin runam ninqa:
“Ñoqaqa Tayta Diospam kani” nispa.
Wakinñataqmi ninqa:
“Ñoqaqa Jacobpa castanmantam kani” nispa.
Wakinñataqmi makinpi qellqanqa:
“Ñoqaqa Tayta Diospam kani” niqta.
Hinaspam sutinman yapanqa
“Israelpa castan” niqta.
6 Israel castapa reyninmi nin,
Israel casta libraq Tayta Diosmi nin,
Llapallan Kamachiq Tayta Diosmi nin:
Ñoqam kani punta kaqpas.
Ñoqam kani qepa kaqpas.
Ñoqamanta hukqa manam kanchu.
Ñoqamanta huk diosqa manamá kanchu.
7 ¿Ñoqa hinaqa pipas kanmanchu?
Chayna kaspaqa payyá rimachun.
Qatinasninpiyá willakuchun.
Ñawpaqmantapunim runaykunataqa akllarqani.
Chaymantapuni imam pasakusqantayá willakuchun.
Willakuchunyá hamuq punchawkunapi
imam pasakunanmanta.
Willakuchuntaqyá hamuq punchawkunapi
imam pasakunanmanta.
8 Amayá katkatataychikchu.
Amayá mancharikuychikchu.
Chay tiempokunamantam nirqaniña.
Chay tiempokunamantam willakurqaniña.
Qamkunam kankichik ñoqapa testigoykuna.
Ñoqalla Dios kasqaymantam kankichik testigoykuna.
Ñoqa hina amparakunankuqa manam kanchu.
Ñoqapa reqsisqay diosqa manam pipas kanchu.
Taytacha-mamachakuna adoraqkunamanta
9 Taytacha-mamachakuna llapallan ruraqkunaqa mana imapaq valeqmi kanku.
Anchallaña kuyasqanku chay taytacha-mamachakunapas manataqmi imapaqpas valenchu.
Chaykunaman sayapakuqkunaqa mana rikukuqkunam hinaspapas mana yachaqkunam,
chayraykum penqaypi rikurinqaku.
10 Metalta chulluchispa diosta hina adorananpaq taytacha-mamacha ruraq runaqa yanqapaqmi ruran.
11 Chayna ruraqkunaqa ruraqmasinkunapiwanmi penqaypi rikurinqaku.
Taytacha-mamacha ruraqkunaqa runakunallam.
Llapallanku juzgadoman qayasqa kaspankuqa pasaypaq mancharichisqa chaynataq penqachisqam kanqaku.
12 Herreroqa kaynatam taytacha-mamachata ruran:
Herramientanta hapispam sansapi metalta qonichin,
martillowan takaspanmi taytacha-mamachapa ayrinta ruran.
Kallpasapa brazonkunawanmi llamkan.
Herrero mana mikuspanqa manaña kallpayoqmi rikurirun,
yakutapas manaña tomaspanqa pisiparuntaqmi.
13 Carpinteroñataqmi kaynata ruran:
Reglawan tupuruspanmi lapizwan chaynataq compaswan dibujarun.
Formonwan llaqllaspanmi runapa ayrinta hina ruran.
Kuyayllapaq runapa ayrinta hinam rurarun templopi kananpaq.
14 Cedro plantata plantaruptinmi parawan wiñarun.
Chay cedrokunam kuchunanpaq kanqa.
Munaspanqa plantaruntaqmi cipresta otaq encina sachata.
Montepi wiñaruptinmi rakuyanankama suyan.
15 Chay kullukunatam runa servichikun nina ratachikunanpaq.
Wakintam ratachin qonikunanpaq,
wakintañataq tantata rurananpaq,
wakinmantañataqmi taytacha-mamachata ruran chaypa qayllanpi qonqorakuspan adorananpaq.
16 Parten kullutam sansayachin aychata kankaspan saksanankama mikunanpaq.
Qonikuspantaqmi nin:
—Kunanqa qoniriruniñam,
ninatapas qawaykuniñam —nispa.
17 Puchuq kullumantañataqmi ruran taytacha-mamachata hinaspam ñawpaqninpi qonqorakuspan adoran.
Ruegakuspantaqmi kaynata nin:
—Libraykuway,
qanmi diosniy kanki —nispa.
18 Chay runakunaqa manam yachankuchu nitaqmi entiendenkuchu.
Ñawinkum tapasqa hina kachkan mana qawanankupaq,
yuyayninkupas tutayasqa hinam kachkan mana entiendenankupaq.
19 Manam yuyaymanankuchu,
manam piensarinkuchu cuentata qokunankupaq.
Manam ninkuchu:
—Kay kullupa partenta rupachispaymi sansanpi tantata rurarqani,
aychatapas kankaruspaymi mikuruni.
Parten kullumantañataqmi ruraruni kay millakuypaq taytacha-mamachata.
Kay adorasqayqa kullumanta rurasqallam —nispa.
20 Cheqaptapunipas chay ruraq runaqa uchpata mikuchkaq hinam,
pensamientonpi engañasqa kaspanmi pantarun.
Chayna ruraqkunaqa manam salvakuyta atinqakuchu,
manataqmi nikunkuchu:
—Alleq makiypi kaqqa ¿manachum engañolla?
—nispa.
Israel castata Tayta Dios pampachaspan salvananmanta
21 Jacob castakuna,
chaykunatayá yuyariychik.
Israel castakuna,
serviqniy kasqaykichiktayá yuyariychik.
Qamkunatam unancharqaykichik.
Qamkunaqa serviqniymi kankichik.
Manam qonqasqachu kankichik.
22 Ñoqam chinkarachini puyuta hina
mana kasukuynikichikkunata.
Ñoqam chinkarachini waspiyta hina
huchallikusqaykichikkunata.
Qamkunaqa ñoqamanyá kutirikamuwaychik.
Qamkunataqa ñoqam librarqaykichik.
23 Yaw cielokuna,
takiychik kusikuymanta.
Takiychik Tayta Diospa rurasqanmanta.
Kay pachapi kaqkuna,
qapariychik.
Orqokuna,
kusikuymanta qapariychik.
Montepi llapallan sachakuna,
kusikuymanta qapariychik.
Qapariychikqa Jacob castata
Tayta Dios librasqanmantayá.
Qapariychikqa Israel castapi rurasqanwan
ancha reqsisqa kasqanmantayá.
24 Libraqniki Tayta Diosmi nin,
manaraqpas nacechkaptiki
unanchasuqnikim kaynata nin:
Ñoqam Tayta Dios kani.
Tukuy imapas unanchaqmi kani.
Ñoqallam cielokunata mastarirqani.
Ñoqallam kay pachata takyachirqani.
25 Ñoqamanta willakuq tukuqkunapa nisqantaqa
manam cumplichinichu ñoqaqa.
Adivinaqkunapa yuyaymanaynintam sonsoyachini.
Yachasqankunatapas llullamanmi tikrachini.
26 Serviqniykunapa rimasqantam cumplichini.
Kachasqaykunapa consejasqantam allinta qespichini.
Jerusalen llaqtatam nin:
Qamqa kaqllamantam runayoq kanki,
nispa
Juda lawpi llaqtakunatam nin:
Kaqllamantam hatarichisqa
kanki,
nispa.
Tuñichisqa perqankunatam mosoqmanta hatarichini,
nispa.
27 Ñoqam kamachini hatun lamar qochata:
“Chakiruy” nispa.
“Ñoqaqa qampa mayuykikunatam chakichisaq” nispa.
28 Ñoqam nini Rey Cirota:
“Qanmi michipuwaqniy kanki.
Qanmi tukuy munasqayta ruranki.”
Payqa Jerusalen llaqtatam ninqa:
“Mosoqmanta hatarichisqam kanki” nispa.
Ninqataqmi templota:
“Mosoqmanta cimientasqam kanki” nispa.