Nacionkunata Tayta Dios castigananmanta
34
Nacionkuna,
uyarinaykichikpaqyá asuykuychik.
Runakuna,
qamkunapas chaynataqyá uyariychik.
Kay pachapas chaypi kaqkunapiwanyá uyarichunku.
Kay pachapi runakunapas chaypi wiñaqkunapiwanyá uyarichunku.
2 Nacionkunapaqmi Tayta Dios piñasqa kachkan.
Chay nacionkunapa tropankunapaqmi payqa rabiakuchkan.
Chinkachisqa kanankupaqmi payqa sentenciarun.
Wañuchisqa kanankupaqmi payqa entregarun.
3 Paykunamanta wañuqkunam pampapi wischurayanqa.
Paykunamanta ayakunam pasaypaqta asnarinqa.
Orqokunapim yawarninkuwan nuyunqa.
4 Cielokunapi llapallan lucerokunam wichirirunqa.
Cielokunapas papel wankusqa hinam rollokurunqa.
Cielokunapi llapallan lucerokunam wichiramunqa.
Uvaspa rapin wichichkaq hinam wichiramunqa.
Higos sachapa rapin wichichkaq hinam wichiramunqa.
5 Tayta Diosmi nin:
Cielokunapim espaday sinka runa hina rikurirunqa.
Edom nacionpa hawanmanmi wichiykamunqa.
Chinkachisqa kananpaqmi ñoqapaq rakisqa kanqa.
6 Tayta Diospa espadanmi yawarwan chapukunqa.
Paypa espadanmi wirakunawan chapukunqa.
Chapukunqaqa malta carnerokunata Tayta Diospaq nakaptinku
yawarninwan chapukuchkaq hinam.
Chapukunqaqa cabrakunata Tayta Diospaq nakaptinku
yawarninwan chapukuchkaq hinam.
Chapukunqaqa carnerokunata Tayta Diospaq nakaptinku
rurunninpi wirakunawan chapukuchkaq hinam.
Tayta Diospaq animalta wañuchipusqankuta hinam
paypas runakunata wañuchinqa Bozra llaqtapi.
Paypaq achka animalkunata wañuchisqankuta hinam
paypas runakunata wañuchinqa Edom nacionpi.
7 Monte torokunam paykunawan wañuspa wichinqaku.
Malta torokunawan poqosqa torokunam wañuspa wichinqaku.
Allpankum sinka runa chapukuruq hina yawarwan chapukunqa.
Polvonkum wirawan chapukunqa.
8 Tayta Diospa vengakunan punchawmi kanqa.
Sion Moqopi llaqtapa asunton arreglana watam kanqa.
9 Edom nacionpa mayunkunam tikrakunqa breaman.
Polvokunam tikrakunqa azufreman.
Allpankunam tikrakunqa rupachkaq breaman.
10 Mana wañuspam tuta punchaw rupanqa.
Wiña-wiñaypaqmi qosnin wicharinqa.
Wiña-wiñaypaqmi purmachisqa kanqa.
Manaña chayninta pipas purinankamam chunninqa.
11 Chuseqwan erizo animalkunam chaypi dueñochakurunqaku.
Tukuwan cuervo animalkunam chaypi yachanqaku.
Tayta Diosmi cordelta
chutachkaq hina
Edom nacionta purmachinqa.
Tayta Diosmi plomada churachkaq hina
Edom nacionta chunnichinqa.
12 Manañam kanqachu reqsisqa runakunapa gobiernonqa.
Manañam kanqachu chay nacionpa kamachiqninkuna.
13 Palacionkunapim wiñanqa kichkakunaña.
Mana yaykuy atina llaqtakunapim wiñanqa itanakunaña.
Mana yaykuy atina llaqtakunapim wiñanqa cardokunaña.
Atoqkunañam chaypiqa yachanqa.
Avestruz animalkunañam chaypiqa yachanqa.
14 Purun animalkunam hiena animalkunawan chaypi tupanqa.
Monte cabrakunam chaypi qaparkachaspa qayanakunqa.
Tuta puriq animalkunam chaypi samakunqa.
Samanankupaqmá sitiota chaypi tarinqa.
15 Vibora sutiyoq culebram chaypi qesachakuspa oqllanqa.
Chaykunata lloqsichispam llantuypi waqaychanqa.
China wamankunam chaypi orqonkunawan huñunakunqa.
16 Tayta Diospa librontayá qawaychik.
Paypa libronpiyá leeychik.
Manam kay animalkunamantaqa
hukllanpas faltanqachu.
Manam kay animalkunamantaqa
chinanpas-orqonpas faltanqachu.
Tayta Diosmi ñoqantakama kamachirqa chaynata.
Espiritunwanmi kikin huñunachinqa chaykunata.
17 Sapa animalpaqmi tupaqnin sitiota señalarqa.
Kikinpunim allpankuta chaykunaman partirqa.
Wiñaypaqmi chaypi dueñochakunqaku.
Wiñaypaqmi chaypi yachanqaku.