Allinkunallata ruraspa gobiernaq reymanta
32
Allinkunallata ruraspa gobiernaq reymi kanqa.
Allinta arreglaspa gobiernaq kamachikuqkunam kanqa.
2 Sapakamam wayramanta harkachikuna hina kanqa.
Paykunam kanqa
chaki allpapi mayukuna hina.
Paykunam kanqa
mana yakuyoq allpapi qaqapa llantuynin hina.
3 Ñawinkum sumaqta kicharayanqa qawanankupaq.
Chayllam kanqaku atencionwan uyarinankupaq.
4 Manam loco hinachu imatapas ruranqaku.
Aswanqa yachaywan chaynataq entiendeywanmi ruranqaku.
Wata qallukunam sumaqtaña rimanqaku.
5 Rumi sonqo runataqa manañam:
Reqsisqa allin runam payqa,
ninqakuchu.
Kullu uya runataqa manañam:
Allin runam payqa,
ninqakuchu.
6 Rumi sonqo runaqa chayna kayninman hinam riman.
Huchakuna rurananpaqmi sonqonpi yuyaymanan.
Diospa millakusqankunatam ruran.
Tayta Diospa contranpim pantanapaq kaqkunallata riman.
Yarqasqakunamanmi mikunanpaq mana qoykunchu.
Yakunayasqakunamanmi yakuta mana tomaykachinchu.
7 Kullu uya runapa rurayninqa mana allinkunallam.
Payqa tantean mana allinkunallatam.
Llullakunawanmi wakchakunata
astawan wakchayarachin.
Mana piyniyoq runapa allin arreglo mañakusqantam
llullakunawan hukmanyarachin.
8 Allin runaqa chayna kayninman hinam tantean.
Payqa allin runa kayninman hinam cumplin.
Jerusalen llaqtapi warmikunapa contranpi willakuymanta
9 Mana imamanta preocupakuq warmikuna,
uyariychik qamkunaman nisqayta.
Kikillaykichikpi confiakuq warmikuna,
uyariychik qamkunaman nisqayta.
10 Yaw warmikuna,
confianzallawanñam kachkankichik.
Ichaqa kaymanta wata masninmanmi katkatatankichik.
Manañam uvas pallay kanqañachu.
Manañam cosechapas kanqañachu.
11 Mana imamantapas preocupakuq warmikuna,
mancharikuychik.
Kikillaykichikpi confiakuq warmikuna,
mancharikuychik.
Kikillaykichikpi confiakuq warmikuna,
katkatataychik.
Chay pachaykichikta llustikuychik
hinaspa luto pachawan churakuychik.
12 Qasqoykichikta takakuspa qapariychik.
Sumaqllaña chakrakuna
manaña imayoq kasqanraykuyá qapariychik.
Sumaqllaña uvas huerta
manaña cosechayoq kasqanraykuyá qaparkachaychik.
13 Runaykunapa allpanpim wiñanqa.
Kichkakunawan cardokunam wiñanqa.
Chayraykuyá qamkunaqa qapariychik.
Kusikuypa kanan wasikunamantayá qapariychik.
Kusikuypa kanan llaqtamantayá qapariychik.
14 Palaciopas chunnichisqam kanqa.
Llaqtapi achkallaña runakunam saqesqa kanqa.
Mana yaykuy atina llaqtam wiñaypaq tuñichisqa kanqa.
Llaqta qawana torrekunam wiñaypaq tuñichisqa kanqa.
Chaypim monte asnokunaña kusisqa kakunqaku.
Chaypim ganadokunaña michisqa kanqaku.
15 Chaynaqa kanqa ñoqanchikman
altomanta Espiritu hamunankamam.
Chaynaqa kanqa kaqllamanta ñoqanchikman
Espiritu hamunankamam.
Hinaptinmi chunniq allpa
tukuy imapa qespinan allpaman tikrakunqa.
Hinaptinmi tukuy imapa qespinan allpa
montemanña rikchakunqa.
16 Chay chunniq allpapim
ima asuntotapas allinta arreglanqaku.
Chay tukuy imapa qespinan allpapim
allinkunata ruranqaku.
17 Allinkuna rurasqankuwanmi hawkalla kanqaku.
Allinkunata ruraspankum samakunqaku.
Wiña-wiñaypaqmi Diosllapi confiakunqaku.
18 Runaykunaqa hawka sitiokunapim yachakunqaku.
Runaykunaqa seguro wasikunapim yachakunqaku.
Mana pipapas manchachisqanmi samana sitiokunapi yachanqaku.
19 Montepi sachakunata runtu para tukuruptinpas
chaynataq llaqtata pampata hinaña ruraruptinpas
20 qamkunaqa ancha kusisqam kawsakunkichik.
Achkallaña yakuyoq chakrakunapim tarpunkichik.
Bueyesnikichiktam achka pastoyoq
echaderokunaman kachaykunkichik.
Asnoykichiktapas achka pastoyoq
echaderokunamanmi kachaykunkichik.