Tayta Dios serviqmanta
42
Kayqa ñoqapa serviqniymi.
Payqa garantizasqaymi.
Paytam ñoqaqa akllakurqani.
Payraykum kusisqa kachkani.
Paymanmi huntani espirituyta.
Paymi nacionkunapi ruranqa allin arreglota.
2 Manam payqa qayaykachakunqachu.
Fuertemantapas manam qaparinqachu.
Callekunapi vozninpas manam uyarikunqachu.
3 Manam pakinqachu qewisqa soqosllatapas.
Manam wañuchinqachu tumpalla rupaq mecherotapas.
Cheqapraykum ruranqa allin arreglotapas.
4 Manam payqa tankikachanqachu.
Manam payqa hukmanyanqachu
nacionkunapi allin arreglota ruranankama.
Manam payqa hukmanyanqachu lamar qochapa patanpi
nacionkuna yachachikuynin suyanankukama.
5 Cielokuna unanchaq Tayta Diosmi kani.
Cielokunapas mastariq Tayta Diosmi kani.
Ñoqaqa allpa pachatam unancharqani.
Allpamanta wiñaqkunatam mirachirqani.
Allpa pachapi runakunaman kawsaytam qorqani.
Allpa pachapi puriqkunaman kawsaytam qorqani.
Chayna ruraq kaspaymi serviqniyta kaynata nini:
6 Ñoqa Tayta Diosmi allinta ruraspay qayarqayki.
Ñoqam makikimanta hapisqayki.
Ñoqam qamta waqaychasqayki.
Ñoqam churasqayki runakunawan contrato ruranaykipaq.
Ñoqam churasqayki nacionkunaman kanchanaykipaq.
7 Ñoqam churasqayki ñawsakunapa ñawinta kichanaykipaq.
Ñoqam churasqayki carcelpi kaqkunata horqonaykipaq.
Ñoqam churasqayki tutayay calabozopi tiyaqkunata horqonaykipaq.
8 Ñoqam Tayta Dios kani.
Chayna sutiyoq Diosmi kani.
Hukkuna adoranankutaqa manam permitisaqchu.
Ñoqamanta sapaqta alabanankutaqa manam permitisaqchu.
9 Ñawpaqmantaraq rimasqaykunam cumplikusqaña.
Kunanmi willasqaykichik mosoq kaqkunataña.
Manaraq rikurimuchkaptinmi willasqaykichikña.
Tayta Diosta alabaspa takisqankumanta
10 Tayta Diosmanyá mosoq takita takiychik.
Tukuy hinastinpi kaqkuna paytayá alabaychik.
Lamar qochanta viajaqkuna,
paytayá alabaychik.
Lamar qochapi tukuy ima kaqkuna,
paytayá alabaychik.
Paytayá alabaychik,
lamar qochapa patanpi nacionkuna.
Paytayá alabaychik,
lamar qochapa patanpi yachaqkuna.
11 Chunniqpi kaq runakunayá kusikuchunku.
Chaypi kaq llaqta runakunayá kusikuchunku.
Kusikuchunkuyá Cedar law llaqtachapi yachaqkunapas.
Kusikuymantayá takichunku Sela lawpi yachaqkunapas.
Ancha-anchatayá qaparichunku orqokunapa puntanmantapas.
12 Paykunaqa yupaychachunkuyá Tayta Diosta.
Willakuchunkuyá lamar qochapa patankunapi alabasqankuta.
13 Valeroso soldado hinam Tayta Diosqa lloqsinqa.
Sientirachisqa peleaq soldado hinam peleanqa.
Qaparispanmi guerrapi peleananpaq qayaykachakunqa.
Enemigonkunata venceruspanmi munaychakunqa.
14 Tayta Diosmi nin:
Unayñam upallalla karqani.
Upa tukuykuspaymi aguantakuykurqani.
Kunanmi ichaqa wachakuq warmi hina qaparisaq.
Enqespaymi ñoqaqa qaparisaq.
“Ay,
ay” nispaymi qaparisaq.
15 Orqokunatawan moqokunatam purmachisaq.
Pastonkunatam lliwta chakirachisaq.
Mayunkunatam aqo pampamanña tikrarusaq.
Qochayoq pampankunatam chakirachisaq.
16 Ñawsakunatam pusasaq
mana reqsisqan ñanninkunata.
Ñawsakunatam purichisaq
mana reqsisqan purinankunata.
Paykunapa qayllanpim tutayayta
tikrarusaq achkiyman.
Risqanku kallka-kallka ñantam
tikrarusaq pampa ñanman.
Paykunapaqmi rurasaq
tukuy kaykunata.
Manam saqesaqchu
paykunata.
17 Taytachakunapi confiakuqkunam
penqakuyllawanña karunchakunqaku.
Taytachakunata:
“Diosniykum kankichik” niqkunam
penqakuyllawanña karunchakunqaku.
Israel castakuna ñawsa hina kasqankumanta
18 Tayta Diosmi nin:
Upakuna,
uyariychik.
Ñawsakuna,
qawarikuychik.
19 ¿Pitaq ñawsa?
¿Manachum serviqnillay?
¿Pitaq upa?
¿Manachum willakunanpaq kachasqallay?
¿Pitaq paykunata gobiernaq hina ñawsaqa?
¿Pitaq ñoqa Tayta Diospa serviqniy hina ñawsaqa?
20 Tukuy imata qawachkaspaykipas
manam kasukunkichu.
Rinrikiwan uyarichkaspaykipas
manam imapas qokusunkichu.
21 Allin ruraq Dios kaspanmi Tayta Diosqa
yachachikuyninta hatunchaspa reqsisqata rurarqa.
22 Chaywanpas kay runakunatam saqueaspa suwanku.
Uchku trampapim llapallankuta hapiruspanku
carcelpi presocharachinku.
Saqueachikuptinkupas
manam kanchu libraqninku.
Suwachikuptinkupas
manam kanchu:
“Kutichipuychik” nispa niqninku.
23 ¿Mayqannikichiktaq kaykunamanta
cuentata qokunkichik?
¿Mayqannikichiktaq hamuq tiempokunamanta
entiendespa uyarinkichik?
24 ¿Pitaq saqerqa Jacobpa castankuna
saqueasqa kanankuta?
¿Pitaq saqerqa Israelpa castankuna
salteasqa kanankuta?
Cheqaptapunipas ¿manachum Tayta Dios
dejarqa chayna kanankuta?
Tayta Diospa contranpim huchallikurqanchik.
Paypa munasqanman hina kawsaytam mana munarqakuchu.
Yachachikuyninkunatapas manam kasukurqakuchu.
25 Chayraykum paykunapa contranpi
piñakuspa castigarqa.
Chayraykum mancharikuypaq guerrata kachaykamurqa.
Paykunapa muyuriqninpim lenguachkaq ninata kañaykachirqa.
Chaywanpas paykunaqa manam entienderqachu.
Hinaptinmi paykunata chay nina ruparurqa.
Chaywanpas paykunaqa manam cuentata qokurqakuchu.