Tayta Dioslla Israel castakuna libraq kasqanmanta
43
Israelpa castankuna,
unanchawaqninchik Tayta Diosmi
kaynata nisunkichik kunan.
Jacobpa castankuna,
kikinpaq rurawaqninchik Tayta Diosmi
kaynata nisunkichik kunan:
Ama manchakuychikchu.
Ñoqam reclamasqaykichik.
Ama manchakuychikchu.
Sutikichikmantam qayasqaykichik.
Ama manchakuychikchu.
Qamkunaqa ñoqapam kankichik.
2 Yakuta chimpaptikichikmi
qamkunawan kasaq ñoqaqa.
Mayuta pasaptikichikmi
lloqllamanta harkasqaykichik ñoqaqa.
Nina ukunta pasaptikichikqa
manam rupasunkichikchu.
Lenguachkaq ninapas
manam kañasunkichikchu.
3 Ñoqaqa yupaychasqaykichik Tayta Diosmi kani.
Israelpa Chuya Diosnin kaspay salvaqnikichikmi kani.
Rantikichikpi Egipto nacionman pagaspaymi
rantirqaykichik.
Rantikichikpi Cus nacionman pagaspaymi
rantirqaykichik.
Rantikichikpi Saba nacionman pagaspaymi
rantirqaykichik.
4 Qamkunata estimaspaymi rantirqaykichik.
Ancha kuyayllapaqmi qamkunaqa karqankichik.
Chayraykum qamkunata kuyaykichik.
Rantikichikpim wakin runakunata pagarqani.
Vidaykichikraykum wakin nacionkunata pagarqani.
5 Ama manchakuychikchu.
Ñoqam qamkunawan kachkani.
Ñoqam intipa qespimunan lawmanta
pusamurqani miraynikichikkunata.
Intipa seqaykunan lawmanta
pusamuspam huñumusqaykichik qamkunata.
6 “Kutichipuy paykunata” nispaymi
kamachisaq norte lawpi nacionkunata.
“Ama paykunata harkakuychikchu” nispaymi
kamachisaq surlawpi nacionkunata.
“Pusamuy karukunamantaraq
qari churiykunata” nispaymi nisaq.
“Pusamuy tukuy hinastinmanta
warmi churiykunata” nispaymi nisaq.
7 “Sutiywan llapallan sutichasqakunatayá pusamuy.
Alabasqa kanaypaq llapallan unanchasqaykunatayá pusamuy.
Kikiypa kanankupaq rurasqay runaykunatayá pusamuy.”
8 Horqomuychik ñawiyoq kachkaspa
mana qawakuqkunata.
Horqomuychik rinriyoq kachkaspa
mana uyariqkunata.
9 Chaymi llapallan nacionkuna huñunakamurqa.
Chaymi llapallan runakuna hamuspa huñunakurqa.
¿Mayqantaq paykunamanta kaykunata willaykuwachwan?
¿Mayqantaq ñawpaq sucedeqkunamanta kunan niykuwachwan?
Razonniyoq kasqankumantayá testigonkuta pusamuchunku.
Uyarispankuyá cheqap kasqanta nichunku.
10 Tayta Diosmi nin:
Qamkunam testigoy kankichik.
Akllakusqay serviqniykunam kankichik
reqsiwaspaykichik ñoqapi confiakunaykichikpaq
chaynataq chaykunatapas ruraq kasqayta entiendenaykichikpaq.
Ñoqamanta puntataqa manam mayqan diospas karqachu.
Ñoqamanta huk diosqa manam haykapipas kanqachu.
11 Ñoqallam kani Tayta Diosqa.
Hukqa manam kanchu salvaq Diosqa.
12 Tayta Diosmi nin:
Ñoqam willakuspa salvarqani.
Ñoqam chaykunata uyarichirqani.
Chaykunataqa manam sapaq dioschu rurarqa.
Ñoqalla Dios kasqaymantam
testigo kankichik qamkunaqa.
13 Kunan punchawmantapas
chaykuna ruraq Diosmi kani ñoqaqa.
Manam pipas libranmanchu ñoqapa atiyniymantaqa.
Manam pipas tikranmanchu ñoqapa rurasqaytaqa.
14 Qamkuna reclamaqnikichik Tayta Diosmi nin
otaq Israelpa Chuya Diosninmi kaynata nin:
Qamkunaraykum Babilonia lawman kachasaq.
Llapallankutam lluptikuqta hina uraykachisaq.
Caldea runakunatapas alabakusqanku buquekunapim uraykachisaq.
15 Ñoqa Tayta Diosqa
Chuya Diosnikichikmi kani.
Ñoqa Tayta Diosqa
Israel unanchaq reynikichikmi kani.
16 Tayta Diosmi kaynata nin:
Ñoqam lamar qochanta ñanta kicharqani.
Olallaña lamar qochapa ukuntam ñanta kicharqani.
17 Carretakunatawan caballokunatam lloqsichirqani.
Tropakunatawan yanapaqninkunatam lloqsichirqani.
Manaña hatariy atinankukamam
paykunaqa wichichisqa karqaku.
Wañunayaq mecha hinam
paykunaqa wañururqaku.
18 Amaña yuyariychikchu ñawpaq kaqkunamanta.
Amaña yuyaymanaychikchu pasaq kaqkunamanta.
19 Ñoqam rurasaq mosoq kaqta.
Rikunkim kunanpuni rikurimuqta.
Chunniqpim ñanta kicharisaq.
Chaki allpakunapim mayukunata kallpachisaq.
20 Purun animalkunam yupaychawanku.
Atoqkunapiwan avestruzkunam yupaychawanku
yakukunata chunniqpi pawachisqayrayku,
mayukunata chaki allpapi kallpachisqayrayku.
Chaytam rurarqani
runaykunata yaku tomachinaypaq.
Chaytam rurarqani
akllasqaykunata yaku tomachinaypaq.
21 Chaytam rurarqani kikiypaq rurasqay runakunapaq
chaynapi alabasqa kasqayta willakunankupaq.
22 Chaywanpas,
yaw Jacob castakuna,
manam ñoqatachu qayakuwarqankichik.
Chaywanpas,
yaw Israel castakuna,
ñoqatam amiruwarqankichik.
23 Manam lliw kañana ovejakunatapas
ofrecewarqankichikchu.
Yupaychawanaykichikpaqqa wakin animalkunatapas
manam wañuchipuwarqankichikchu.
Manam kawsaykunamanta ofrendata mañaspaychu
qamkunataqa llamkachirqaykichik.
Manam inciensota kañanaykichikta mañakuspaychu
qamkunataqa amichirqaykichik.
24 Manam rantipuwarqankichikchu
calamo sutiyoq miski asnaq especeriataqa.
Manam qowarqankichik achkanpichu
wañuchipuwasqaykichik animalkunapa wirantaqa.
Aswanqa huchallikusqaykichikwanmi
lliw pisiparachiwankichik.
Mana allinkuna rurasqaykichikwanmi
lliw amiruwankichik.
25 Ñoqam ichaqa papelta borrachkaq hina
chinkachisaq mana kasuwasqaykichikta.
Ñoqam ichaqa manaña yuyarisaqchu
huchallikusqaykichikta.
26 Contraypi imatapas yuyaptikichikyá
pleiteanakusunchik.
Ichapas mana huchayoq kachkankichik.
Quejaykichiktayá willawaychik.
27 Punta kaq abueloykichikmi
contraypi huchallikurqa.
Yachachiqnikichikkunam
mana kasukuqkuna karqa.
28 Chayraykum santuariopi jefekunata qarqorqani.
Chayraykum Jacob castakunata
chinkachisqa kananpaq churarqani.
Chayraykum Israel castakunata
insultasqa kanankupaq churarqani.