Tayta Diosllapi suyanamanta
33
¡Ay,
imaynaraq kankichik,
purmachiq kachkaspa mana purmachisqakuna!
¡Ay,
imaynaraq kankichik,
traicionaq kachkaspa mana traicionasqakuna!
Purmarachispallaykichikmi purmachisqa kankichik.
Traicionaruspallaykichikmi traicionasqa kankichik.
2 Dios Taytalláy,
llakipayariykullawaykuyá qamllapi suyasqaykurayku.
Qamyá sapa tempranon kallpanchawayku.
Qamyá llakikuy tiempokunapi salvaykuwayku.
3 Qayakuynikita uyariykuspankum runakuna ayqekunku.
Qam hatariykuptikim nacionkuna cheqerunku.
4 Yaw nacionkuna,
aqarwaypa qechusqanta hinam qechusunkichik.
Qori-qollqekichikta qechusunaykichikpaqmi
nacionkuna aqarway hina pawaykamusunkichik.
5 Tayta Diosmi hatunchasqa kachkan.
Payqa alto-altopim yachachkan.
Sion Moqopi llaqtatam allin arreglaykunawan huntachinqa.
Sion Moqopi llaqtatam allinkuna ruraywan huntachinqa.
6 Paymi tiempoykipi confianzata qosunki.
Paypim qori-qollqe tesoro hina kachkan salvacionniki.
Paypim qori-qollqe hina kachkan yuyaysapa kanaykipaq.
Paypim qori-qollqe hina kachkan yachanaykipaq.
Tayta Diostam respetanayki
chay qori-qollqeta chaskinaykipaq.
7 Callekunapi mana manchakuq soldadokunapa
qaparkachasqantayá uyariychik.
Hawkayachinanpaq kachamusqakunapa ancha
waqasqantayá uyariychik.
8 Chunnichkanmi hatun ñankuna.
Chaynintaqa purinñachu runakuna.
Contratotam yanqacharunku.
Testigokunatam qepanchakurunku.
Manaña pitapas respetaqmi rikurirunku.
9 Eqoyasqa runa hinam allpa llakisqa kachkan.
Libano Orqopi sachakunam ismuspan penqaypi hina kachkan.
Saron Qechwam kunanqa chunnichisqaña kachkan.
Basan lawpi sachakunam manaña rapiyoq kachkan.
Carmelo Orqopi plantakunam manaña rapiyoq kachkan.
10 Tayta Diosmi nin:
Kunanmi ñoqa hatarisaq.
Kunanmi ñoqa hatunchasqa kasaq.
Kunanmi ñoqa alabasqa kasaq.
11 Qamkunapa tanteasqaykichikqa qopa hinallam.
Qamkunapa rurasqaykichikqa paja hinallam.
Samaynikichikqa tukurusuqnikichik nina hinallam.
12 Runakunam isku hina kanankama uchpayarunqa.
Kuchumusqa kichkakuna hinam ruparunqa.
13 Karupi kaqkuna,
uyariychik
imam rurasqaymanta.
Hichpapi kaqkuna,
qamkunapas yachaychik
kallpasapa kasqaymanta.
14 Sion Moqopi huchasapakunam mancharikunku.
Dios mana adoraqkunam pasaypaqta katkatatanku.
Paykunam ninku:
¿Mayqanninchiqtaq yachachwan rupakuq nina ukupi?
nispa.
¿Mayqanninchiktaq yachachwan wiña-wiñaypaq rupakuq nina ukupi?
nispa.
15 Allinkunata ruraspa cheqap rimaqmi,
engañowan qollqe ganayta mana munaqmi,
yanqamanta regalo mana chaskiy munaqmi,
runa wañuchiqkunapa consejasqanta mana uyariqmi,
mana allinkunata mana qaway munaqmi
16 alto-altokunapi yachanqa.
Amparakuna altokunapi pakakunqa.
Mikunanmi mana faltanqachu.
Yaku tomananmi mana pisinqachu.
17 Ñawinkunam reypa sumaqllaña kasqanta qawanqa.
Nacionninpa tukuy hinastinman mirasqantam qawanqa.
18 Mancharikuypi kawsasqaykita yuyarispam ninki:
¿Maypitaq kachkan contribucion qollqe yupaqqa?
¿Maypitaq kachkan contribucion qollqe pesaqqa?
¿Maypitaq kachkan torrekuna yupaq runaqa?
nispa.
19 Mana llakipayakuq runakunataqa manañam rikunkichu.
Rimasqankupas mana entiendena chay runakunataqa manañam rikunkichu.
Chay wata qallu hina runakunataqa manañam rikunkichu.
20 Sion Moqopi llaqtatayá qawariy.
Hatun fiestakuna rurananchik llaqtatayá qawariy.
Jerusalen llaqtatam qawanki.
Hawka samarina llaqtatam qawarinki.
Mana suchuchina karpa hinam kanqa.
Estacankunapas mana chutasqa hinam kanqa.
Waskankunapas mana tipisqa karpa hinam kanqa.
21 Chaypim atiyniyoq Tayta Dios ñoqanchikpaq kanqa.
Mayukunapa kanan sitio hinam kanqa.
Llimparistin kallpaq ancho mayu hinam kanqa.
Kaspimanta qachinayoq buquekunaqa manam yaykunqachu.
Hatu-hatun buquekunapas manam yaykunqachu.
22 Juezninchikqa Tayta Diosmi.
Decretokuna qowaqninchikqa Tayta Diosmi.
Reyninchikqa Tayta Diosmi.
Salvaqninchikpas Tayta Diosmi.
23 Yaw enemigoyku,
chay buquekichikkunapa waskankunaqa
manañam hapinqachu.
Buquekichikpa hatun kaspintaqa
manañam takyachinqachu.
Wayrapa pukunan telatapas
manañam chutanqañachu.
Nana-nanaq qori-qollqekichikta
qechuspam rakinakunqaku.
Wistu runakunapas qechususqaykichikkunata
rakinakuspam apanqaku.
24 Sion Moqo llaqtapi yachaqkuna,
manañam mayqannikichikpas ninkichikñachu:
“Onqochkanim” nispaqa.
Chaypi yachaqkunapa mana allin rurasqankutaqa.
Tayta Diosmi pampachanqa.