Jerusalen llaqtata Tayta Dios consuelasqanmanta
40
Yupaychasqaykichik Tayta Diosmi nin:
Runaykunata consuelaychik.
Paykunata consuelaychik.
2 Kuyapayakuywanyá Jerusalen llaqtapi kaqkunata rimapayaychik.
Paykunamanyá qaparispa willaychik
sirviente kayninkupi ñakarisqanku tukurusqanta.
Willaychiktaqyá huchankumanta pagasqaña kasqanta.
3 Qayakuqmi nin:
Allichaychik chunniqpi Tayta Diospa ñanninta.
Derechaychik purunpi Diosninchikpa purinankunata.
4 Altoyachun llapallan wayqokuna.
Pasaypaqta pampayachun orqokuna.
Pasaypaqta pampayachun moqokuna.
Pampayanqam moqo-moqo ñankuna.
Pampayanqam kallka-kallka ñankuna.
5 Chaymi Tayta Dios kanchariyninta qawachinqa.
Llapallan runakunam chayta rikunqa.
Kikin Tayta Diosmi chaynata rimarqa.
6 Uyarirqanim kayna niq vozta:
Qayaykachakuy,
niwaqniyta.
Hinaptinmi tapurqani payta:
¿Ima nispaytaq qayaykachakusaq?
nispa.
Paymi niwarqa:
Llapallan runaqa qora hinallam.
Allin rurayninkupas chakrapi wayta hinallam.
7 Tayta Dios wayrachimuptinqa qoraqa chakiruqllam.
Tayta Dios wayrachimuptinqa waytapas wichiruqllam.
Cheqaptapunipas runakunaqa qora hinallam.
8 Chakirunmi qoraqa,
waytapas wichirunmi,
Diosninchikpa palabranqa
takyanqa wiña-wiñaypaqmi.
9 Sion Moqopi yachaqkuna,
alto orqoman seqaruychik.
Allin noticiata willakuspa
hatun vozpi qaparimuychik.
Jerusalen llaqtapi yachaqkuna,
ama manchakuspa
allin noticiata willakamuychik.
Juda nacionpi llaqtakunaman willamuychik:
¡Diosninchikqa kaypim kachkan!
nispa nimuychik.
10 Atiyninwanmi Señor Diosqa hamuchkan.
Atiyninwantaqmi tukuypi munaychakuchkan.
Pagonqa paywantaqmi kachkan.
Pagonqa qayllanpitaqmi kachkan.
11 Ovejankuna michiq hinaraqmi hamunqa.
Uñachankunatam brazonpi hoqarinqa.
Marqayninpim paykunata apaykachanqa.
Uña wawayoq ovejakunatam allillamanta pusanqa.
Israelpa yupaychasqan Tayta Diosqa ancha munayniyoq kasqanmanta
12 ¿Pitaq tupurqa yakukunata putqoyninwan?
¿Pitaq tupurqa enteron cielokunata cuartanwan?
¿Pitaq kullurqa enteron kay pachapi ñutu allpata?
¿Pitaq pesarqa romananwan orqokunata?
¿Pitaq pesarqa balanzanwan moqokunata?
13 ¿Pitaq yachanman Tayta Diospa piensasqanta?
¿Pitaq atinman pay consejayta?
14 ¿Pitaq payta consejaspa entiendechirqa?
Quejapi allinta arreglananpaq ¿pitaq payta yachachirqa?
¿Pitaq payta yachachirqa yachaysapa kananpaq?
¿Pitaq yachachirqa ancha entiendeq kananpaq?
15 Paypaqqa nacionkunaqa puyñupi puchuruq sutuy yaku hinallam.
Paypaqqa nacionkunaqa balanzapi ñutu polvo hinallam.
Lamar qochapi islakunataqa pesan ñutu polvota hinallam.
16 Libano Orqokunapi animalkunapas
manam kamanmanchu
Tayta Diosman ofrendata kañanankupaq.
Libano Orqokunapi sachakunata yantaptinkupas
manam kamanmanchu
altarninpi ofrenda kañanankupaq.
17 Llapallan nacionkunapas
manam imachu paypa qayllanpiqa.
Llapallan nacionkunapas
manam imapaqpas valenchu qayllanpiqa.
18 ¿Pimantaq rikchachinkichik Tayta Diostaqa?
¿Imaman rikchakuqtataq rurawaqchik paytaqa?
19 Taytachakuna ruraqmi fundisqa taytachata rurarun.
Alhajakuna ruraqmi chayta qoriwan qaracharun.
Chaytam qollqe cadenawan allicharun.
20 Mana qori-qollqe ofrendayoq runam
taytachanpaq kulluta akllarun.
Mana ismuq kulluta tarispam
allin llamkaq maestrota maskarun.
Sumaqta hapirachispam manaña kuchpakunanpaq segurarun.
21 ¿Manachum qamkunaqa yacharqankichik?
¿Manachum qamkunaqa uyarirqankichik?
¿Manachum qallariyninmantaraq
pipas nisurqankichik?
Kay pacha unanchasqa kasqanmantaraq
¿manachum entienderqankichik?
22 Kay pachapa ruyrunpa altonpiraqmi
Tayta Diosqa tiyachkan.
Aqarwaykunata hinaraqmi
runakunatapas payqa qawamuchkan.
Tolderata mastarichkaq hinam
cielokunatapas mastarin payqa.
Yachanapaq karpatapas sayachichkaq hinam
cielokunata sayachin payqa.
23 Payqa mana kaqmanmi churan
kamachikuq runakunata.
Mana imapaqpas valeqtam ruran
kay pachapi jefekunata.
24 Chayraq plantasqa plantachakuna hinam paykunaqa.
Allpapi chayraq sapichakuchkaq planta hinam paykunaqa.
Wayrata Tayta Dios pukurachimuptinmi lliw chakirun.
Qopata hina sinchi wayra aparuptinmi chinkarun.
25 Chuya Tayta Diosmi tapukun:
¿Pimantaq rikchachiwankichikman?
nispa.
¿Pitaq ñoqaman rikchakunman?
nispa.
26 Qawariychik alto cielokunata.
¿Pitaq unancharqa chaykunata?
Lucerokunata tropankunata hina yupaspa horqomuqmi.
Sapakamata sutinwan sutichaqmi.
Chulla luceropas mana faltachiqmi.
Ancha hatunmi paypa atiyninqa.
Ancha hatunmi paypa kallpanqa.
27 Jacobpa castankuna ¿imanasqataq quejakunkichik?
Israelpa castankuna ¿imanasqataq ninkichik:
Tayta Diosqa manam qawarinchu imaynam kawsasqayta,
nispa?
¿Yupaychasqay Diosqa
manam ñoqamanta nanachikunchu,
nispa?
28 ¿Manachum qamkunaqa yacharqankichik?
¿Manachum qamkunaqa uyarirqankichik?
Tayta Diosmi wiña-wiñaypaq kawsaq Diosqa.
Tayta Diosmi enteron kay pacha unanchaqqa.
Manam payqa desmayanchu nitaqmi pisipanchu.
Ancha yuyayniyoq kaynintaqa manam pipas haypanmanchu.
29 Paymi qon kallpata desmayasqakunaman.
Kallpantam masyachin mana kallpayoqkunaman.
30 Mozokunam desmayaspa pisiparunku.
Jovenkunam mitkaruspa wichiykunku.
31 Tayta Diospi confiakuqkunam ichaqa
mosoqmanta kallpanchakunqaku.
Paypi confiakuqkunam ichaqa
anka hinaraq pawarinqaku.
Kallpaspankupas manam pisipanqakuchu.
Maynata purispankupas manam desmayanqakuchu.