Sion Moqopi llaqtaman kutimuqkunamanta
35
Chunniq sitiom kusikunqa.
Chaki allpam anchata kusikunqa.
Purun waytakuna hinam waytanqa.
2 Waytaruspam anchata kusikunqa.
Kusikuymantam qaparinqa.
Libano Montepa sumaqllaña kayninta hinam
chaypi rikurichinqa.
Carmelo Orqopa sumaqllaña kayninta hinam
chaypi rikurichinqa.
Saron Qechwapa sumaqllaña kayninta hinam
chaypi rikurichinqa.
Tayta Diospa atiyniyoq kaynintam
paykuna rikunqa.
3 Utisqa makiyoqkunatayá kallpanchaychik.
Katkatataq moqoyoqkunatayá kallpanchaychik.
4 Mancharisqa sonqoyoqkunatayá niychik:
Valorchakuspa,
ama manchakuychikchu,
nispa.
Diosnikichikmi kayman hamuchkan
qamkunamanta vengakunanpaq,
nispa.
Diosnikichikmi hamuchkan
merecesqankuman hina pagananpaq,
nispa.
Diosnikichikmi hamuchkan
qamkunata salvasunaykichikpaq,
nispa.
5 Hinaptinqa ñawsakunam qawarikunqa.
Hinaptinqa mana uyariqkunam uyarikunqa.
6 Wistukunam luwichu hinaraq pawaykachanqaku.
Upakunam sumaqllataña qaparinqaku.
Chunniqpim yakukuna toqyanqa.
Chaki allpakunapim mayukuna kallpanqa.
7 Chay chaki allpapim qochakuna kanqa.
Chay chaki allpapim pukyukuna kanqa.
Atoqkunapa puñunankunapim pastokunaña wiñanqa.
Soqoskunapiwan tuturakunam chaypi wiñanqa.
8 Hatun ñan chaypi kaptinmi sutichanqaku.
Diospaq Sapaqchasqa Ñanwanmi sutinchanqaku.
Manam chayninta purinqachu
Diospa mana chaskinanpaq hina kaqkunaqa.
Diospa munasqanman hina kawsaqkunallapaqmi
kanqa chay ñanqa.
Sonso runakunaqa manam purinqachu chaynintaqa.
9 Chaypiqa manam kanqachu leonkunapas.
Manam purinqachu kachukuq purun animalpas.
Chay ñannintaqa hamunqaku librasqakunallam.
10 Tayta Diospa librasqankunallam
chay ñannintaqa kutimunqaku.
Sion Orqopi llaqtamanmi yaykunqaku.
Kusikuy qapariyllawanñam yaykunqaku.