Samaria llaqtapa contranpi willakuymanta
28
¡Ay,
imaynaraq kanqa Samaria llaqta!
Chay llaqtaqa Efrain castapa alabakunan llaqtam,
sinkaruspan coronawan uman adornakuq hina llaqtam.
Chay llaqtaqa chakisqa wayta hina kachkaspapas
Efrain castapa alabakunan llaqtam.
Chay llaqtaqa tukuy imapa wiñanan qechwapa hanayninpi kaq llaqtam,
vinoman qokuruq runakunapa alabakunan llaqtam.
2 Señormi hatallichkan kallpasapa runataqa.
Runtu para hina dañakuqmi chay runaqa.
Tukuy imapas tuñichiq wayra-para hinaraqmi chay runaqa.
Loco para hinaraqmi chay runaqa.
Manchakuypaq lloqlla hinaraqmi chay runaqa.
Chay runam pampakunaman chay llaqtata choqapanqa.
3 Efrain castapa alabakunan llaqtatam sarupanqa.
Sinkaruspan coronawan uman adornakuq hina llaqtatam sarupanqa.
4 Chakisqa wayta hina kachkaspapas
Efrain castapa alabakunan llaqtam
otaq tukuy imapa wiñanan
qechwapa hanayninpi kaq llaqtam.
Manaraq cosecha kachkaptin
chayraq rikurimuq higos hinam kanqa.
Chay higosta qawariykuspalla
mikurusqanku hinam kanqa.
5 Chay punchawmi llapallan kamachiq Tayta Diosqa
puchuq runankunapaq akchirichkaq corona hina kanqa.
Paykunapaqmá sumaq waytamanta corona hina kanqa.
6 Cortepi queja arreglaqkunamanmi yachayta qonqa.
Llaqta defiendeq tropakunatam kallpanchanqa.
Jerusalen llaqtaman prometesqanmanta
7 Paykunapas vinota tomaspam
tanki-tanki purinku.
Paykunapas poqosqa aqata upyaspam tamsaykachanku.
Sacerdotekunawan poqosqa aqata upyaspam tanki-tanki purinku.
Diosmanta willakuqkunam poqosqa aqata upyaspa
tanki-tanki purinku.
Paykunam vinota tomaspa sonsoykachanku.
Paykunam poqosqa aqata upyaspa tamsaykachanku.
Paykunam revelacionta qawaspa tankikachanku.
Paykunam quejapi sentenciaspanku aywikachanku.
8 Millakuypaq vomitasqankuwanmi mesankupas qachallaña.
Limpio mesankuqa manam kanchu,
lliwmi qachallaña.
9 Paykunam ñoqa Isaiasmanta rimaspanku ninku:
¿Pitataq payqa yachachichkan?
¿Pitataq payqa uyarisqanmanta entiendechichkan?
Warmachakunapas kaymanku hinam yachachiwachkanku.
Anukasqakunapas kaymanku hinam yachachiwachkanku.
10 Kayta-wakta ruraychik,
nispa.
Kayta-wakta kasukuychik,
nispa.
Kaylawpi asllatapas yachaychik,
nispa.
Waklawpi asllatapas yachaychik,
nispa.
11 Chayna kaspanku mana kasukuptinkuqa
sasa rimana idiomapim,
huklaw nacionniyoqpa idiomanpim,
Tayta Dios chay runakunaman rimapayanqa.
12 Puntamantaraqmi Tayta Dios paykunata nirqa:
Pisipasqa runa hawkayay tarinanpaq sitiom kayqa.
Pisipasqa runa samay tarinanpaq sitiom kayqa,
niptinpas manam kasukurqakuchu paykunaqa.
13 Chayraykum Tayta Dios paykunata
warmachakunaman hina rimapayanqa:
Kayta-wakta ruraychik,
nispa.
Kayta-wakta kasukuychik,
nispa.
Kaylawpi asllatapas yachaychik,
nispa.
Waklawpi asllatapas yachaychik,
nispa.
Purispankupas ankallanpam wichiykunqaku.
Paykunaqa heridasqam kanqaku,
toqllapim presocharachikunqaku.
14 Burlakuq runakuna,
Tayta Diospa nisqantayá uyariychik.
Jerusalen llaqtapi runaykunata gobiernaqkunapa nisqantayá uyariychik.
15 Qamkunam nichkankichik:
Contratotam rurarqaniku wañuywan.
Contratotam rurarqaniku wañusqakunapa kanan sitiowan
manchakuypaq desgracia hamuspa
mana hayparamuwanankupaq,
hatun desgraciapi rikuriptiyku
mana hayparamuwanankupaq.
Llulla rimaykunapim amparakurqaniku.
Engaño ruraykunapim pakakurqaniku.
16 Chayraykum Señor Dios kaynata nin:
Ñoqam Sion Moqopi churani akllasqa rumitaqa,
wasipa cimiento esquinan hapiq rumitaqa.
Manam hukmanyanqachu pipas chay rumipi confiakuqqa.
17 Chay wasita hatarichispaymi plomadawan hina
allin arreglota rurasaq.
Chay wasita hatarichispaymi nivelwan hina
allinta rurasaq.
Amparakunaykichikpaq maskasqaykichik llullakunatam
runtu para hina tukurunqa.
Engaño ruraypi pakasuqnikichiktam
yaku aparuchkaq hina tukurunqa.
18 Wañuywan contrato rurasqaykim yanqachasqa kanqa.
Wañusqakunapa kasqan sitiowan contrato rurasqaykipas
manaña cumplisqam kanqa.
Manchakuypaq desgraciam hayparamusunkichik.
Chay desgraciam qamkunata saruparusunkichik.
19 Sapa kutilla sucedeptinmi qamkunata hapisunkichik.
Sapa tutamanta rikurimuspam sucedesunkichik.
Tutapas-punchawpas rikurimuspanmi sucedesunkichik.
Uyarisqaykichikta entiendespallapas qamkunam katkatatankichik.
20 Chayna kasqaykichikwanmi
taksalla catrepi uychunpalla waqtapachkaq hina kankichik.
Chayna kasqaykichikwanmi
taksalla ancho frazadawan qatakuq hina kankichik.
21 Perazin Orqopi hatarispa rurasqanta hinam
Tayta Dios ruranqa.
Gabaon Qechwapi yanapananpaq hatarisqanta hinam
Tayta Dios ruranqa
chaynapi mana haykapipas rikusqanku rurayninta rurananpaq,
chaynapi mana entiendey atina rurayninta rurananpaq.
22 Amañayá qamkunaqa burlakuychikchu.
Cadenaykichikmi manaña teqosunkichikchu.
Uyarirqanim Llapallan Kamachiq Señor Diospa rimasqanta.
Uyarirqanim kay nacionta castigananpaq tanteasqanta.
23 Entiendespa uyariychik rimasqayta.
Sumaqta uyariychik palabraykunata.
24 Tarpukuq runa chakranta yapuspanqa
manam tukuy punchawchu barbechanqa.
Manam tukuy punchawchu kurpankunata allpayachinqa.
25 Manachum chakranta sumaqta pampayarachispanqa
ajonjoliytawan cominosta maqchinqa.
Trigotam maqchinqa sitionman.
Cebadatam maqchinqa lugarninman.
Wakin muhutañataqmi maqchinqa patankunaman.
26 Diosninmi paytaqa yachachin.
Imaynam tarpunanpaqmi yachachin.
27 Ajonjoliytaqa manam erapichu trillachinku.
Cominostaqa manam carretawanchu trillachinku.
Ajonjoliytaqa kaspiwanmi waqtana.
Cominostaqa varawanmi waqtana.
28 Trigota erapi trillaspaqa
manam caballowanchu chaypi kutarachina.
Trillana carretawan saruchispaqa
manam tanta ruranapaq hinachu ñuturachina.
29 Llapallanmi chaykunaqa hamun Llapallan Kamachiq Tayta Diosmanta.
Payqa tanteanmi admirakuypaq kaqkunata.
Payqa yachayninwanmi qespichin rurayninkunata.