Jerusalen llaqta librasqa kananmanta
29
Ay,
aArielwan sutichasqa llaqta ¡imaynaraq kanki!
Davidpa samarinan Jerusalen llaqta ¡imaynaraq kanki!
Hinaraqyá iskay-kimsa watakuna pasarichun.
Hinaraqyá hatun fiestaykikunapas qatinakuchun.
2 Ñoqam qam Ariel llaqtata sasachakuykunapi churasqayki.
Waqaspa llakikunaykipaqmi qam Ariel llaqtata kachisqayki.
Kañapuwanankupaq altar hinam qamqa kanki.
3 Muyuriqnikimanta atacasunaykipaqmi
tropakunapa campamentonta hatarichinankupaq kamachisaq.
Kaspimanta barrerakunata muyuriqnikipi
hatarichinankupaqmi kamachisaq.
Qamta atacasunaykipaqmi
paykunawan uchkukunata rurachisaq.
4 Qamqa humillasqa kaspam pampamanta rimanki.
Qamqa urmachisqa kaspam polvomanta rimanki.
Almapa voznin hinam allpamantaraq voznikipas uyarikunqa.
Wachachachaspa rimasqaykikunam polvomantaraq uyarikunqa.
5-6 Chaywanpas qonqayllamantam huk ratollapi castiganqa.
Llapallan Kamachiq Tayta Diosmi enemigoykikunata castiganqa.
Rayowan,
temblorwan,
hatu-hatun bullawanmi castiganqa.
Wayra-parawan,
loco parawan,
lenguachkaq ninawanmi chinkachinqa.
Nana-nanaq enemigoykikunam
ñutupasqa allpa hina polvoyarunqa.
Nana-nanaq ñakarichisuqnikikunam
qopa hina wayrapa apasqan kanqa.
7 Llapallan nacionkunamanta nana-nanaq runakunam,
Ariel sutiyoq llaqtapa contranpi peleaqkunam
sueñoy hinalla kanqaku.
Arí,
chay llaqtapa contranpi llapallan peleaqkunamá,
amparakunanku torrekunatapas atacaqkunamá,
hina chay ñakarichiq runakunamá
tuta mosqoypi rikusqanku hinalla kanqaku.
8 Imaynam yarqaymanta kaq runa
mikusqanpaq mosqon,
ichaqa rikchariruspanñataq yarqaymanta kachkan.
Chaynam kanqa Sion Moqopa contranpi
achkallaña nacionkunamanta peleaqkunaqa.
Imaynam yakumanta kaq runa
yaku tomasqanpaq mosqon,
ichaqa rikchariruspanñataq yakumanta kachkan.
Chaynam kanqa Sion Moqopa contranpi
achkallaña nacionkunamanta peleaqkunaqa.
9 Qamkunaqa hinallayá sonsoyasqa hina kaychik.
Qamkunaqa hinallayá qawakuq ñawsa kaychik.
Qamkunaqa hinallayá sinka hina tankikachaychik
vinowan mana sinkachkaspapas,
poqosqa aqawan mana machachkaspapas.
10 Qamkunamanmi Tayta Dios kachamusurqankichik.
Miskillaña puñunayaytam kachamusurqankichik.
Diosmanta willakuqkuna,
Diosmi ñawsayarachisunkichik.
Revelacionta rikuqkuna,
Diosmi umaykichikta velowan hina taparusunkichik.
11 Revelacion rikusqaykichikmi
qamkunapaq rikurirun qellqasqa libro hina.
Revelacion rikusqaykichikmi
qamkunapaq rikurirun rolloruspa sellarusqa libro hina.
Sichu leey yachaqman pipas qoykuspanqa paytam ninqa:
Kay librota leeykapuway,
nispa.
Ichaqa paymi ninqa:
Sellasqam kachkan.
Manam leeyta atiymanchu,
nispa.
12 Sichu mana leey yachaqman pipas qoykuspanqa paytam ninqa:
Kay librota leeykapuway,
nispa.
Ichaqa paymi ninqa:
Manam leeyta yachanichu,
nispa.
13 Señormi niwarqa:
Kay runakunaqa simillankuwanmi asuykamuwanku.
Kay runakunaqa hawa sonqollam yupaychawanku.
Sonqonkum ichaqa ñoqamanta karupi kachkan.
Paykunaqa runapa kamachisqanman hinallam adorawachkan.
Paykunaqa runapa yachachisqanman hinallam adorawachkan.
14 Chaynaqa mosoqmantam paykunapa qayllanpi rurasaq.
Admirakuypaq kaqkunatawan milagrokunatam rurapayasaq.
Yachaysapa runankunapa yachayninmi tukurunqa.
Entiendeq runankunapa entiendeyninmi tukurunqa.
15 ¡Ay,
imaynaraq kankichik,
Tayta Diosmanta pakakuqkuna,
tanteasqankunata pakanaykichikpaq pakakuqkuna!
¡Ay,
imaynaraq kankichik
tutayayllapi ruraynikichikta ruraspa:
“Manam pipas rikuwanchikchu” nispa niqkuna!
“Manam pipas cuentata qokunchu” nispa niqkuna.
16 Qamkunaqa tikranpatam piensankichik.
Olleroqa mitu hinalla kasqantam piensankichik.
Runapa rurasqanqa manam ninmanchu ruraqninta:
“Manam rurawarqankichu” nispaqa.
Mankaqa manam ninmanchu ruraqninta:
“Manam imatapas yachankichu” nispaqa.
Israel castata salvananpaq Diospa prometekusqanmanta
17 Manapas unaymantam Libano Orqopi monteqa
tukuy imapa qespinan allpaman tikrakunqa.
Manapas unaymantam tukuy imapa qespinan allpaqa
sachakunapa kasqan montemanña rikchakunqa.
18 Chay tiempopim upakunapas uyarinqaku.
Libromanta paykunapaq leepuptinkum uyarinqaku.
Chay tiempopim ñawsakunapas qawarikunqaku.
Ancha tutayaypi karuspankum qawarikunqaku.
19 Humildekunam kusikunqaku Tayta Diosrayku.
Pasaypaq wakchakunam kusikunqaku Israelpa Chuya Diosninrayku.
20 Runamasin mancharichiqkunam tukurunqaku.
Burlakuqkunam chinkachisqa kanqaku.
Mana allinkunalla maskaqkunam chinkarunqaku.
21 Tukurunqam runamasinta huchamanta culpaq.
Tukurunqam cortepi defiendeqpaq trampa hina ruraq.
Tukurunqam cortepi engañaspa
inocente runapaq allin arreglo mana ruraq.
22 Chayraykum Abraham libraq Tayta Dios nin.
Chayraykum Jacob castaman Tayta Dios nin:
Kunanmanta ñawpaqmanmi Jacobpa castankunaqa
manaña penqakunqakuchu,
nispa.
Kunanmanta ñawpaqmanmi Jacobpa castankunaqa
manaña ayayasqa uyayoqchu kanqaku,
nispa.
23 Tayta Diosqa nirqataqmi:
Jacobpa mirayninkuna qawaspankum,
paykuna ukupi rurasqankunata qawaspankum
Chuya Dios kasqayta cuentata qokunqaku.
Jacobpa Chuya Diosnin kasqaytam cuentata qokunqaku.
Israelpa Diosnintam anchallataña respetawanqaku.
24 Pantachisqakunam entiendeyta yachanqaku.
Qepanpi rimaqkunam yachachikuyta chaskinqaku.