Israelpa mirayninkunata librananpaq Dios prometesqanmanta
41
Tayta Diosmi nin kaynata:
Qayllaypiyá qasillalla kaychik
lamar qochapa patanpi nacionkuna.
Mosoqmantayá kallpanchakuychik
llapallan runakuna.
Hamuychik kay asuntomanta rimananchikpaq.
Huñunakusunchik tanteanakunanchikpaq.
2 ¿Pitaq rikchaykachimurqa intipa qespimunan lawmanta?
¿Pitaq qayamurqa Diospa agradonpaq hina allin ruraqta?
¿Pitaq payman nacionkunata qoykun
reykunapas chay reyman sujetakunanpaq?
¿Pitaq payman nacionkunata qoykun
espadanwan polvota hina rurananpaq?
¿Pitaq payman nacionkunata qoykun
flechana armawan wayrapa apasqan qopata hina rurananpaq?
3 Paymi enemigonkunata qatikachaspa
hawkalla pasan.
Ñantapas altollantaña purichkaq hinam pasan.
4 ¿Pi ruraspataq chaykunataqa qespichirqa?
¿Pitaq qallariyninmanta imapas kananpaq kamachirqa?
Ñoqa Tayta Diosmi punta kaqkunataqa kamachirqani.
Ñoqa Tayta Diosmi qepa kaqkunataqa kamachirqani.
5 Lamar qochapa patanpi nacionkunam qawarqaku.
Pasaypaq mancharikuywanmi paykunaqa qawarqaku.
Llapallan kay pachapi kaqkunam katkatatachkan.
Paykunaqa hichpaykamuspam chayamuchkan.
6 Sapa maestrom maestromasinta yanapan.
Sapakamam llamkaqmasinta kallpanchan.
7 Taytachakuna ruraqmi kallpanchan alhaja ruraqta.
Martillowan llaspayachiqmi kallpanchan yunquepi takaqta.
“Sumaqmi kachkan soldasqaykiqa” nispanmi willan.
Taytachantam clavokunawan mana kuchpakurunanpaq seguran.
8 Yaw serviqniy Israelpa castankuna,
Yaw akllakusqay Jacobpa castankuna,
Yaw amistadniy Abrahampa mirayninkuna,
9 kay pachapa cantonmantaraqmi
qamkunata pusamurqaykichik.
Tukuy hinastinmantaraqmi
qamkunataqa qayamurqaykichik.
Kaynata nispaymi qayamurqaykichik:
“Qamkunaqa serviqniymi kankichik” nispa.
“Mana qepanchaspaymi akllakurqaykichik” nispa.
10 Amayá manchakuychikchu.
Ñoqam qankunawan kachkani.
Amayá hukmanyaychikchu.
Ñoqam Diosnikichik kani.
Kallpanchaspaymi yanapasqaykichik.
Churinta alleq makinwan hapichkaq runa hinam
allinta ruraspa atiyniywan pusasqaykichik.
11 Contraykichikpi llapallan piñakuqkunam
penqaypi rikurinqaku.
Contraykichikpi llapallan piñakuqkunam
humillachisqa kanqaku.
Qamkunawan atipanakuqkunam
pasaypaq chinkachisqa kanqaku.
12 Maskaspapas manam tarinkichikchu
qamkunawan churanakuqkunataqa.
Pasaypaq chinkachisqam kanqa
qamkunawan peleaqkunaqa.
13 Ñoqa Tayta Diosmi alleq makikichikmanta
hapiqnikichik kani.
“Ama manchakuychikchu,
ñoqam yanapasqaykichik”
niqnikichikmi kani.
14 Ñoqa Tayta Diosmi nini:
Yaw Jacobpa castankuna,
uru hina despreciasqa kaspaykichikpas,
yaw Israelpa castankuna,
uru hina despreciasqa kaspaykichikpas
ama manchakuychikchu.
Ñoqam yanapaqnikichik kani.
Israelpa Chuya Diosninqa
reclamaqnikichikmi kani.
15 Erapi trillana carretata hinam
rurasqaykichik.
Mosoq kirusapa carretata hinam
rurasqaykichik.
Trillachkaq hinam orqokunata
pasaypaq kutarunkichik.
Trillachkaq hinam moqokunata
ñutu qopata hina rikurirachinkichik.
16 Wayrachiptikichikmi wayra apanqa.
Nisyu wayram lliw cheqeranchinqa.
Qamkunam ichaqa kusikunkichik ñoqa Tayta Diosrayku.
Qamkunam ichaqa alabakunkichik Israelpa Chuya Diosnin kasqayrayku.
17 Wakcha runakunam tomanankupaq yakuta maskachkanku.
Mana imayoq runakunam yakuta maskachkanku.
Qallunkum pasaypaq chakisqa kachkan.
Yakuta mana tariptinkum chakisqa kachkan.
Chaywanpas ñoqa Tayta Diosmi paykunataqa contestasaq.
Israelpa ñoqa Diosninmi paykunataqa mana qonqaspay uyarisaq.
18 Chaki orqokunamantam mayukunata toqyachisaq.
Qechwakunapim pukyukunata rikurichisaq.
Chunniqkunatam qochakunaman tikrachisaq.
Chaki allpakunamantam yakukunata toqyachisaq.
19 Chunniqkunapim plantasaq
cedrokunatawan acacia sachakunata.
Chunniqkunapim plantasaq
macha-machakunatawan aceitunas sachakunata.
Araba sutiyoq chunniqpim
wiñachisaq olmo sachatawan boj sachakunata.
20 Chaykunatam rurasaq
llapallan runakuna qawaspa yachananpaq.
Chaykunatam rurasaq
llapallan runakuna entiendenanpaq.
Chaynapim ñoqa Tayta Diospa atiyniywan
rurasqayta entiendenqaku.
Chaynapim Israelpa Diosnin kaspay unanchasqayta entiendenqaku.
Tayta Dios cheqap Dios kasqanmanta
21 Ñoqa Tayta Diosmi kaynata nini:
Taytacha-mamachakuna,
hamuychikyá atipanakunanchikpaq.
Jacobpa ñoqa reyninmi kaynata nini:
Taytacha-mamachakuna,
asuykamuychikyá churanakunanchikpaq.
22 Hamuq punchawkunamanta willawanaykikupaqyá hamuychik.
Ñawpa tiempokunamanta willawanaykikupaqyá hamuychik.
Hinaptinqa ñoqaykum uyarisqaykiku.
Hamuq tiempokunapi pasakunanmantayá willawayku.
Chaynapim chaykuna imapim tukunanta yachasaqku.
23 Willawaykuyá hamuq tiempokunapi pasananmanta.
Chaynapim cheqaptapuni yachasaqku
dioskuna kasqaykichikmanta.
Atisqaykichikta allin kaqta
otaq mana allin kaqta ruraychik.
Hukmanyaspa manchakunaykupaq kaqtayá ruraychik.
24 Manam imapaschu kankichik qamkunaqa.
Manam imapaqpas valenchu rurasqaykichikkunaqa.
Millakuypaqmi qamkunata akllaqkunaqa.
25 Norte lawmantam rikchachimuchkani runataqa.
Intipa qespimunan lawmantam chayachimuchkani paytaqa.
Sutiyta qayakuqmi payqa.
Gobiernaqkunatam mituta hina sarupanqa.
Mituta ollero sarupachkaq hinam sarupanqa.
26 Kaykunataqa ¿pitaq ñawpaqmantaraq willakurqa?
Yachanaykupaqqa ¿pitaq willakurqa?
Kaykunataqa ¿pitaq ñawpaqmantaraq rimarqa
cheqap kasqanta aceptanaykupaqqa?
Manam mayqannikichikpas willawarqankikuchu.
Manam mayqannikichikpas uyarichiwarqankikuchu.
Rimasqaykichiktaqa manam pipas uyarirqaykikuchu.
27 Ñoqam puntata
Sion Moqopi yachaqkunaman willarqani.
Ñoqam puntata
paykunaman:
“Kayqayá chaykunaqa” nispa willarqani.
Jerusalen llaqtamanmi
allin noticia willakuqta kacharqani.
28 Qawaptiypas manam pipas rikurimunchu.
Wakin dioskunamantaqa
manam mayqanpas rikurimunchu.
Consejananpaqqa manam pipas kanchu.
Tapukuyniykunata contestawananpaqqa
manam pipas kanchu.
29 Llapallankum chaykunaqa mana imapaschu.
Rurasqankupas manam imapaqpas valenchu.
Chaykunaqa mana imayoq taytachakunallam.
Chaykunaqa vacio ukuyoq wayra hinallam.